هل ممكن تحويل شاهين كرباتير الى انجيكشن ؟

**amr123** · 19-02-2008 11:22 AM

السلام عليكم جميعا ...اعضاء النتدى المحترمين

انا عندي شاهين 1600 موديل 93 (شاهينواي قديم :) )
وعندي فيها مشاكل في الكربراتير بتعها ز فا كنت عايز اعرف هو تمنه كام جديد و استيراد

و سؤال اخير ؟ هو ممكن تحويل سيارة تعمل بالكربراتير الي حقن الكتروني عامة ؟
و اذا كان ينفع .. هل ممكن في الشاهين و فين ؟

و شكرا لكم مقدما

**mig44n** · 19-02-2008 07:18 PM

عموما ينفع تتحول انجيكشن.....بس خليك فى الكربراتير (ومش معنى انه فيه مشكله او بيتسد بسرعه من الاتربه والبنزين يبقى وحش)..... بالنسبه لسعر الكربراتير فاكيد الى عارفه هيقولك وبالنسبه لمكان تحويل الكربراتير لانجيكشن فبرده واحد هيقولك......
الانجيكشن لازم تغير وش السلندر علشان تتحول العربيه من كربراتير لانجيكشن(على ماعتقد)............

**fiatmomo** · 19-02-2008 07:30 PM

المشاركة الأصلية كتبت بواسطة amr123

السلام عليكم جميعا ...اعضاء النتدى المحترمين

انا عندي شاهين 1600 موديل 93 (شاهينواي قديم :) )
وعندي فيها مشاكل في الكربراتير بتعها ز فا كنت عايز اعرف هو تمنه كام جديد و استيراد

و سؤال اخير ؟ هو ممكن تحويل سيارة تعمل بالكربراتير الي حقن الكتروني عامة ؟
و اذا كان ينفع .. هل ممكن في الشاهين و فين ؟

و شكرا لكم مقدما

الموتور الى عندك مختلف عن الشاهين ال1600 الانجكشن ..... فمعتقدش انك ممكن تحوله انجكشن .. والله اعلم

**sab3aawy** · 19-02-2008 07:34 PM

الشاهين الإنجكشن فيها نفس وش السلندر بتاع الشاهين الكاربراتير، وحتى مانيفولد الدخول هو هو بدون اختلاف لأنها تعمل بنظالم الحقن الفردى وليس الحقن متعدد النقاط

وعلى ذلك التحويل للإنجكشن لن يستلزم تغير وش السلندر، لكن ده لا يمنع انه برضه هيكون شغلانة كبيرة، لأنك اولا هتحتاج الثروتل بادى بالرشاش ، وهتحتاج تغير عمة فلتر الهواء وهتحتاج كارتة ال Ecu وحتحتاج مجموعة الحساسات اللى انا مش عارف هم كام واحد فى الشاهين لأنى ماحتكيتش كثير بموديل الحقن الإلكترونى منها وهتحتاج تعمل ضفيرة الكهرباء للكلام ده كله وهتحتاج واحد خبير يعمل لك الشغلانة دى لأنك غالبا هتكون اول واحد يعملها فهيتجرب فيك، وبصراحة انا متوقع انه هيكون فيلم هندى، ولذلك لا انصح بهذه القصه إلا لو انك غاوى تتعلم وتجرب

لكن بالنسبة للكاربراتير اعتقد انك ممكن تلاقيه جديد فى التوفيقية او عند الكيلانى فى شارع معروف ، وممكن كمان فى معرض شركة النصر اللى ورا جراج الجمهورية فى وسط البلد، او فى شركة النصر نفسها فى وادى حوف، الإستيراد ممكن تلاقيه فى عزبة شلبى

**Xpert** · 19-02-2008 07:34 PM

بص يا سيدي ... اولاً خليك مع الكربراتير زي الاخوه ما نصحوك .. بس ..
هاتجيب الكربراتير .. نوعه weber .. و يكون ايطالي .. هاتجيبه من واحد بتاع قطع غيار استيراد .. بتاع ال 131 .. و ممكن بتاع الريجاتا يركب و يشتغل .. الكربراتير النضيف الاستيراد نمره واحد يتراوح سعره بين 250 - 300 جنيه .. لو انا هاجيبه من بورسعيد عشان اضمن انه يكون استيراد (الضحك علي الدقون كتير) ..

**sab3aawy** · 19-02-2008 07:40 PM

معلش ، اضافة بسيطة تحريا للدقة الفنية، الشاهين اللى وش السلندر بتاعها نفس وش السلندر بتاع الشاهين الإنجكشن هى الشاهين من 1997 وطالع (موتور التمبرا اللى بكامة علوية-المكنة الفضى) لكن الشاهين بتاعتك موتور 131 (مكنة سودا) ودى تختلف تماما عن الماكينة اللى راكب عليها الإنجكشن وده هيعقد مسألة الإنجكشن اكتر

بالنسبة لحكاية كاربراتير ال131 او الريجاتا هو هيركب على الماكينة لكن مش هيركب على العمة بتاعتك بس انت ممكن تاخد وش الكاربراتير القديم بتاعك وتركبه على الكاربراتير الإستيراد وتركب عليه العمة بتاعتك

**eng_mkhalaf** · 20-02-2008 12:47 PM

الله ينور يا سبعاوى - مشكور

**amr123** · 20-02-2008 04:22 PM

الي استاذ سبعاوي و جميع الاخوة

شكرا جزيلا لكم ....كده انا اقتنعت انه ملوش لازمة التغير .. انا بس كنت مهتم افهم منكم ..في الواقع انا مش من هواه تغير انا بحب الحاجة كده على بوها زي ما بيقولو ....

ده الواحد يشتري كربراتير زيرو جديد اريح من كل القصة دي

و شكرا ليكم جميعا