الموضوع: اشتريت لانوس 99

السلام عليكم انا جديد معاكو هنا في قسم الدايو بس قبل كدة كنت في البيجو وقبلها في الفيات
اشتريت من فترة لانوس 1 موديل 1999 فابريكة دواخل بالكامل و فاضية مفيهاش غير باور وسنتر والتكيف عاوز يتصلح و فيها فرش جلد و4 كاوتشات جداد

عاوز شطارتكم معايا عشان فيها شوية حاجات عاوزة تتظبط وانا مش فاهم فيها اي حاجة ولما بفتح الكبوت بحس اني تاية ومش عارف اية الحاجات الغريبة اللي ماشية فية خصوصا ان العربيات اللي كانت معايا قبلها كانت كلها كربيراتير ومفيش حساسات ولا كمبيوتر ولا حاجات معقدة وكنت ساعات انا بصلح فيهم بنفسي ....... المهم ابتدي بتقرير بسيط عن العربية :-

القيادة العامة للسيارة سهلة جدا وناعمة جدا والدبرياج كأنة هوا
الابعاد بتاعة العربية سيئة للغاية وحاسس اني سايق بطيخة او قاعد جوة بالونة
استهلاك البنزين بالظبط 160 كيلو في الصفيحة
العربية واسعة جداااااااااااااااااااا و ركب معايا مرة 2 علي الكرسي جنبي و4 علي الكنبة ورا
عزم العربية جميل وسواء كان فيها شخص واحد او سبعة هوهو العزم مش بيقل
تسارع العربية وحش وحش وحش جدا لدرجة اني شكيت انة الموتور فية حاجة
اسعار قطع الغيار متوسطة واذا كنت لسة مجربتش قطع غيار تقيلة بس البداية خير
سخونة العربية مش بتعدي النص
ثبات العربية لغاية ال100 كم|ساعة كويس وبعد كدة بحس الطارة بقت خفيفة جدا جدا وهخش علي العربية اللي جنبي سواء شمال او يمين عشان كدة مش بحاول اني اعدي ال90 كم وعلي فكرة انا الكلام دة علي الغيار الرابع يعني لسة معرفش طعم الخامس اية ودة معناة انة العربية فيها انها تجيب تاني وتجري كمان

عاوز منكم اول حاجة اية رايكم في ثمنها 38000 جنية يعني غالية - معقولة - جميلة
تاني حاجة عاوز اعرف اعمل اية عشان اخليها تسحب وتشد ويبقي فيها تسارع
الثبات ثم الثبات ثم الثبات اهم حاجة عندي اشوف لها حل علما بأنني رصصت الجنوط وكشفت علي العفشة وظبط زوايا 3 مرات عند 3 مختلفين عن بعض والكاوتشات لسة زيرو


معلش طولت عليكو اوي وانا عارف بس حلاوة العربية الجديدة
وتحياتي لكل القائمين علي قسم الدايو :b4_388:

المشاركة الأصلية كتبت بواسطة jojowork1

مرحبا بك في عالم الدايوا انت هنا اعتقد انك هاشوف اختلاق عن باقي الاقسام عشان عندنا هنا عباقر في الدايوا
طبعا العربيه مختلقه خالص ومعقده جدا بنسبه للي كان معاك قبل كده
بس هي ما تعتبرش معقده بنسبه للحديث انا مره اشتغلت في عربيه اوبل بتاعت واحد صحبي اتخضيت من اللي شفته والكلكعه اللي فيها
شويه شويه ها تتعرف علي كل حاجه فيها
طبعا لازم تعمل سرفيس كامل علي العربيه السيور والزيت
سعر العربيه حلو بس حاسس انه رخيص حبه صغيره اعتقد ها تصرف شويه في الصيانه
بنسبه لابعاد العربيه كل اللي بينزل من قديم يركب حديث بيلاحظ كده وخاصه الدايوا فعلا من اصعب العربيات انك تشوف ابعدها ده مش صعب ده مستحيل بس شويه شويه ها تتعود عليها
السواقه سهله جدا والدوسات ناعمه خالص ده طبيعي جدا
بنسبه للثبات ليه عاومل كتير منها ارتفاع العربيه والعليات ضغط الكوتش والزوايا والترصيص بس بصراحه مش هافيدك اوي في المواضيع ديه هتلاقي خبره كتيره هافيدك
بنسبه للتسارع لا تسارع العربيه ديه جامد خالص ممكن يكون عندك حاجه محتاج ظبط
استهلاك البنزين زياده شويه ومن المعرف عن الموديل ده ان رشاشته الاصليه وحشه واحتمال تحتاج تغير رشاشات ها تعرفها بان الرشاشت الاصليه تخينه شويه وفي ناس بتغير بالبوش الالماني او الهيونداي انا جربت الهيونداي لاني ملقتش عندنا البوش مش وحشه بس في ناس كتير برده شكرت في الالماني وطبعا كفايه انه صناعه الماني الهيونداي كوري
احتمال كبير الرشاشت واسلاك البوجيهات والبوجيهات هاتفرق معاك في السحب والتسارع
عمتا حاول تجرب عربيه دايوا تاني تكون متظبطه مع اي حد من اصحابك عشان تقدر تحكم علي بعض المشاكل اللي عندك لان موضوع الدركسوين البور بصراحه انا معنديش مشكله خالص فيه يعني بعدي 160 الثبات كويس الدركسيون عادي خالص بعد 120 بحس ان الدركسيون بيتقل مش بيخف حاول تشوف لو فيه مشكله شوف البور وخد منه هوا بس احتمال كبير سبب عدم الثبات خفه الدركسيون مشكلتها واحده
عمتا في خبراء كتير هايدخولوا يساعدوك ويحللولك المشكله خطوه خطوه وهايسعدوك لغايه ما تظبط العربيه تمام وتحفظها كمان
مبروك عليك العربيه
يديك خيرها ويكفيك شرها

الله يبارك فيك
انا فعلا مجرب الدايو كذا مرة وعارف انها من افضل العربيات في الثبات ومع واحد صاحبي واحدة بردو 99 وجيبت بيها مرة 150 كم والتاني بتاعها بيوصل لغاية 70 كم وكمان دي غاز
وثباتها هايل عشان طبعا عندة الطارة كل لما العربية بتجري اسرع الطارة بتتقل انما انا عندي العكس بس علي فكرة هو مركب جنوط سبور اندونيسي مقاس 14 وعليها كاوتش كومو

وتسارع العربية دي مقولكش علية بسم الله ما شاء الله مرة طلع من النترا وانا جنبة ومكنتش مصدق سحبة العربية لاني لصقت مكاني علي الكرسي هههههههههههه


يرجى من العضو مراعاه الدقة فى كتابة لفظ الجلالة

مشرف عام الكورى و الماليزى