-
خايفة اسوق في مصر !!
انا خايفة اسوق في مصر !!!!!
اه والله ..
يعني الحمد لله انا بسوق بره بقالي سنة او اقل من سنة
وماشي الحال يعني .. مش حريفة بس بعرف اسوق وبمشي جنب الحيط وبروح كل حتة وبسوق في الحر والبرد والمطر والتراب والحياة كويسة ..
من ساعة ما جيت مصر خايفة جدااااا اسوق
لسببين
اول سبب انا عربيتي هناك كانت بيجو 206 صغنونة وبسلك بيها في اي حتة
هنا العربيتين اللي موجودين واحدة سوزوكي sx4 والتانية دايهاتسو قديمة
الاتنين كبار وعاليين والابعاد بتاعتهم عملالي مشكلة
السبب ده مش مهم .. بالتعود هعرف اتعامل مع حجم العربية واحفظ ابعادها ..
السبب التاني بقى والمشكلة الاكبر .. هي ان السواقة هنا مش سواقة
دي اقل ما يقال عليها حرب بالدراع وبلطجة وقلة ذوق وعدم التزام ..
معلش اني بقول كده .. اكيد فيه ناس محترمة وعندها ذوق وملتزمة .. بس تعمل ايه ابرة في كوم قش ..
اذا كان فيه 1 ولا 10 ولا حتى 100 عندهم ذوق .. بقيت ال 80 مليون * * * * * * * :taz:
الناس بتقولي مهو كل الناس بتسوق عادي .. هتتعودي .. بالممارسة ..
بس مش عارفة ليه خايفة جداااااااااا اخد الخطوة دي ..
ده انا والله ببقى راكبه مع حد من اخواتي واعصابي بتبقى بايظة وعيني في وسط راسي وبكتم نفسي من اول لما العربية تتحرك لحد لما نقف عشان اعرف اخد نفسي ..
ايه ده .. هو فيه كده ؟؟؟؟ اي حد بيرمي نفسه في اي حتة .. اشارة حمراء خضراء بنفسجي اللي عايز يعدي بيعدي ..شارع اتجاه واحد يقلبوه 3 اتجاهات ( ازاي معرفش ) حتى الركنة بقى فيها افتكاسات والناس بتركن على شريط مترو مصر الجديدة .. حتى الشارع العريض اللي فيه 3 حارات تاخد 3 عربيات .. بيقلبوه 7 حارات .. واي حد بيلاقي اي فسفوسة فاضية بيحشر نفسه فيها منغير مايفكر هيحصل ايه بعد ما يحشر نفسه !!! :dunno:
انا من ساعة ما جيت وانا كارهة البلد والناس كل حاجة ..
انا والله زمان كنت بحب مصر اوي ..
بس دلوقتي بجد انا مش طايقاها ..
مش عايزة افتح في مواضيع تانية من قرفي وزهقي .. لاني لو فتحت عايزة اربع صفحات عشان اقول اللي جوايا ..
-
مقدرش اقول غير ان مع الوقت هتتعودي ... بس حضرتك متخوفيش نفسك
-
انا برضوا جديد نسبيا .. كنت بسوق عربية والدي باجيرو .. خايف انا اطلع من البنزينة بيقولي احنا كدا مش هانمشي لازم تجمد قلبك
انا اخدت الكلمة دي قمت طااااااالع d:
بعدها وانا ماشي الاقي عربية عمالة تقرب مني والدي قالي حاسب قولت له هو الي داخل عليا .. قالي ممكن يكون مش منتبه انتا خد بالك ؟
واتعلمت درسيين صغيريين :)
وبالتوفيق ليكي ..
-
استمتعي بالكويت وجمال الكويت وانصحك فعلا متسوقيش في مصر علي اد ما تقدري انا مش بعقدك بس دا فعلا لراحتك النفسيه لان الوضع مش هيتغير
-
لا مع الوقت هتتعودي
صحيح هتتخضي في الاول بس هنعمل ايه :)
انتي اهم حاجه السواقه هنا محتاجه يكون قلبك جامد و ما تخفيش و ماتحسسيش اللي قدامك انك خايفه لان هنا قلة الذوق موجوده بتوفر و لو حاسوا انك خايفه مش هتعرفي تمشي
-
للاسف ده واقع السواقة فى مصر...بس مع الوقت هتتعودى على العك اللى حاصل عندنا فى الشوارع ده
فمتفكريش كتير وشوية بشوية هتلاقى الخوف ده راح وهتلاقى نفسك اتعودتى على سيستم السواقة فى مصر
-
دووسي و توكلي علي الله
متشيليش هم
في بنات محترفة والله ماشاءا لله يعني عادي جدا
مع الوقت حتتعودي
-
دة إلي حصل معايا
بعد 6 سنين برة مصر و لسة راجع السنه إلي فاتت
بس الواحد كان واخد تطعيم من وهو عنده 10 سنين
أنا بدأت أتعود بعد حوالي ٣ شهور .. علشان كدة مجبتش عربية جديدة غير بعد لم إتعودت
اللنك ده بيعبر عن ألي بعيش فيه
http://www.nilemotors.net/Nile/141112-a.html
-
[QUOTE=Miss_Pharma;3872791487] .. هي ان السواقة هنا مش سواقة
دي اقل ما يقال عليها حرب بالدراع وبلطجة وقلة ذوق وعدم التزام ..
( عندك حق فعلا )
انا من ساعة ما جيت وانا كارهة البلد والناس كل حاجة ..
انا والله زمان كنت بحب مصر اوي ..
بس دلوقتي بجد انا مش طايقاها ..
( شيئ متوقع و عادى )
-
بكرة هتتعودى زى أحمد حلمى
و على فكرة أنا الكام مرة إلى بسوق فيهم ببقى ماشى جوة الحاره و أقسم بالله العظيم لو واحد مدينى جمب عربيته ممكن اخبطة و ساعتها نعمل محضر بقى بس حتى الأن محصلش حاجة بس الكارثة أن فيه شوارع كتير مفيهاش تحديدات للحارات و دى بيبقى الواحد ماشى و هوا حاطيت قلبه جوة الجزمة مع الفرامل و البنزين و دا أنا معاكى فيه أنه سوء تنظيم من الدرجة الأولى من المسؤلين و بصراحه المفروض يبقى فيه قانون يعاقبهم على كدة
بس ملحوظة
دا ميخلكيش تكرهى البلد و تكرهى الناس إلى فيها
إلى مالوش خير فى أهله و بلده مالوش خير فى حد
لو كانت مصر مقصرة معانا الكام يوم دول لحد ماهنموت فأحنا ننتقد المسؤلين مش ننتقد الجاهل بالصح و الخطأ لأ ننتقد المعلم و القائد إلى خلى شعبه مش فاهم فين الصح و فين الغلط
Content Relevant URLs by
vBSEO 3.6.0 PL2