السلام عليكم يا شباب
أنا الحمد لله عملت صيانة الألف لعربيتي الساجا أوتو بلاك و حابب أعرض عليكم انطباعاتي الشخصية عنها بعد الالف الاولى
لماذا بروتون ساجا ؟
الحقيقة أنا لما حبييت أشتري عربية جديدة حددت الميزانية وكانت في حدود 66-73 ألف فوري لأني باكره القسط في أي حاجة و كان العربيات في الرنج ده ( فيرنا – لانوس – لوجان – بونتو بعد التخفيض الأخير – و أخيرا الساجا ) الفيرنا و الانوس عربيات اعتمادية و استهلاكية في شارعنا المصري لكن سعرهم غالي عليهم و شكلهم حاجة بقالها عشر سنين نفس الشكل و غير مناسبين للشارع المصري (من رأيي الشخصي) و استبعدت البونتو لأني عايز سيدان مش هاتشباك بقى فاضل المقارنة بين الساجا و اللوجان ففضلت الساجا للأسباب التالية:
1- ماليزيا هي البلد المصنع و ده عن ثقة في الاقتصاد الماليزي و دعم لاقتصاد اسلامي متنامي
2- اسم بروتون اسم يعتمد عليه – كان عندي دكتور معاه ويرا و لغاية الان بيقول فيها أشعار
3- الشكل عندي في رأيي الساجا أجمل كتير و خصوصا من الخلف
4- قررت اني أجيب أوتوماتيك و ده كان متوفر في الساجا بس
5- أنا واحد من الناس أحب التميز و انا ماشي في الشارع و ده اللي بلاقيه في البروتون عموما
6- المعيشة داخل القاهرة لا تحتاج أكتر من 1300 سس
تقييم السيارة :
الشكل الخارجي: الشكل جيد جدا و دي أذواق بس أنا حابب الخلفية بتاعتها و شكل الفوانيس و خطوط الكبوت
العربية تحس انها كومباكت و صغيرة و خصوصا في الالوان الغامقة زيا لاسود و لكن من جوه حاجة تانية
الصاج بتاع السقف و الكبوت تحس انه خفيف بينزل مع ايدك مع مسح السيارة لو ضغطت عليه شوية لكن الصاج في الابواب و الرفارف قوي و مدعم و الدهان الخارجي حاسس انه خفيف شوية (أسود ميتاليك) بحس انه سهل يتحك أو يمكن بيتهيألي
داخل السيارة : التابلوه بسيط ما يشغلش العين و خاماته من البلاستيك المتوسط و الدرج مساحته كويسة و عاجبني اوي اماكن التخزين الكتيرة بالامام و الخلف و طبعا مساحة الصالون رهيبة وكل اللي بيشوها مش مصدق انا طويل 185 سم فبرجع الكرسي للأخر و اللي قاعد ورا طويل و ما لا يلمس حتى الكرسي الامامي
الفرش : قماش تحس انه خامة كويسة وما بيحررش خصوصا في الايام اللي فاتت
الباور : متوسط و هو من نوع الزيت و تحس انه هاف باور لكن ده مش وحش في رأيي لانه بيسلعد على الثبات و حركة الطارة سلسة في الحرجة و عودتها بعد الملف كويسة
العزل : جيد جدا بس بتسمع صوت الماتور خفيف و ده صوت عاجبني جدا
العفشة : متوسطة الى ناشفة وده طبعا علشان الثبات وعلشان سيارة رياضية
الفتيس: سلس جدا و بتحس احساس خفيف بالنقلات لكن تحس انه اعتمادى و خصوصا انه من ميتسوبيشي
الابواب: عاجبني جدا زاوية فتح الابواب و اللي تقريبا حوالي 90 درجة و خصوصا لطوال القامة مثلي و الزجاج الكهربي سلس الحركة و لكن كان نفسي اللي ورا يبقوا كمان كهرباء
المحرك : ما شاء الله طول التليين كان عايز ينط و انا كنت مكتفه و تجميعه سريع وطبعا ده كام برو
الثبات : طبعا ما شاء الله انا خدت كم غرزة على الدائري و الزراعي و العربية و لا اتحركت ( لوتس عاملة شغل)
الرؤية : الامامية و الخلفية في منتهى الوضوح وطبعا البارك سينسور اختراع رهيب خلاني ما ابصش على المرايات و انا باركن
التكييف : شغلته بعد 800 كم في ايام الحر الاخيرة و هو شغال كويس
التوكيل : عملت صيانة الالف في أبو رواش وانا اول مرة اتعامل مع توكيل لكن كانت المعاملة جيدة رغم اني رجلي وقعت في حفرة هناك و اتجذعت و لفيتها برباط ضغط و ماروحتش العيادة
المهم قالولي هاستلم الساعة 1 ظهرا وانا مسلمهم العربية الساعة 10 ص وما كانش فيه مشاكل الحمد لله غير صوت ساعات بييجيس من الناحية اليمين قالوللي من تراب بييجي التيل و شحموها و فعلا اختفى الصوت و دفعت 167 جنيه و استلمت قبل 12 الظهر
في النهاية هي صفقة رابحة مقابل قيمتها و أي سؤال تحت أمركم
د/ محمد محمود - المرج
