الموضوع: اطارات النسر, وجهة نظر مغايرة.

بمناسبة النسر يا جماعة ممكن بس حد يفيدنا في النسر السوبر مش العادي علشان الفيرنا بتاعتي نازلة بية من المصنع هوا طبعا عايز ترصيص هبالة و و باحتراف و خشن و مقرف بس الي انا شايفة انة قوي جداااااا علشان شوارع المحروسة المكسره يعني عمرك ما حتلاقي في زنبة طلعالة علشان مطب و كدا زي ما بيحصل في الانواع المحترمة المخصصة للسير في الشوارع المحترمة في اي بلد تانية و بالذات الانواع الي بتنزل في العربيات مواصفات خليجي دا غير اني مستحرم اغيره اولا العربية مش مستاهلة ثانيا انا مش باحرق اوي و جري و خلافة ثالثا انا مرصصة عند ناس محترفة يدويا و مش كومبيوتر ( علشان الكومبيوتر مش بينفع فيه ):)))) رابعا هوا قوي علشان المطبات و القرف خامسا مستحرم اغيره و انا لسة عامل 13 الف بس بية و هوا لسة لانج و شكرا و اسف علي التطويل

المشاركة الأصلية كتبت بواسطة Khalid_Mostafa

يا استاذ فادي انا كنت مثلك مقتنع بأن كاوتش النسر ده فخر الصناعة المصرية وكان كلامي من واقع انه كان راكب في اول عربة سقتها وكانت بيجو 304 موديل 1973 وكانت اسبابي انه فعلاً بيطول في العربية بل انك ممكن تنساه اما عن اداء العربية فكنت بأعتقد ان ده بسبب عمرها الطويل وحتي لم اشتريت عربية موديل حديث (كانت سويفت موديل 97 وكان الكلام ده في 2000) وطبعاً كانت السويفت ساعتها من العربيات الحلوه لأن الكوري مكنش منتشر زي دلوقتي..المهم ان العربية اشترتها بكاوتش مليزي ومستعمل وطبعاً حالته كانت وحشه فقررت اني اغير اربع فرد نسر وشكلهم حلو و سعرهم مناسب و حيعيشوا في العربية .
الي حصل انهم طلعوا عيني لفترة ومفيش 10000 وكنت بايعهم و مغير لكوتش كوري نانكانج وحسيت ان بعدها السويفت دي اصبحت مرسيدس..مفيش صوت كاوتش مفيش احساس بالطريق مفيش طالع نازل مفيش كل شويه ترصيص (ودي اكبر مشكله في النسر لأن العجله مبتتكلش بشكل منتظم نظراً لأن الخلطه بتاعتها مكلكعه) .وطبعاً ساعتها قلت يمكن الي انا اشترتهم دول كانو مركونين او قدام او حاجه (مع ان الي جابهملي كان واحد معرفه موثوق فيه) لحد معرفت بعد عدة سنوات سبب ليه كاوتش النسر ردئ بالشكل ده.

هو السبب علي فكره مش النقشه زي ما الزملا قالوا (او علي الأقل مش هي السبب الأساسي)
تصادف اني اشتغلت في شركة في الإسكندرية اسمها اسود الكربون وهي شركة هندي ولمن لا يعرف فالمكون الأساسي في كاوتش السيارة هو بودرة سوداء اسمها اسود الكربون (شبه البودرة الي بتبقي في التونر بتاع البرينتر الليزر) . ومن هناك عرفت الحقائق التالية :
1- هذا المصنع هو المورد الأساسي لميشلن في اوروبا و البرازيل و تركيا
2-مورد اساسي لبريدجستون في عدة دول
3-مورد اساسي لبريللي في عدة دول ومنها مصنع بريللي في الإسكندرية (فاروس)
4-مورد لبعض مصانع دانلوب و شركات اخري
5- وطبعاً المورد الوحيد لشركة النسر
اكتشفت ان هذا المنتج ينتج بدرجات متفاوتة من الجوده و النقاء وان افضل الأنواع تورد للشركات الأخري في حين ان شركة النسر تأخذ منتج ذو جودة متواضعة وطبعاً الي بيتحكم في ده معايير الجوده في كل شركة من الشركات دي (يعني كل شركه هي الي بتختار المنتج الي بيرحولها) ده بقي غير مراحل الإنتاج و التصنيع في الشركات دي

احنا مش ضد الصناعة المصرية طبعاً بس تقدر تقولي ليه شركة النسر مبتصدرش كميات مادامت بهذه الجوده ؟؟؟ ومع ان جودته سيئة ليه سعرها مش اقل من الأنواع المستورده مع ان الأنواع الأخري عليها جمارك و حماية منتج محلي و كلام من ده ؟؟