باركولى يا رجاله انا استلمت سكودا فانتازيا النهارده وهى مانيوال عقبالكم
عرض للطباعة
باركولى يا رجاله انا استلمت سكودا فانتازيا النهارده وهى مانيوال عقبالكم
الف مبروك
متشكر اوى يا باشا
ألف ألف مبروك يا غالي
حبيب قلبي مانيوال
لازم تفصص عربيتك وتخبرني عاملة إيه معاك تقريرك يا غالي فينه؟
أسررررررررررع
لأني أفكر جديا في المانيوال
مبررررررررررررررررررررروك ...
ربنا يديك خيرها و يكفيك شرها ويديمها عليك نعمة..
في رعاية الله..
مشكورين والله والتقرير شويه بس استلم الافراج وارخص
واكيد هكتبلكم تقرير مفصل عن ادائها
دلوقتى اكتبلكم تقرير عن ظروف الشراء
انا روحت لسمير ريان بعد الاطلاع على موقع لقطه انه بيبيعها مانويل فول اوبشن
ب 145000 اتأكت بالتليفون ورحتلهم على الساعه 10 مساء
وهناك كانت المفاجه كبيرة لما المندوب قالى انها غليت وبقت ب 148000
طبعا اضايقت جدا وطلبت اقابل الحاج سمير ريان نفسه وبعدين جالى كبير مسئولى
السيلز وقالى مش ممكن قولتله كده مفيش مصداقيه فى الكلام واتصات وانا معاه
بنفس المندوب اللى قالى انها ب 145000 ورد وكان منظرهم وحش اوى وهو بيقولى على
الاسبيكر وكلنا سمعينه انها ب 145000 والاستلام خلال ساعه وصممت على كلامى
ولما عرفوا انه هشترى كاش وافقوا وقالولى العربيه فى ابو رواش هتستنى قولتلهم استنى
لانى عارف انها فى ارتوك ب 150000 جنيه وديه فرصه خصوصا ان الاسود قالولى انه قليل
استنيتهم واستلمتها الساعه واحد ونصف صباحا وادونى معاها ميداليه قالولى انها فضه
بس طبعا هى مش فضه ولا تعرفها مكتوب عليها اسم سمير ريان وكمان طقم دواسات جلد
بجانب طقم العربيه الموكيت ورخمت عليهم واخدت كمان غطاء ووتربروف واعطيتهم 100 جنيه علشان
غسلوها لما جدت من ابو رواش كانت بيضه من كتر التراب اللى عليها وبقشيش للمندوب واتباعه
وخرجت من عندهم ولمبه البنزين منوره والعربيه بتعيط من الجوع فولت 92 وروحت
بالنسبه للعربيه كالاتى
توصف ب اول فئه فول اوبشن فيها مثبت سرعه ومانيوال
باختصار الفرق بينها هى واول فئه اتوماتيك ان التكييف بكرة للفان مكان زراير التتش
وكمان الفتيس طبعا
لكن فيها كل حاجه وجراب نضارة وبيان ظبط العجل وتكييف خلفى بس مفيهاش مخدع
خلفى .handrest
وطبعا طاسات مش جنوط وقالولى هستلم الافراج يوم الخميس باليل وارخص يوم السبت
وبعد شويه اقولكم عامله ايه فى المشى وخلافه
لو حد يعرف طريقه تليين معينه يا ريت يقولى وهستنى رودودكم
لكم منى جزيل الشكر لكل اللى زار موضوعى وباركلى
الف مبروك ياكبير وربنا يديك خيرها ويكفيك شرها.......
هل المانيوال فيه موزع تكييف خلفي؟
الف مبروك ... واحسنت التصرف نعهم
ألف مبروك يا باشا وربنا يديك خيرها ويبعد عنك شر الطريق.آمين
شكرا يا جماعه والله الواحد هنا بيحس انه وسط اصحابه واخواته
بالنسبه للفئه المانيوال بها تكييف خلفى وكمان مثبت سرعه
وانا موجود لآى استفسار بس سامحونى على اساس ظروف شغلى
لو اتاخرت فى الرد
الف الف الف مبروووووووووووووووووووووو ووووووووووووووووووووووووو ك
وربنا يديك خيرها ويكفيك شرها
ويريت تعمل تقرير عنها لانى عايز ابيع الاوتوماتك وجيب منوال
الف مليون مبروك. ربنا يديك خيرها و يكفيك شرها. سؤال صغير... و انت ماشى على 100 كم على الخامس, ال ار بى ام بتكون على كام؟ و شكرا جزيلا ..
مبدائيا احب اشكر كل اخوة اللى باركولى وشاركونى فرحتى
بالنسبه لسرعه 100 الار بى ام بيكون على 3 تقريبا او اقل بهفوة بسيطه
استاذ شيكو لو حضرتك متاكد من موضوع التليين ياريت تاكدلى مصدر المعلومه
لانى متكتف وخايف اجرى اكتر من 120 وخايف على الماتور وتكون مشكور
نيجى بقى للتقرير وكانت التجربه على طريق السخنه الجديد وطريق الزعفرانه
بمنحنياته اللى على الساحل
مبدائيا الثبات اكتر من رائع خصوصا فى الملفات الصعبه مع السرعه العاليه
التكييف خطير فى الشمس خصوصا انى عربيتى لونها اسود حبيب الشمس
بالنسبه للسحب جميل بس بحس ان العربيه متكتفه لغايه لما الار بى ام يعدى 2.5
على الغيار التانى بعد كده كله تمام زى الفل والتجميع جميل وصوت الموتور هادى
وغير مزعج خالص
بالنسبه للاستهلاك الوقود انا كنت مفول 92 وسافرت وبعد لما رجعت كانت الرحله
580 واستهلكت عند التفويل 45 لتر 92
انا بالنسبالى استهلاك ممتاز خصوصا مع 1600 سى سى والتكييف كمان
الشىء الوحيد اللى تاعبنى هو اللون لانه محتاج نضافه كتير وحبيب للتراب
هو ده التقرير المبدئى عن العربيه ومشيها واكيد لنا لقاء اخر بعد شويه
انا موجود لو حد عنده سؤال بخصوص الفئه المانيوال وشكرا
الف مبروك
.
الف الف مبروك
ربنا يستر عليك
ارجوك اشرحلى كيفية استخدام
النور ومثبت السرعة
وارجو منك افادتى هل سعر145000 شاملة التأمين الشامل
ام بدوون وشكرا
الف مليون مبروووووووووك العربية وربنا يديك خيرها ويكفيك شرها
الف مبروك و ربنا يديك خيرها ويكفيك شرها
ميرسى يا جماعه
بالنسبه لسؤال الاستاذ جورج
اولا 145000 غير شامل اى حاجه ده سعر العربيه كاش من المعرض
وبعدين السعر ده اوفر من الوكيل 5000 جنيه امن بيهم يا سيدى
بالنسبه للنور المفتاح على الشمال بتلفه يمين ينور النور الصغير
لو حبيت الفوج الامامى اجذب المفتاح للخارج تكه واحدة ولو حابب الفوج الخلفى
كمان خليهم تكتين ثم النور الواطى كمان لفه يمين والعالى من ذراع الطارة طبعا
بالنسبه لمثبت السرعه تخليه على الوضع on وبعدين تجيب السرعه المطلوبه
وتضغط عليه برس كده انت ثبت السرعه وبيفصل اتوماتيك لو لمسه الدبرياج او الفرامل
وانا موجود لو فيه اى استفسار وشكرا لكل الاخوة اللى زاروا موضوعى