افتكاسه فى تعدديل اسلوب التبريد

**khaled_sabry** · 22-06-2010 02:26 PM

اولا اسمحولى اشرحلكم النظام الحالى فى العربيه عندى
عربيتي ( كورولا 1978) و مروحه الريداتير (4 ريشه ) متوصله بسير على الموتور (بتاخد حركتها من موتور العربيه - و ليس مروحه بموتور كهرباء مستقل زى العربيات الحديثه)
امام الريداتير موجود السربنتينه بتاعت التكييف (التكييف تركيب) و امام السربنتينه دى يوجد مروحه اخرى صغيره بالكهرباء (80 وات) و سمكها رفيع بما يكفى لمكانها بين سربنتينه التكييف و الشبكه الاماميه للسياره المروحه دى بتشتغل فى حالتين مع تشغييل التكيف و مع زياده درجه حراره الريداتير عن درجه معينه من ثرموثتات فى الريداتير

دلوقتى بقى مشكلتى ان فى ايام الحر الشديد او فى الزحمه مش بقدر اشغل التكييف لأنى بلاقى العربيه سخنت جداا ... لأن التبريد معتمد على مروحة الموتور فلازم اكون بجرى علشان الموتور يبرد كويس
فى نفس الوقت اللى بلاقى فيه العربيات الجديده مشغله التكييف فى عز الزحمه و عادى جدا
فكنت عاوز احسن اسلوب التبريد عندى .. و انا فكرت فى طريقتين و مش عارف مين فيهم افضل (ياريت لو تقولولى اقتراحات تانيه )

1- انى اشيل مروحه الموتور دى خالص و اشوف مروحه استعمال بالكهرباء و اشغلها على نفس ثيرموثتات مروحه سربنتينه التكييف - بس المروحه الكهرباء هل حتبرد بنفس قوه مروحه الموتور فى الطرق المفتوحه ؟؟؟
2- انى ابدل مروحه الموتور بمروحه اخرى 8 ريشه مثلا - بس هل التعديل ده حيفرق معاى فى الزحمه ؟؟؟

على فكره تبريد العربيه كويس بالوضع الحالى و فى عز الحر اللى احنا فيه بس مش بيصمد لما بشغل التكييف فى الحر الشديد ده ... فياريت تساعدونى و اسف على الاطاله

**khaled_sabry** · 22-06-2010 03:50 PM

هو الموضوع هايف و لا انا لوحدى اللى بعانى منه ؟؟

**dragonanger** · 22-06-2010 04:45 PM

ال 8 ريشه هيفرق معاك اوى
وهى مش غالية جرب و شوف

**amrelsaqqa** · 22-06-2010 04:45 PM

ممممم انا مع فكرة انك تشيل المروحة اللى واخدة من الطنبورة خالص وتركب واحدة كهربة مكانها

وانا بفكر اعمل كدة لو ركبت تكييف

وبمناسبة التكييف ، انت ركبته فين وبكام ؟

**SiGmAa** · 22-06-2010 04:56 PM

المشاركة الأصلية كتبت بواسطة khaled_sabry

هو الموضوع هايف و لا انا لوحدى اللى بعانى منه ؟؟

والله ياباشا انا عندى نفس مشكلتك والمشكلة دى تقريبا فى معظم المواتير الخلفى القدديمة وهى ان مروحة التبريد طالعة من الموتور على طوول وواخدة سرعتها منو يعنى لو بتجرى حتلاقى المروحة تجرى معاك وتبريدها زى الفل لو على السلانسية بتبى بطيئة اوى وقلتها احسن وهى دى المشكلة انك لو ماشى فى الزحمة بتبقى معظم الوقت على السلانسية والعربية بتسخن عشان المروحة مش بتلف بسرعة مناسبة للتبريد

فبالنسبة لنقطة
- انى ابدل مروحه الموتور بمروحه اخرى 8 ريشه مثلا - بس هل التعديل ده حيفرق معاى فى الزحمه ؟؟؟

معتقدش انها هتفرق اوى يعنى عشان كدة كدة السرعة اللى واخداها بطيئة

انا اللى ناوى اعملو ان شاء الله حركب مروحة كهربا فى الناحية التانية من الردياتير وشة يعنى عند الشبكة كدة ومش مهم ثرموثتات حخليها بزرار عندى فى التابلوة كل ما مشى فى زحمة اشغلها والموضوع دة انا شفتة فى عربية لادا 2107 انجكشن موديل 2007 حاطيين مرووحتين صغيرين كهربا فى وش الردياتير دة بالاضافة للمروحة اللى طالعة من الموتور فحجرب كدة واقولك اية النتيجة ان شاء الله

**أحمد علوان** · 22-06-2010 05:13 PM

فكرة انك تحط مروحة من برا الردياتير زي بتاعة اللادا 2107 دي فكرة جامدة ومحترمة ونشكر اللي اقترحها العضو SiGmAa وجربها وقولنا

**د.محمود صلاح** · 22-06-2010 05:50 PM

تبديل المروحة باخرى بقميص وتعمل كهربائيا مع التيرموستات

**khaled_sabry** · 23-06-2010 08:28 AM

المشاركة الأصلية كتبت بواسطة sigmaa

والله ياباشا انا عندى نفس مشكلتك والمشكلة دى تقريبا فى معظم المواتير الخلفى القدديمة وهى ان مروحة التبريد طالعة من الموتور على طوول وواخدة سرعتها منو يعنى لو بتجرى حتلاقى المروحة تجرى معاك وتبريدها زى الفل لو على السلانسية بتبى بطيئة اوى وقلتها احسن وهى دى المشكلة انك لو ماشى فى الزحمة بتبقى معظم الوقت على السلانسية والعربية بتسخن عشان المروحة مش بتلف بسرعة مناسبة للتبريد

فبالنسبة لنقطة
- انى ابدل مروحه الموتور بمروحه اخرى 8 ريشه مثلا - بس هل التعديل ده حيفرق معاى فى الزحمه ؟؟؟

معتقدش انها هتفرق اوى يعنى عشان كدة كدة السرعة اللى واخداها بطيئة

انا اللى ناوى اعملو ان شاء الله حركب مروحة كهربا فى الناحية التانية من الردياتير وشة يعنى عند الشبكة كدة ومش مهم ثرموثتات حخليها بزرار عندى فى التابلوة كل ما مشى فى زحمة اشغلها والموضوع دة انا شفتة فى عربية لادا 2107 انجكشن موديل 2007 حاطيين مرووحتين صغيرين كهربا فى وش الردياتير دة بالاضافة للمروحة اللى طالعة من الموتور فحجرب كدة واقولك اية النتيجة ان شاء الله

شكرا على الردود يا رجاله ....
بالنسبه لللادا اللى بتقول عليها هو كان مركب تكييف .ولا المروحتين دول علشان تبريد العربيه و بس ... علشان انا بالنسبه للتبريد العادى بدون تكييف ممتاز انا مشكلتى مع التكييف فى الزحمه بس

انا كده كده عندى دلوقتى راكبه مروحه واحده صغيره فى وش سربنتينه التكييف و اللى هى راكبه بعد الريداتير ... و عندى ثيرموثتات بتشغل المروحه دى برضه بس و تأثيرها مكش قوى مع تشغييل التكييف و فى الزحمه
فلو ركبت مروحه تانيه بعد المروحه اللى موجوده هل حتعمل تأثير ملحوظ مع تشغيل التكييف فى الزحمه
و لا اشيل المروحه الصغيره دى و اشترى مروحه ريداتير كبيره و اركبها قدام الرسبنتينه مكان المروحه الصغيره .. بس تفتكرو فيه مروحه ريداتير بالسمك الصغير ده علشان تتحشر بين السربنتينه و الشبكه اللى من قدام ( مسافه 20 سم تقريبا بعد ماشيل المروحه الصغيره)

المشاركة الأصلية كتبت بواسطة amrelsaqqa

ممممم انا مع فكرة انك تشيل المروحة اللى واخدة من الطنبورة خالص وتركب واحدة كهربة مكانها

وانا بفكر اعمل كدة لو ركبت تكييف

وبمناسبة التكييف ، انت ركبته فين وبكام ؟

بصراحه انا صعبان عليا اشيل المروحه بتاعت الموتور لأنى بقى كتير اوى على المشاكل اللى بتعملها مروحه الريداتير و انها ممكن تقف مره واحده من غير مانحس .. وهوووووب الجوان ضرب يا معلم
بحلم (حلوه بحلم دى) انى اقدر اركب الاتنين مع بعض ... واحده كهرباء بالاضافه الى المروحه بتاعت الموتور بس مش عارف هل فيه مروحه تكون صغيره شويه بحيث ممكن تتحشر فى 20 سم مسافه بين سربنتينه التكييف و الشبكه

بالنسبه للتكييف انا اشتريت العربيه من عمى بالتكييف كده متركب فيها ... بس هو ركبه عند واحد مش فاكر اسمه فى شارع عباس العقاد جنب البنزينه اللى موجوده هناك عن تقاطع عباس العقاد مع مصطفى النحاس
و الكلام ده كان من 4 او 5 سنين تقريبا و كلفه ساعتها 1000 جنيه ... بس دلوقتى التكييف يتكلف تقريا 2500 على حسب ما بسمع .. بس ركب السيدان اليبانى الكل بيشكر فيه و هو اللى راكب عندى و عمره ماعمل مشاكل لغاية دلوقتى