3500 minimum
عرض للطباعة
3500 minimum
ليه تقليب المواجع دة
مرة الواحد فكر انه يكتب كل المصروف جبت نوته جميله عليها علامة الدولار وعملت زى شحاته أفندى كله قيد يا شحاتة أفندى ... جمعت بعد أسبوع ..
النتيجة قطعت النوتة ودبت خناقة من النوع التقيل "مع نفسى علشان محدش يفهمنى غلط" وكانت النتيجة تمزيق النوتة 14 حته ...
المهم المعقول من 1000 - 1500 جنيه "بيت بس - مفهمش مليم لك"
بس المهم ان الواحد يتعود يعيش على كدة وعلى كدة يعنى يتأقلم على مستواه ويرضى ..
والحمد لله خلاص شوفنا أيام حلوة وشوفنا أيام ....
وربنا يجعلنا لنعمته شاكرين فى السراء والضراء
السلام عليكم
على فكرة يا جماعة إذا تعودنا نحسب ونكتب مصاريفنا اليومية ولو حتى ال 25 قرش حنلاقي نفسنا بنظبط وبنوفر وهذا عن تجربة.... بس أهم حاجة الإستمرار ولو لشهر واحد..... يعني إعمل لنفسك ميزانية وشوف كل شهر عديت الميزانية ولا الميزانية تمام ..... والفائض فين والزيادة فين...... بس ياريت انا أول واحد يلتزم بهذة الفكرة لاني جربتها شهرين وماكملتش!!!!
الإجابة على سؤال حضرتك نسبية جداً و تختلف من شخص لآخر و الضروريات عند شخص ما قد تكون كماليات عند آخر و هكذا ... رأيى الشخصى ان السؤال الأفيد هو ان كل واحد يقول فكرة للتوفير فى شئ ما و بتعدد الأفكار أعتقد ممكن نوصل لتوفير مبلغ لا بأس به من النفقات الشهرية ...
مثلاً فى مجال الدواء و هو بند لا مفر منه يمكن توفير مبلغ لا بأس به من خلال ما يلى:
1- عند شراء دواء أقراص اشترى من الصيدلى بالشريط و ليس بالعلبة لأن معظم الأدوية تحتاج منها فى العلاج شريط أو أقل غالباً إلا فى الحالات المزمنة أو مدد العلاج الطويلة
2- عند شراء دواء و بعد انتهاء فترة العلاج به ما رأيك أن تضعه فى بيت العائلة و يتم كتابة قائمة بأسماء الأدوية الموجودة به و تاريخ انتهاء صلاحية كل منها؟ و بذلك اذا احتاج فرد آخر من العائلة لدواء يمكن أن يسأل قبل الشراء اذا كان موجوداً فى بيت العائلة أم لا و بذلك يمكن توفير ثمن شراء دواء جديد ... و الموضوع دة موفر جداً فى أدوية الأطفال بالذات لأن معظمها أدوية شائعة الاستخدام -- أضف لذلك أن هذه الفكرة تزيد من قوة صلات الرحم بين أطراف العائلة و حرصهم على بعضهم البعض
و طبعاً يوجد مجال للتوفير من خلال مثل هذه الأفكار فى بنود انفاق كثيرة جداً مع ملاحظة ان العديد من الأفكار تتطلب نوعاً من التواصل بين أسر العائلة بدلاً من أن تنغلق كل أسرة على نفسها
3000 علشان تعيش مستريح نسبيا واحتمال كمان ميكفوش
انا مش هتجوز يا عم
ده خراب بيوت
انا مش عارف أصرف على نفسى لوحدى يبأى هصرف على بيت وعيال
لأ متشكرين
كلام ممتاز و فكرة ممتازة و أحب أوضح إن الموضوع متوقف على خلق الرضا اللي تقريبا بقى مختفي من الناس إلا من رحم الله
أذكر أخ ليا كان بيحضر مجالس علم للشيخ ابن عثيمين و سئل الشيخ مرة عن بيشتري الثوب(الجلابية) بتاعته منين قاله من أبو عشرة ريال علما بأن الشيخ لم يكن فقير أو محتاج ولكن كان عنده خلق الرضا كذلك نحسبه و الله حسيبه ولا نزكي على الله أحدا
رحمة الله على الشيخ و ربنا يرزقنا جميعا الرضا
لا يقل با ي حال عن 2000 جنيه
اقوللك ليه
كنت باجيب في اول جوازي ومش متذكر قوي كيلو زيت الدرة ب 4 او 5 جنية
كان كيلو الجبنة البراميلي ب 9 جنية
دلوقتي الضعف بالظبط وانا متجوز في 2003 مش زمن جامد
دلوقتي الجبنة البراميلي ب 18 جنيةوفى العروض ب 16 ومش حلوة
الزيت ب 10 او 11
السمن ال 1800 فيرن ب 60 جنية(مع اننا والحمد لله مش بناكل غير صحي يعني بزبدة يعني خراب بيوت)
اختلاف المنطقة بفرق كتير يا شريف
ولو زوجتك بتشتغل غير لو قاعدة في البيت
كل واحدة ليها مميزات وعيوب ومش بتكلم على دخل زوجتك دي هيا مكفولة منك
لكن بتكلم عن اعتمادها على نفسها في حاجات ولا عليك وعلى البوابة واللي بتسمسرة منك (رغم انك ما بتبخلش عليهم)
حاجات كتير قوي تدخل في الموضوع
لكن عموما مش اقل من 2000 بدون اي مصروفات جانبية زي الملبس والترفيه والعزومات الاجبارية
لان مثلا ممكن يكون شغلك بتطلب تلبس فورمال يوميا ده ليه متطلبات لكن لو مش بتلبس فومال يوميا وساعات كاجوال بقى الموضوع اكتر في المصروف
وفي انواع عمل زي المواقع مش لازم تلبس فيها لبس غاللي والعكس
وغيرة وغيرة
يوووووووة
ما تنساش تدخل المحمل يوم الخميس عشان بيبقوا عاملين عروض
وماتفكرش تشتري حتة ارض وتبني عليها اودة وصالة عشان مستر عز هايبيعك اللي وراك واللي قدامك قبل ما تصب عمود خرسانة واحدة
لو مصروف بيت بس من غير دكاترة وأدوية و عربية وخروج ولا حضانات ومدارس يبقى يادوب 2000 دلوقتى
1000 ده كان من 3 4ع سنين
ومحدش يقول ده مش مستوى متوسط - انا موظف مش رجل أعمال
يا جماعة انتو نسيتو اللبن و ده بند مهم جدا
انا تقريبا بجيب لبن فى الشهر ب 300 جنيه لان لبن الاطفال كمان غلى
العلبة الى انا بجبها بقت ب 29 جنيه
و تقولى 1000 جنيه
ده كان زمان
ربنا يسترها ان شاء الله