طنابير جديدة علي 13000 كيلو ..
تم تغيير الطنابير ........الحمد لله
السبب غربلة خفيفة جدا احيانا علي السرعات العالية مع التهدئة ..... مش قبل ال 140 و مش مع الفرامل الجامدة
السلام عليكم يا اخوة .....
الحمد لله ... رحت ابوغالي طمان باي -ربنا ما يقطع لنا عادة- ... كنت هناك الساعة 8:29 قبل معادي بدقيقة لان الحمد لله اخوكم من زوي المواعيد الدقيقة للغاية .....و يا سلام علي المهزلة ....
كنت واقف في طابور و انا تالت عربية برة البوابة ... و ورايا ما لا يقل عن 5 عربيات سدين الطريق ... و بكل فكاكة البني ادم المصري لقيت واحدة مزة- ملهاش وصف تاني للاسف- جت حشرت نفسها بعربية لانوس جنبي يمين و بعدها شاب سنتيح علي يمينها .... قال ايه بقي و بكل بجاحة الدنيا لما جيت ادخل ابوها يقولي ان الدور عليها .... قمت و علي وشي ضحكة من الودن للودن قايلة طب وسع يا بيه و اديتها بنزين و هكذا اللي ورايه و ابوها قعد يحلف كدب الراجل الوحش ان هيه اللي عليها الدور ......
بس كلمة الحق تتقال .... مسؤلي الاستقبال ادوهم علي دماغهم و دخلو الطابور بالترتيب -فعلا يستحقوا تصقيفة- و رفضوا استلام السيارات الغير حاجزة مواعيد الا بعد استلام العملاء الحاجزين ......
المهم الراحل بتاع الاستقبال كان متعكنن من الفوضي و كان ناسيني ... سألني صيانة كام حضرتك ... قولتله طنابير ان شاء الله ... افتكر و ضحك و قالي ياه.. اسف معلش حضرتك شايف .... قولتله ولا يهمك و ربنا في العون ....
قالي حاجة تاني .... قولتله بص انا عايز اشيك علي زيت الفتيس ... اطفي لمبة الصيانة ... اربط عفشة كاملة ...اراجع علي مساعدين امامية علشان احيانا لما محود يمين و اجي ارد الدركسيون بسمع انه خفيفة-" انا متأكد انها جلب متربة مش مساعدين بس رخامة بقي مهو حقي ولا ايه؟؟؟"- غير تغيير الطنابير ... ويا ريت بعد اذنك لو نشوف وصلةالشكمان جت ولا لا....
الراجل كتب تقرير الاستلام و هبا قام راح مخزنهم و رجع قالي طنابير موجودة و هتركب بس الشكمان لسة للاسف ....
قلتله خلاص توكل علي الله .....
خدوا العربية رفعوها الساعة 9:30 .... كانت خلصانة 11:00
رحع قالي زيت الفتيس تمام .. العفشة اتربطت .. المساعدين مفيهمش الهوا و الطنابير ركبت-" انا شفتهم بيفكوا و يبعدو الطنابير القديمة و بعدين راحوا استلموا الجديدة و ركبوها"-
المهم ادور لقيت لمبة الصيانة لسة ... نديت علي كبير المهندسين قالي لحظة ... دخل ضغط علي الزراير بتاعت العدادات اول ما دور و لقيتها طفت .....
خلال فترة عملهم سألت مهندس هل متوفر تيل قديم علشان اقدر اخدفردة و ادور علي حاجة نضيفة بدالها ... قالي والله حضرتك معنديش ... قولتله طب هية زي ال 516 ... قالي حاجة عجيبة جدا ....قال ايه ان في عربيات من نفس الموديل بس موديول الفرامل مختلف ... و ذكر ال 213 و قالي ان فيه 140 عربية فراملهم غير الباقين ... فلازم استني مع اول تغيير و يا اما اخد فردة و اشوف زيها اي نوع نضيف يا اما بعد ما اغير اشتري و اغير تاني ......
المهم انا اصطدت الفني الصغير اللي شغال و سألتة ايه نظام التيل اللي راكب ...قالي تمام و لسة ملحم "مليان لحم" قمت قلت لكبير الصيانة انا بس عايز احافظ علي الطنابير الجديدة بدل ما تجيب ريجة و تتغير تاني .... قالي يا باشا كله في الضمان و تحت امر حضرتك ......
خدت امر الشغل و رحت للخزنة... اداني تصريح خروج من غير مدفع شلن و مكتوب عليه "ضمان"
رحت خدت العربية و خرجت... فراملها بقت ايه ... علي الشعرة .... احري علي 30 40 50 و المس الفرامل ...تقف ...بس حسيت بحاجة غريبة .... هوه ال abs راح فين؟؟؟؟؟؟ يكونش وقع .....
قلت يا واد جرب الاول ان بعض الظن اثم ....
60 70 80 فرامل ... العربية بتفرمل جامد لدرجة اني اول مرة اسمع العجل بيصفر علي الاسفلت .....بس برضة مفيش abs ...
اه يا ولا الذين ... Abs ييييييييييييييي باااظ ولا ايه .......
ركز يا هيما .....
افتكر يا هيما .... هوه بيشتغل امتى؟؟؟؟؟؟ في حالة الفرملة المفاجأة .... طب ليه؟؟؟؟؟ لما عجلة تزحف و عحلة لا .... يعني لازم يشتغل لو في مياه او رمله ......و علي سرعة و فرامل مفاجأة ...
طب اجرب في مياه؟؟؟؟؟ لا حرام نترطش الناس و نوسخ العربية دي مش ناقصة وساخة ....
طب استحمل ياد و امشي و ربك يكرم و لو باظ نكلمهم نطلع عنين ابوهم .....
المهم جيت تحت الكوبري اللي بيجيب من جوزيف تيتو لطريق الاسماعيلية و فيه حارة تحتيه مقفولة و كلها تراب .... سميت الله و قلت يا يشتغل يا تتزحلق و نرشأ في الرصيف ..... هوبا لقيت احلي زقزقة و ترفيص ولا بطن اجدع قطة تدوس عليها ..... الله اكبر ... و حشتني يا عم ال abs..... فينك يا جدع ....
الحمد لله ... الطنابير مخلية العربية فراملها تحفة في كل الظروف ......
دوشتكم معايا ...... ربنا يديم عليكم الستر و الصحة
اتمسوا بالعافية ... انا عارف ان احنا الصبح بس انا منمتش من امبارح و داخل انام علشان كدة بقول اتمسوا :)
السلام عليكم
