تمام كده
يعنى هتساعده إنه يبدأ من نقطة أعلى من اللى مفروض يبدأ منها
الآن اتفقنا وبارك الله فيك وفي أبناءك
عرض للطباعة
تمام كده
يعنى هتساعده إنه يبدأ من نقطة أعلى من اللى مفروض يبدأ منها
الآن اتفقنا وبارك الله فيك وفي أبناءك
أنا اول مره أدخل على الموضوع ده...
أنا قاعد بقالي حوالي تلات ساعات ونصف قراءه كل المشاركات اللي في الموضوع ده و ساعه زياده لكتابة ردي عليه
بجد الموضوع ده هايل هايل هايل يا دكتور احمد.. ولازم إسم الموضوع يتغير علشان الناس تعرف محتوى الموضوع الصح..
الخبرات وقصص الكفاح ديه بتبقى مؤثره جدا جدا وبتدي معنى للحياه.....كمان انا فاكر مره من زمان كان هاني أدم كتب برده قصته في موضوع كان فاتحه هاني عطيه ياريت لو نقدر ننقله هنا يبقى هايل قوي.
واضح إن موضوع السمك ده ماجاش من فراغ .. وكمبيوترات وويندوز 311 .. أنا أول ويندوز اتعاملت معاها كان 95 .. بس عاجبتني اوي حتة الورق الخفيف ده ..
واضح يا كيمو إنك كنت مصيبه من صغرك
دايما كده في الخير سباق... ربنا يكرمك ويرزقك يا كريم على قد ما إنت بتساعد غيرك وبتقف جنبهم في محنتهم قبل فرحتهم.. وإسمحلي أضم صوتي لصوت نهى وأقول ذي ما قلتلك كده
يانهارك أبيض يا نهى... إييه النق ده .. مش كده
وعلى فكره بلاش حين ميسره ده :)
والله يا دكتور معاك حق في موضوع الوقت ده.. ربنا أكرمنا ب 24 ساعه في اليوم.. لو الإنسان قدر يقييم هو عمل أيه في كل ساعه من دوووول .. هايكتشف إن وقت كتير إتهدر في كلام فارغ للأسف...
الشخصيه المنظمه في إدارة وقتها هي شخصيه مدركة قيمة الوقت صح وبتنجح إنها تستغل كل دقيقه في عمل شئ مفيد..
والله قصة حضرتك يا أستاذ محمد قصه مؤثره جدا وفيها معاني وعبر كتير...
وربنا يكرمك ويوفقك في حياتك القادمه وتكون في حال أفضل
موضوع النسخ ده كان حكايه بمعنى الكلمه.. كان أيامها الواحد بيطلع عينه علشان ينسخ أي حاجه والمشكله إن كان فيه ناس بتستغل الموضوع ده أسوء إستغلال للأسف
بس تربية الأهل من البدايه لأبنائهم على المسؤليه ليها الأثر الأكبر في حياتهم المستقبليه
واضح يا بيشو إنك خبره كبيره في المجال ده ... كمان الوالد والعمام ومجال عملهم ذات نفسه كان ليهم الأثر الأكبر والعميق في تكوين حياتك من الصغر.. يعني إنت لو بتتكلم إن كل اللي حصل ده حصل في 10 سنين بس .. تخيل بقى بعد 30 او أربعين سنه... هاتبقى أييييه.. هاتبقى professional في مجالك ده
الخبره في السن الصغير ده ممتازه جدا جدا في الحياه العمليه المستقبليه
ربنا يكرمك يا باشا في موضوع الدكان ده ..
إنت ممكن تقسم وقتك بين شغلك وبين هوايتك اللي بتحبها .. لغاية ماتوصل لل optimum في واحده فيهم وتحس ساعتها إن ده هو اللي هاتكمل فيه بقيت حياتك
الحمد لله إن ربنا كرمك بالشغل اللي في تخصصك
بس حلوه إستبن ده... جايه في المكان الصح
أما بقى موضوعك يا علا .. فده حكايته حكااااااااااااااااااااااا ااااااااايه
الحمد لله إني قدرت أقرأ كل ال 14 حلقه
الحلقه الرابعه ..فيها مقطع إنت إستخدمتيه في موضوع من الموضوعات هنا ... حتى انا إستغربت أوي .. يعني الوقت اللي فتحت فيه المدونه ودخلتي على الحلقه الرابعه وعملتي كوبي بيست للمقطع ده في الموضوع العلاني اللي مفتوح هنا .. كنتي إنتي وفرتي الوقت ده وكتبت جمله ولا إتنين في الرد ويوصلوا نفس المعنى برده... أنا وجهة نظري هنا في موضوع الوقت بس
الحلقه الثامنه ... موضوع دادا سلوى ده ..مؤثر قوي.... يارب إكرم كل بنات المسلمين يارب
الحلقه الثالثه عشر ... كويس أوي إنك حافظتي على المبدأ ومتأثرتيش بكلام شوشو اللعين ... لأن الإنسان في الدنيا ديه عايش وبيتعامل معاها بناءا على المبادئ اللي إتربى عليها ..
بس 14 حلقه فيهم معاني كتير وقصص مؤثره
لو مصر عملت الموضوع ده ... حايطلع من عندنا عباقره كتير زي زويل وأحسن كمان
والله الشعب المصري ده .. لو إتوظف صح .. هايبقى احسن شعوب الأرض
[quote=abdelaziz-waleed;240763]
الدول بتدي منحة تفرغ لما تلاقي الشخص مبدع وهايفيد الدولة ويستاهل هذه المنحة
[/quote]
والله في ناس كتير عباقره ومبدعين في كليات مصر ومافيش حد لا بيبصلهم ولا بيعبرهم .. شئ حزين جدا
الموضوع ده فيه عصير خبرات كثير من الناس في المنتدى في الحياة.. يا ريت باقي الناس يفيدونا بخبراتهم عشان نفيد بعض و نستفيد :)
:(:(:(
*ترتسم على وجهى علامات الندم ..... كمن فاته القطار الذى لم يأتى للمحطة بعد :confused:.
:(
عارف يا أستاذ محمد شعور الواحد لما يروح محطة القطار و يشعر إنه القطر فاته و يقعد يحاسب نفسه و فى نفس الوقت هو على يقين أن القطار لم يأتى بعد للمحطة .... شعور غريب و متخبط لكن ده هو نفس الشعور اللى حسيته لما قريت التلات صفحات بتوع الموضوع ده.
قصص مشرفة قريتها و ناس بنت نفسها صح ... و تذكرنى بنفس القصة التى يحكيها لى والدى من إنه قد بدأ بحجرة مؤجرة و وجبة واحده فى اليوم فى بداية عمله فى القاهرة إلى أن وصل إلى ما نحن عليه -الحمد لله- الآن ...
هذه الأمثلة تجعلنى أتسأل .... لماذا لم أعيش مثل تلك الحياة .... هل هو تدليل أبى و خوفه من إنى أشوف نفس اللى شافه من مصاعب ؟ أم هو كسل منى و تخاذل لأن الشغل مش هييجى لغاية عندى؟
مش هلقى اللوم على حد غير نفسى ... أنا أخدت النصايح كتير إنى المفروض أتعلم معنى العمل من صغرى و كانت قدامى الفرص كتيير .... لكنى كنت بتكاسل كل مرة.
حتى الآن أوهم نفسى أن القطار فاتنى .... و أنا عارف إن لسه قدامى فرصة أبدأ و أتعلم لكنى لا أعرف الطريق ... فأرجوكم تقولولى نصايح و أبدأ إزاى و هل شرط أبدأ من الصفر؟ ... حتى لا أخذ ذلك أيضاً حجة لى لمزيد من التكاسل .... الرغبة موجودة عندى لكن مش عارف أشتغل إيه و إزاى ..... مش هقدر أعمل زى ما حضراتكم إبتديتوا لظروف حضراتكم أكيد عارفينها .... لكن أكيد فى طرق تانية أبدأ بيها.
قولوا إقتراحاتكم علماً بإنى عندى 19 سنة و داخل على العشرين و فى كلية طب و الصيف ده عندى مادة مأجلها فى الصيف أذاكرها براحتى لأنى كنت مهملها طول السنة و لو كنت إمتحنتها مكنتش هجيب مجموع حلو.
تحياتى و تقديرى لكم :)
انت قريت 3 صفحات بس من ال 9 صفحات؟؟؟ امال فين الباقي يا دكتور ميزا ؟ :)
طبعا تقدر تبتدي .. ما دام عندك الرغبة
المرمطة (آسف للفظ) هي اللي بتعمل الرجالة.. وكفاية إنك بترتب المواد عشان تحافظ على التقدير
لو تقدر تنزل تدريب في اي حتة (حتى لو مش هاتتعامل كدكتور) انزل
عشان لما تشتغل تبقى عارف اللي تحت إيدك بيعمل إيه وتبقى فاهم كل حاجة
يا ريت تشرح اكتر إيه الفرص المتاحة (حتى اللي في دماغك) لنشاط صيفي في مجال العمل.. ونفكر سوا.. دي أكبر فايدة للموضوع .. وأهم فايدة للأصدقاء في المنتدى
شوف إيه المتاح ليك.. ونفكر كلنا سوا
تقبل احترامي وتشجيعي
أنا مزود عدد الردود فى كل صقحة من لوحة التحكم .... فالموضوع مقسم عندى على 3 صفحات.اقتباس:
انت قريت 3 صفحات بس من ال 9 صفحات؟؟؟ امال فين الباقي يا دكتور ميزا ؟ :)
ما هو أنا عاوز المرمطة دى .... أنا عارف إنها هتفيدنى أكتر من إنى أكون متدلع و مستريح فى الشغل.اقتباس:
المرمطة (آسف للفظ) هي اللي بتعمل الرجالة..
لا إنتا فهمت غلط :D.... أنا التقدير وقع منى فى السنتين اللى فاتوا ... فمش بفكر فى تقدير على قد ما بفكر فى كيفية الإستفادة من سنين الدراسة على قد ما أقدر ... مش مجرد نجاح و بعد كده أنسى كل حاجة .... فالمادة اللى سيبتها تعتبر حاجة أساسية جداً فى الطب ....أنا كان ممكن أضغط على نفسى و أخش و أنجح و خلاص .... لكن عاوز أستفاد من المادة كلها أكبر إستفادة ممكنة.اقتباس:
وكفاية إنك بترتب المواد عشان تحافظ على التقدير
فكرت أنزل المستشفى .. و أهو أفهم المواضيع ماشية إزاى ..... لكن طلع إنه مش هينفع ... لأن فى حاجات لازم أكون عارفها و دارسها الأول عشان أستفاد ... كده مش هتعلم حاجة .. أو هتعلم بس حاجات قليلة قوى.اقتباس:
لو تقدر تنزل تدريب في اي حتة (حتى لو مش هاتتعامل كدكتور) انزل
عشان لما تشتغل تبقى عارف اللي تحت إيدك بيعمل إيه وتبقى فاهم كل حاجة
كمان أنا عاوز حاجة بعيدة عن المجال شوية ...
ممكن أشتغل فى صيدلية بس مش برجح قوى لأنى مش بحب وقفة الصيدلية ... أو مثلاً شغل تجميع كمبيوترات (ده بقى بحبه جداً) . لأنى أعرف كتير فى موضوع الهارد وير ده .... أو ممكن صيانة كمبيوتر .. أنا كنت بفك الكميونر الأولانى حتة حتة كل شوية ... حتى أى أجهزة عندنا لازم أفكها و أعرف إيه جواها ... لدرجة إنى كنت هتجنن و أفتح عداد الكهربا :D.. لكن لحقونى على أخر لحظة.اقتباس:
يا ريت تشرح اكتر إيه الفرص المتاحة (حتى اللي في دماغك) لنشاط صيفي في مجال العمل.. ونفكر سوا.. دي أكبر فايدة للموضوع .. وأهم فايدة للأصدقاء في المنتدى
عامة لو عاوز تعرف أنا مغرم بإيه .. هقولك أى حاجة فيها مسامير بتتفك .. بحس إنى بفتح كنز و أنا بفتح الجهاز ..... أو ممكن أى إقتراحات تانية عادى ...
شكراً على تشجيعك أستاذ محمد :)
وتقوللي مش عارف... مش عارف مين يا عم انت ؟؟ :) :) :)
انت حطيت إيدك أهو على اللي انت بتحبه وممكن تغوص فيه
يتبقى سؤال.. مسامير إيه اللي تحب تشتغل في فكها (كمهنة صيفية).. يعني مثلا سيارات.. ولا أجهزة كهربائية (تليفزيونات.. ريسيفر دش..) ولا إيه ؟؟؟
أنا بحاول احطك على الباب اللي يناسبك.. اتمنى إن باكون باساعدك فعلا بالتفكير بصوت عالي.. وياريت بقية الإخوة هنا يشاركوا معانا بآراؤهم (تقدر تدعو الناس عن طريق الرسائل الخاصة إذا حبيت)
بانتظار الرد
أنا ملاحظ إن دى بالفعل أكثر الهوايات إنتشارا بين الأطباءاقتباس:
عامة لو عاوز تعرف أنا مغرم بإيه .. هقولك أى حاجة فيها مسامير بتتفك .. بحس إنى بفتح كنز و أنا بفتح الجهاز .....
وأبشرك أنك هتكون جراح وتمارس هوايتك فى فتح وتركيب وإصلاح الأجزاء الآدمية المعطوبة
أحب أبشركم بخصوص الموضوع ده .. إنى مبقتش عاطل anymore :victory::002:
شكراً جزيلاً على مساعدتكم خاصة الأستاذ محمد عبد الجواد :flowers:
إحم ...
الحمد لله الأول دورت على حد يدلنى على حاجة أشتغلها .... معظم أصحابى فى الكلية اللى بنفس حالتى إقترحوا صيدلية ... بالفعل نزلت أسبوعين و إتعلمت حاجات كتير ... بس زهقت بصراحة بعديها ... حسيت إنها مش شغلتى.
بعديها كان فيه كورس للفوركس ... و إبتديت فى الموضوع ... بس لسه قدامى كتير قوى عشان أتعلم كل حاجة ... لسه الموضوع طويل يعنى ... بس ماشيين فيه.
فى الوقت الحالى بشتغل شغل كمبيوتر ... Graphics و Designing و كده ... و الحمد لله الواحد مستمتع جداً بوقته بدل ما يضيع فى حاجات فاضية.
الشغل ده فكرته إنه هيعطلنى عن المذاكرة و الكلية .... لكن العكس هو اللى حصل .. بقيت أذاكر من غير ما يكون فيه إمتحانات .... سبحان الله ...:biggrin24:
أحييك طبعا على الخطوة الجميلة دى وفعلا الشغل مش بيعطل عن المذاكرة بالعكس فى معظم الأحيان بيدفعك لتنظيم وقتم بأفضل الطرق فاعلية
ربنا يوفقك
اقتباس:
اولا انا بشكر اخويا محمد عبد الجواااد ( Goodle ) على دعوتي هناااا ..
ثانيا .. انا ناوي ان شاااء الله اني اجنب ابني كل المعاناة اللي قابلتها انا في بداية حياااتي لحد ما ربنا كرمني وبقيت مليونير ..( بجيبلكم من الآخر ) .. :)
حتقولولي طيب ده لازم يتعلم الاعتماد على النفس ويتعب شويه عشان يقدر يكافح في الدنيا لوحده لما يتخرج من غير مساعدة ابوه .. حقول كل ده جميل .. بس السؤال هنا هو ليه لازم لما يتخرج يشتغل و يكااافح ويشقى .. ليه ما اعملوش زي الدول ما بتعمل للمبدعين ما يسمى ب ( منحة تفرغ ) .. يعني الدوله بتوفر للمبدع كل متطلبااااته الحياتية ودعم مادي قوي عشان يتفرغ هو لفنه او ابحاثه كل حسب تخصصه
انا كمان ان شاااء الله حخليه يكمل في مسيرته الاكاديميه من ماجستير ثم الدكتوراه ويركز تماما في المسار ده وما يشيلش هم الشقه والعربيه ومصاريف الجواز وحتى الدخل الشهري كمان .. وحيفضل عنده وقت اهم .. ممكن يوظفه لخدمة دينه .. او تثقيف نفسه .. او حتى يلف العالم ياسيدي هو حراااام يعني .. :)
اتمنى لو اعرف رأيكم في تصوري المختلف ده ..ولكم كل الحب والتقدير ..
انا والدي نفس تفكيرك ده بالضبط
انا نفسي اشتغل موت
بس دايما والدي بيمنعي ويقولي ركز في دراستك
واحنا مش محتاجين لشغلك والحمد لله
واحيانا يقولي لو فضيت ابقى اشتغل في حاجة تفيد تخصصك
جربت اروح للمستشف هما اسبوعين والسلام لاني اكتشفت اني معنديش base كافيه لذلك
والعمال اللي عندنا عاوزين حد يشرف عليهم
آه انا نسيت اقولكم ان
احنا وللاسف مصابين بلعنة جامدة قوي :k28:
اسمها لعنة العمال:smash:
صيف (ودا اساسي) وشتا
صدقوني مبيخلصوش(بتسكين الخاء وبفتحها ايضا)
و لان والدي مبيثقش في المقاولين
فكل اجازة نقضيها مع العمال
ولما من ساعة مادخلتالطب كنت كل سنه بأجل مادة او اتنين علشان اجيب فيه تقدير عالي
فبقيت مشغول بالدراسة علطول والسنه الوحيدة الي قررت اني اخد فيها اجازة علشان نفسي اشتغل بجد ... الجماعة قاللي اشتغل عندنا مقاول !!!
بس بصراحة الشغل مع العمال ده مقرف ومتعب جدا جدا:K15: (ربنا يكون في عون المهندسين) فرضيت..... مهو انا كده كده حشتغل معاهم .. فاشتغل بمقابل احسن
صحيح الواحد بقى عنده خبرة كبيرة في التعامل مع مختلف انواع العمال والسماسرة
وفي بيع وشراء الأراضي وتأجير الشقق
بس حاسس ان كل ده علشان ده عندنا فكده كده كنت لازم حتعلمه
انا عاوز شغل اشتغلي فيه بنفسي لوحدي واكون نفسي بنفسي
مش اعتمد على مساعدات خارجية:blink:
انا اشتغلت فترة في الكمبيوترات الاوريجينال المستوردة (used)
وكونت منها مبلغ اشتريت بيه حاجات كنت عاوزها منها اللاب توب اللي بكتب منه دلوقتي
بصراحة مفيش طعم للفلوس اللي متعبتش في مجايبها...
وكالعادة
والدي ضغط عليَ لحد مبطلت.:k30:.(الناس حتقول ايه .. انت محتاج... اقف مع العمال..)
بس اعمل ايه انا بحب الشغل تحتى
انا فاكر ان وانا في ابتدائي كان نفسي اشتغل برده فكان بعض زملائي بيجيبوا عسلية من المصنع اللي جنب المدرسة ويبيعوها للفصل
فقلت اما اعمل كده انا كمان
لماعملت كده اتمسكت قبل ما ابيع حاجة اصل بطمن على البضاعة في الشنطة :ANSmile13: والمدرس قعدوا يقولي انته مش محتاج يابني انته انته....الخ
فقررت اني معملش حاجة في المدرسة تاني
انما بقى اشتركت في الكشافة لأني حسيت فيه بنفسي :k46:
على فكرة انا والدي ووالدتي واخويا الكبير دكاترة وعلشان كده هم عوزيني ابقى احسن منهم بس انا شايف ان ده مش مبرر لعدم الشغل :k26:
طبعا بيقولولي احنا حنعمل مستشفى وابقى اشتغل فيه
انا رأيي ان في الشغل الانسان بيحس بنفسه وبكيانه ....
واي راجل بيبقى حيموت لو مشتغلش
.... انا بحب الادارة والمحاسبة وناوي آخذ دبلوم ادارة مستشفيات من كية التجارة بعد مخلص تكليف
طبعا انا مسستم نفسي على اني مليش قعاد هنا غير علشان آخد خبرة بس واسافر على برة...... تحتى التخصص اللي ناوي آخده مش ماشي في مصر
لكن مطلوب جدا بره (طب الطؤارىء)بس ده طبعا بعد عمر طويل
ودي الحاجة الوحيدة اللي والدي بيشجعني فيها
وبعدين انا اصحابي اللي في قد سني بس في كليات تانية اتخرجوا واشتغلوا وفيه منهم اللي حيتجوز قريب جدا
انتو ايه رأيكوا .... يبقى انا غلطان
معلش الموضوع مش مرتب بس انا كنت كل ما افتكر حاجة اكتبها
:k10: وتحياتي للجميع:k10:
يا جماعه الموضوع ده بجد جميل جدااااا و مفيد جدااااااا و فيه كميه قصص كفاح روووووعه و تستحق القراءه اكتر من مره
و كمان فيه اعضاء قدام محدش بقى بيشوفهم
تحيه لكل اللي اشتغل من بدري انتوا فتحتوا نفسي للشغل
تحيه للدكتور احمد عبد الغني على الموضوع
انا عارف ان الموضوع قديم بس قلت ارفعه عشان نستفيد منه كلنا :)
انا لما روحت البلد السنة دي وشوفت اطفال من سن 10 سنين وطالع بتشتغل ورجالة ويعتمد عليهم حسيت بغيرة بصراحة ماشاء الله عليه ونفسي ولادي يبقوا زيهم
مش طول الاجازة جيمز على الكمبيوتر حتى النادي مرضوش ينزلوه السنة دي يكملوا تدريبات السباحة او يشتركوا في اي نشاط تاني
لولا اني مكنتش مستقرة الاجازة دي مكنتش سيبتهم يضيعوا الاجازة كدة
الصراحة الواحد حاسس إنو صغير أوي جنب الكفاح دة كل و متدلع أوي ......يعني الحاجة الحج و الحاجة علموهلي اني مبقاش مصرف و الحمدالله أهو لم الواحد يجي يشتري حاجة يلف ستين مرة أبل مايشتري
الله يكرم اللى نشّط الموضوع العزيز ده ..كنت دورت عليه من فترة وفشلت تماما فى العثور عليه فشكرا للجميع
طب و اللي لقى نفسه متدلع و كل حاجة بتجيله عالجاهز يعمل اية في اهله بقى !؟؟
جميل الموضوع أول مره اشوفه :)
فكرني بحاجه ظريفه وانا في أولي اعدادي كنت بشتري استيكرات جمله وابيعها في المدرسه بالواحده لحد ما مره والدي شافني قاعد اعد الفلوس قالي بتعمل ايه وحكيتله .. نصحني بدل ما باخد الارباح باستمرار اكبر الشغل واجيب حاجات اكتر وكده .. وقد كان
اشتريت بكل الفلوس اللي معايا استيكرات .. بس مكنتش واخد بالي ان السنه خلصت ههههههههههههه وبقيت مش لاقي خرم في أوضتي الزق فيه استيكر كله اتغطي ههههه