الموضوع: خايفة اسوق في مصر !!

ميرسي يا جماعة ..
ناس بتقولي هتتعودي وناس بتقولي بلاش .. وبعدين بقى ؟؟
وميرسي للي ادوني لينكات متعلقة بالموضوع استفدت منها وعجبتني ..

وبالنسبة لاي لعب في العربية من تركيب قطع او غيره مقدرش اعمله عشان مش عربيتي ودي ممكن يطير فيها رقاب :)
وغالبا فعلا هسوق بالقديمة الاول عشان اتعود ..

وصحيييييييح فكرتوني بال u turn ..
ده ال u turn هنا بيتعملوا صف خاااامس :):)
وقال انا هناك لما بلف u turn وحد يجي صف تاني جنبي ببقى مضايقة ومنزعجة جدااا ايه البلطجة والقلق ده .. هنا بقى طلع مش صف تاني ولا تالت .. خااااامس والله

وبالنسبة لموضوع الاشارات .. هناك لما الاشارة تبقى خضراء بعدي وانا مطمنة وواثقة 99.9 % ان الطريق ليا ومش محتاجة ابص يمين وشمال ..
هنا بقى الموضوع مختلف تمامااااااااااااااااااا ..
انا حاسة ان اعصابي تعبت وتوترت من مجرد تخيل الموقف ..
ادعولي بقى ربنا يقويني .. لاني فعلا بجد مظنش اني هقدر اخد الخطوة دي خصوصا ان كلها كام شهر وراجعة تاني .. على ايه بقى وجع القلب ..

صحييييييح .. حاجة كمان افتكرتها ..
النقل من حارة للتانية
يالهويييييييي بجد على اللي بشوفه هنا ..
انا اذا مكنش الشارع يبقى فاضي ورايا .. او ادي اشارة واستأذن اللي ورايا ويهديلي ويقولي اتفضلي عدي .. استحااااااالة اقدر انقل من حارة لتانية ..
اللي شفته بقى هنا .. مأسااااااااااااة .. مثلا مثلا ... صلاح سالم لو انا جاية من المطار ورايحة على الميرغني وواخدة شمال
وعايزة بقى اجي يمين عشان مطلعش الكوبري ..
وادي اشارة واطلع ايدي من الشباك والمفروض الناس فاهمة اني عايزة يمين ولو طلعت الكوبري هلف الكرة الارضية.. المفروض بقى يهدولي ويسمحولي اعدي
ابدااااااااااااا مابيحصلش .. وهما مالهم .. ماطلع الكوبري بالعافية ولا اطلع على الرصيف حتى ..
هما مالهم .. حاجة غريبة اوي .. يا ترمي نفسك وتعدي بلطجة يا تغوري في اي حتة بقى ماتقرفيناش ..

شكلي كده انا اللي مبعرفش اسوق ولا ايه ؟

لا لا لااااااااااااااااا انا خلاص مش هسوق في مصر .. بناقص
قرار نهاااااااااائي ..