الموضوع: باركولي، ركبت عازل حراري 3M crystalline 70 (تقرير مصور)

السلام عليكم ،

طبعاً كلكو عارفين الحر اليومين دول يجنن ازاي ، ونا بالي فترة بدور في موضوع ال-V-Kool وال-3M والعوازل الحرارية، بس اسعارها كانت مديقاني أوي لأنها غالية أوي..

المهم أنا كنت شفت موضوع عملو أخ لينا فالمنتدى كان كاتب إن عمل فيه نص العربية الادماني بس، فعجبتني الفكرة و قلت أهو حاجة مؤقتاً أرحم من مفيش..

عامةً مش هطول عليكو و هحاول اختصر.. أنا جبت نمرة الباشمهندس سامر من موضوع هنا فالمنتدى، و كلمتو و عرفتو بنفسي اني عضو في نيل موتورس و بصراحة الرجل ذوق أوي و كان في قمة الذوء والإحترام معايا..

اتفقت معه اني عايز اركب النص الأمامي بس، و هو نصحني إن التأثير مش هيبان كويس غير لما العربية كلها تركب بس أنا قلتلو لما ربنا يبقى يسهلها اركب النص التاني..

اتفقت معاه على يوم التركيب و هو كلم مهندس التركيب (باشمهندس بيتر) أكد عليه ال معاد.. و رحتلو فالمعاد فعلاً قابلني في شارع مصطفى النحاس(مهندس بيتر)، خد مقاسات العربية ، بعدين طلعنا على مخزن بتاعهم عشان يجيب ROLL و يقطع على أد المقاسات، بعدها طلعنا على حتة تانية في شارع النادي الأهلي عشان التركيب..

التركيب خد حوالي ساعتين، معظم الوقت فالإزاز الادماني لأنو أصعب واحد فالتركيب..

أسبكم مع شوية صور :


تركيب الإزاز الجانبي:




دي صورة للإزاز أبل التركيب:


و دي صورة بعد التركيب :


وادي شوية صور كمان





صور الإزاز الادماني أبل التركيب:


و دي صور الإزاز الادماني بعد التركيب:



أما بالنسبة لتعليقي على التعامل معاهم:

الإجابيات:
- هما بصرحة ذوق أوي و محترمين فالتعامل، سواء الباشمهندس سامر (المدير) أو مهندس بيتر إلي ركب الفيلم

- مهندس التركيب (بيتر) شكلو فاهم كويس و متمرس فالموضوع

- الشركة شكلها محترم و كبير، مش مجرد محل بيركب و خلاص ود طمني شوية

- ركبولي فتحة السقف على أساس انها من النص الادماني من غير مشكلة

نيجي بقى للسلبيات:
- مكان التركيب وحش، في مدخل مخزن كدا والمكان مفتوح أوي، يعني التراب معرض أوي أثناء التركيب و دي مش حاجة كويسة

- دي بقى حاجة ضايقتني شوية، بعد التركيب المهندس طلب مني اني ادفع من غير أي إيصال أو فاتورة ولا أي ورقة تثبت اني دفعت، و طلب مني اني أعدي تاني يوم أخد ورقة الضمان، والسبب في كدا عشان المكتب كان قفل عشان يوم سبت أو حاجة كدا .. طبعاً أنا كان مستحيل ادفع لولا انهم كانو محترمين و طمني تعاملهم، بس بردو مش موقف لذيذ


أما بقى بالنسبة بقى لرأيي بعد التركيب:

- لم بركب العربية بعد ركنة طويلة فالشمس، أبل التركيب كانت بتبقى مولعة نار والدركسيون بيلسع، بعد التركيب بردو لسة مولعة بس مش ذي الأول و بردو ال دركسيون لسة بيلسع، بس أخف حاجة بسيطة واللسعة بتروح أسرع مل أول مع فتح الإزاز

- ونة جوا العربية، كنت ببقى حاسس بالشمس جامد ضربة في ايدي، دلوأتي لسة بردو حاسس بيها بس أخف مل أول

- التكييف: بيسقع في وقت أقل مل أول، و في فرق ملحوظ في التسقيع

- الشفافية: ذي منتو شايفين، مش باين إن في حاجة راكبة خالص

- دي ملحوظة مديقاني بقى، إن أنا شايف bubbles فالأبواب الجانبية ورا الفيلم، المهندس كان قالي انهم هيرحو مل شمس، بس أهو بقالي حوالي إسبوع و لسة مرحوش

ملخصاً:
العازل ظريف اه بس بصراحة مش ذي مكنت متوقع، الفرق الوحيد إلي حسو جامد هو في أداء التكييف.. و د يرجع إن يا إما عشان لسة مركبتش النص الوراني، يا إما عشان الجو مش طبيعي اليومين دول.. و عامةً أنا ناوي إن شاء الله اركب فيميه اسود فالنص الوراني واشوف اه إلي هيحصل

ملحوظة: أنا كنت رحت لتوكيل V-Kool عشان أجرب النوع بتاعو مقارنةً بال-3M، و بصراحه ال-V-Kool كان أداءو أحسن بكتير و كان عازل الحرارة تماماً، انما ال-3M مجرد بيقللها، بس طبعاً ال-V-Kool أغلى بكتير أوي


السعر ذي منتو عارفين، ١٠٠٠ جنيه للنص الادماني (و معاهم فتحة السقف)

أسف عل غلطات الإملائية، عشان باستخدم yamli

منتظر ردودكم !

الف مبروك على التركيب والمفروض لا يوجد اى فقاعات ولو فى مشكله ممكن يعيدوا الشغل كله وانا ظهرت مشكله عندى فى الأمامى بعد شهر وكلمت بيتر وركبت امامى جديد وكان لاصق جدا لدرجه ان خفت على الزجاج وده اكثر كفاءه من الأنواع الخرى غاليه الثمن وهو بيمنع حوالى 99% من اشعه فوق البنفسجيه الضاره جدا وده اساس الشغل كله (الأشعه الضاره) مع باقى العوامل المساعده الأخرى
http://www.nilemotors.net/Nile/152011-v-cool.html