الموضوع: اطارات النسر, وجهة نظر مغايرة.

أهو رجع تانى

خليفة خلف خلف الله خلف خلاف المحامى

عايزين نعمل أغنية (حمال الهموم ياصغير) خلفية للمواضيع دى يا اخواننا

كانت لدى الشاهين

وكنت شاريها من الزيرو

وكان فيها النسر فخر الصناعة المصرية

ومغيرتوش ولا حاجة

وماذا كانت النتيجة

بعد 7 آلاف كيلومتر فقط ، الكاوتش طبعا نقشته زى الفل ، لكن العربية بتتصرف تصرفات غريبة جدا، ماشية زى ما تكون راكب جمل عمالة تطلع وتنزل

مش نافعلها ظبط زوايا ولا ترصيص، وبعد 90 الغربلة على ودنه والعومان ولا كأنك فى محيط

جوز المساعدين اللى قدام باظوا والعربية احتاجت زرجينة علشان اضبط الزوايا

قلت لنفسى عليك من ده بإيه يابنى

وبعت النسر اللى فيها بمبلغ طائل بعد 7آلاف كيلومتر ومع انه فيه عالى وواطى (بعد 7آلاف كيلومتر فقط عمل عالى وواطى) لأن البلد مليئة بسائقى التاكسى الذين يدفعون مبلغ لا بأس به فى فردة نسر برسمتها وملعون ابو الراحة على ابو العفشة على ابو الزوايا ، مهوا آخرهم 40 وللا 50 كيلومتر فى الساعة

جبت كاوتش جى تى

اولا :حسيت ان انا ركيت عربية تانية خالص ، كأنى ركبت مرسيدس بعد ما كنت راكب مرجيحة،
ثانيا: انتهى الى غير رجعة العومان على 80 والغربلة من 60 وطالع
ثالثا: المساعدين عاشت بلا نهاية ونسيت سكة بتاع الزوايا
رابعا: الكاوتش الجى تى خرج من العربية بعد 60 ألف وغيرته نزاهة واخويا خد الكاوتش القديم ولسة شغال بيه لحد ديلوقتى مع انى بعت العربية من سنة بعد ما غيرت الكاوتش بسنة أخرى

خامسا: ان كنت ناسى افكرك ان اول ما نزلت العربيتا الإكسيل تجميع محلى كان لها سمعة زى الزفت انها بتنقلب، السمعة دى انتهت مع التخلى عن الكاوتش النسر فى الإكسيل المحلى وبعدها الأكسنت وطرحها بكاوتش مستورد

سادسا: كان لى شرف التعامل مع شركة النقل والهندسة التى تصنع كاوتش النسر ومقرها سموحة بالإسكندرية، وشفت مدى تخلف العمليات التصنيعية عندهم لدرجة ان طبخة المطاط بتاع الكاوتش كانوا بستخسروا يشتروا جهاز بتلاتة تعريفة ينظم الجدول الزمنى بتاعها ويسيبوا الموضوع لإحساس عم عبده ماسك فى إيده ساعة وهو اللى بيظبط درجات حرارة الفرن بالوايام كدة بدون اى جهاز قياس او تحكم

انا من اكبر مشجعى الصناعة المصرية، لكن لحد كاوتش النسر ومقدرش اقول سوى ان آخره تاكسى 1300 او عربية سيات مش هيمشى اكتر من 40 كم/س

بص، حاول تجرب تستعمل كاوتش نضيف ، مش هقول لك بريدجستون او ميشلان ، لكن اضعف الإيمان حاجة زى الجى تى، على نفس عربيتك مش عربية تانية، هتكتشف ان فيه حاجة فى الدنيا اسمها نعومة وحاجة تانية اسمها هدوء وحاجة تالتة اسمها راحة

ملحوظة صغيرة: ازاى يا بشمهندس تقول على عربيتك "اثقل وزنا" انت ناسى انها 950 كيلو جرام فقط ؟يعنى اخف من الفيرنا واللانوس بحوالى 100 كيلوجرام تقريبا ، هى بتبقى خفيفة ساعة لما تكون عايز تبين لنا ميزاتها وثقيلة ساعة لما تكون عايز تمجد فى كاوتش النسر؟

يالهوى نسر محدش يقول الكلمة ديه قدامى عذبنى معاه فى ال 128 راكب جمل فعلا ويوميا فى 3 اخرام والله مرة بآخد ملف جامد شوية الكاوتش فسى بعد 7000 كم فردة جالها دمامل غريبة زى إنفخات فى الكاوتش وفرده جنبها اتمسح تماما جالهم حمى يعنى