الموضوع: كل البيتالزاوية يخشو: مطلوب المشاركة من الجميع "" تظبيط بيتلز من الالف الي الياء ""

وعليكم السلام ورحمة الله وبركاته

اهلا بيك بين محبي البيتلز

انا نفسي زيك بالظبط اظبط العربية واخليها زى عربيات الاجانب
بس المشكلة ان الصنيعية جابولى عقدة مبالغ كبيرة وعدم التزام بالمواعيد وشغل اى كلام

انا جايب العربية محتاجة شغل كتير علشان اوضبها بمزاجي

بس ماشي بيها مؤقتا لحد ما افضلها والاقي حد كويس اتعامل معاه

ياريت لو تعرف حد عامل تعديل جامد في الشكل تعرف عامله فين وتقولي

اهلا بيك مرة تانية

----------------
محمد سالم

بيني و بينك مفيش اي ميكانيكي بيتلز اقتنعت بية لحد دلوقتي بالرغم من انهم ممكن يظبطو العربية احيانا بس زي ما قلتلك نظام حافظ مش فاهم
اما بالنسبة للتظبيط انا شفت واحد عامل تظبيط بسيط بس في نفس الوقت جامد جدا مديها ازرق ميتالك علي جنوط اسبور و ضارب التفييمة شكلها بصراحة من الاخر و دة ممكن ابقي اعملة في عربيتي

بس الفكرة في المواتير اللي بتتسقطلها انا بشوف الاجانب بتعقد و بتحسر علي الصنايعية اللي في مصر اللي فاكرين نفسهم فاهمين

المشاركة الأصلية كتبت بواسطة ابوهاشم

انا هتكلم معاك بكل صراحه
بما نى كنت امتلك سيارتين بيتل بالتناوب
العربيه دى عباره عن تحفه فنيه واللى صممها
كان عبقرى بكل المقاييس وتقريبا ماسابش فيها غلطه واحده
وطالما قولنا تحفه فنيه يبقى اى تعديل فيها هيفسدها
وزى مانت قولت ان العربيات اللى عدلو شكلها زى النيو بيتل
كانت فاشله وبوظت شكل العربيه
بالنسبه لموضوع الكاوتش علشان الثبات
انا كنت مركب كاوتش عريض وعلى قد ماكان بيدينى ثبات اكثر
على قد ماكان بيبهدل العفشه وعلبة الدريكسيون
وبالفعل انسب كاوتش للبيتل هو الرفيع الاصلى بتاعها
يخلى العفشه مرتاحه وتحس ان الدريكسيون باور
يبقى نرجع للاصل ونقول ان واحنا بنشترى البيتل
نحاول بقدر الامكان اننا ندور على عربيه مش متهانه وحالتها ممتازه
وصدقنى موجود كتير بس السعر هو اللى بيكون عالى
انت ممكن بدل التغييرات اللى بتقول عليها والمصاريف دى كلها
تدور مثلا على 1303 بحاله ممتازه وموتور 1500 وعفشة العربيه دى
مريحه جدا ومشابهة لعفشة المرسيدس
دول الخليج بتجمع العربيات دى حاليا وبتشتريها من عندنا بس بطبيعتها
والله انا اول عربيه كانت معايا كانت موديل 1952 وحالتها كانت ممتازه
ولما عرضتها للبيع اتصل بيا ناس من الامارت ودبى لشرائها باى ثمن
ومهما كان مبالغ فيه بشرط تكون العربيه بشكلها الاصلى ومش متعدل
اى حاجه فيها وطبعا كان متعدل فيها كتير واتباعت هنا برخص التراب
حتى الطاره لما غيرتها وجبت الطاره بتاعت الجولف علشان صغيره
اكتشفت ان الاصليه الكابوريا كانت تحفه وافضل فى الشكل والاداء
انا قولتلك مجرد رأى ونابع من تجارب
ولو انا رجعت دلوقتى اشترى بيتل تانى مش هعمل غير كده
انى اجيب عربيه مش متعدل فيها اى شئ
يمكن التعديل الوحيد اللى كان ايجابى معايا
هى تجربة تركيب اشعال الكترونى فى الاسبراتير يغنى عن
الابلاتين والكوندنسر غير كده مافيش
وتقبل تحياتى

بصراحة كلام حضرتك ممتاز و لا غبار علية
بس الفكرة ان مثلا في ناس بتسقط مواتير نفترض مثلا الجولف زي بتوع مكروباصات الهرم
المزايا
السحب بيكون احسن
تكنولوجيا الماتور بتكون احسن
سعر الماتور ال 1300 او حتي ال 1600 ارخص بكتييييير من ال 1500 بتاع البيتلز مثلا
استهلاك البنزين اقل كتير
و في ناس عملاها سواء برا مصر او المكروباصات
انا بصراحة معاك في كل اللي بتقولة لكن في جزئية الموتور لية مغيروش بحاجة احسن مدام حاجة مجربة قبل كدة
و انا كمان سمعت عن ناس مسقطة مواتير بورش في مصر كمان
ففكرة الموتور مش وحشة لكن فين اللي هينفذ صح ؟
و لا اية رأيك يا استاذ ابو هاشم ؟

معلش يا استاذ ابو هاشم ... انا طبعاً شايف كلامك صح بس ايه هي الحاجات اللي المفروض تتعمل قبل ماتشتريها علشان ماتكنش مقلب و ايه هي اللي تتعمل بعد ماتجبها

و انا عن نفسي شفت واحده هتجنن عليها 1303 s السبور جامده جداً فبريكه بس مش عارف اتكلم مع صاحبها ازاي اقله يعني انا عايزها !!! و افرض وافق و كشفت عليها طلعت اي كلام !!!!!