يا شباب اريد معرفة الفرق بين الميجان 2006و2007 والفرق بين الكاملة بمثبت سرعة والكاملة بدون مثبت والاتنين مش بفتحة سقف ولا جنط والسعار تقريبا
عرض للطباعة
يا شباب اريد معرفة الفرق بين الميجان 2006و2007 والفرق بين الكاملة بمثبت سرعة والكاملة بدون مثبت والاتنين مش بفتحة سقف ولا جنط والسعار تقريبا
مويل 2006 فى نوعين
نوع للنصف الأول من 2006 و الموديل ده بيبقى زى موديل 2005 بدون مثبت سرعه
والنصف الثانى من 2006 بيكون بمثبت سرعه و الفوانيس الأماميه و الخلفيه مختلفه عن موديل 2005
موديل 2007 زى موديل النصف الثانى من 2006
الأسعار لموديل 2006/2007 بتكون حوالى من 68000 الف الى 75000 حسب الحاله و الموديل و الكماليات
طيب يا استاذ محمد انا بشترى 2006 كاملة بدون مثبت سرعة واضائة التابلوه اصفر مش ابيض وعاملة 94000 كم رشة شنطة ورفرف امامى ورفرف خلفى تساوى كام لو تكرمت، ابراهيم عبد المنعم.
ا/ ابراهيم لو العربيه دى قدامى مش حشتريها لأن انا مبشتريش عربيات رشه و لا كيلو متر عالى بالطريقه دى (ده تفكير الخاص)
بالنسبه للعربيه الى قدام حضرتك فيكون سعرها بالتقريب حوالى 63000 بدون فتحه سقف ولاتكييف تتش بس يكون فيها جنط اسبور
66000 بفتحه سقف لأن بيكون معاها تكييف تاتش
نصيحه حاول تجيب كيلو متر قليل + فابريقه و مش فارقه 2006 او 2005 (الفرق لو موديل 1/2 الثانى 2006 او 2007)
وربنا يوفقك ان شاء الله
طبعا اللى هقوله ده رأى الشخصى....اللى بيشترى إستعمال بيبنى على الأساس اللى رماه صاحب العربية الأصلى...
يعنى لو معتنى بيها و مصلحها صح (مش لممها و خلاص أهى ماشية ) و صيانتها فى التوكيل و العربية حالتها مشدودة يبقى ربنا يوفقك بعد طبعا تقرير مفصل من التوكيل....
لكن لو العربية مش متظبطة كويس أو متهانة بتكون زى القنبلة الموقوتة اللى بتنفجر فى المشترى الجديد و ما أدراك بشدة إنفجار الميجان....
الميجان تحترمها و تظبطها أول بأول تاخد منها عنيها....لكن تهملها و تكبر دماغك منها تطلع عينك و تفتح بقها و متقفلوش تانى.......
العربية قطع غيارها الأصلية غالية ..طبعا بالنسبة لفئتها طبيعية لكن بالنسبة لعربيات تانية شعبية تعتبر غالية خصوصا لو حابب تحط القطع الأصلية لكنها فى نفس الوقت بتعيش و بتخليك تستمتع بالعربية.
العربية بالنسبة لسعرها و اللى ممكن تصرفه عليها (بشرط الحاله النظيفة) تستاهل كل قرش تدفعه فيها و إن شاء الله تشترى و تركب و تعرف معنى كلامى.
قريبى باع موديل 2005 عاملة 105000 كم كاملة بحوالى 65000 جنيه لأنه كان مهاجر....لغاية دلوقتى كل ما أقابل المشترى يقولى أنا بدعيله كل يوم على الهدية اللى هداهالى و سلملى عليه كتير......
طبعا صيانة توكيل و العربية ملهاش حل مع إنها عاملة 105000 كم....فى رأى الكيلومتر مش هو أهم حاجة (طبعا لو أقل يبقى أحسن ) لكن الحالة العامة و طريقة ركوب المالك و فهمه للسيارة و مدى إعتناؤه بها هما دول اللى بيعملوا الفرق إن العمر الإفتراضى للعربية يطول....
ربنا يوفقك فى واحدة كويسة....متستعجلش و مش مشكلة السعر و لا الكماليات المهم حالة العربية...لو مش ملعوب فيها و متصانة كويس و حسيت كده إن كل حاجة فى مكانها و اللى راكبها أو إشتغل فيها كان فاهم...توكل على الله (طبعا بعد الكشف فى التوكيل ) و لو طلب زيادة عن سعر السوق متستخسرش فيها لأنك ببساطة هتعوضهم و زيادة....كفاية راحة البال و ربنا يوفقك......
Meggieboy، متشكرين جدا يا باشا على النصيحة المميزة دى وربنا يبارك فيك وفى الميجان بتاعتك
موضوع مفيد بصراحة