الموضوع: تقرير صيانة العشرين الف للفانتازيا في غمرة

رحت يوم السبت اللي فات 26/6/2010 لغمرة عملت صيانة العشرين الف (فانتازيا مانيوال) واليكم التفاصيل:

في تمام الساعة 8:55 صباحا وصلت التوكيل (بعد دوخة علشان قفلت الاتوستراد) ، لقيت قدامي عربيتين بس برة التوكيل فرحت جدا مفيش خمس دقايق وكنت جوة (بس لما دخلت عرفت انهم اخدوا العربيات من 8:30 الصبح) علشان الزحمة ميش كتير برة .. المهم كمان عشر دقايق وجالي المهندس قالي هتعمل اية قلتلة صيانة العشرين الف واشتكتلة من شوية حجات قالي هنبص عليها .. وقال على فكرة احتمال نغير تيل .. قلتلة اشمعنا دي عملة عشرين الف ومانيوال ميش اوتوماتيك قلي لا ملهاش علاقة .. قلتلة هي الصيانة هتتكلف كام قلي حوال 800 وشوية قلتلة طب والتيل تمنة كان قلي الامامي 520 جنية والخلفي ذية ، المهم قلتلة لا معليش اكشف بس علية وقلي حالتة اية قالي ماشي (بصراحة لاني مكنش معايا غير 1200 جنية لاني قلت الموضوع ميش هيعدي ال600 جنية) .. المهم قلي هتتاخر شوية لان في عربيات كتير جوة .. قلت طيب وسبتة.
طبعا كنت مظبط نفسي وجايب كل الجرايد المتواجدة في السوق وقلت اازز فيها براحتي .. طلعت الاستراحة الظريفة بتاعتهم كانت مرشقة ناس وكانوا مشغلين فيلم حين ميسرة (ولانة فيلم هادف ومحترم .. فضلت اني اقعد على جنب اقري الجرايد) .. المهم ساعتين واتصلوا بيا قالوا ان فلتر التكييف ضايع نغير ولا ننضفة هواء وخلاص .. طبعا سالت هو التمن كام قالولي 105 جنية .. (بحسبة بسيطة في دماغي قلت 800 + 105 لسة معدتش ال 1200 ) .. قلتلة خلاص غير .. وسالت اخبار التيل اية قالولي لا كويس بس اللي الناحية اليمين متاكل شوية بس شغال.. قلت خير .. قالي بس اعمل حسابك 10000 كمان بالكتير وتغيرة .. قلت ان شاء الله على الصيانة اللي جاية.
المهم وانا هناك قلت اسال على المركز الجديد بتاع المعادي .. قالولي ان شاء الله على اخر السنة لان المقاول متاخر في التسليم.
على الساعة 12:45 لقيتهم بيقوللي انزل حاسب العربية خلصت .. نزلت رحت الخزنة لقيت الراجل بيقلي 659.70 جنية .. طبعا استغربت وفرحت .. قلت افصص الفاتورة
لقيتها :
زيت 4 لتر توتال 230 جنية
زيت 1 لتر توتال 65 جنية (تقريبا)
فلتر زيت 45 (جنية) وحط عليهم 10 % ضريبة
فلتر تكييف 105 (جنية) وحط برضه عليهم 10% ضريبة
مصنعيات 195 (جنية ) (تقريبا برضة)

المهم المجموع : 659.70



يعني لو شلنا فلتر التكييف 105 + ضريبة 10.5 + مصنعيات تركيبة (فرضا انها 25 جنية) يبقي المجموع 140.5 لو شيلناهم من المبلغ الكلي يبقي 519.20 تقريبا ..
يعني الصيانة العادية هتتكلف كدة لاي حد من غير ميغير حاجة
متهيالي دا مبلغ كويس جدا وميش مبالغ فية .. خاصة ان ليا واحد صحبي معاه سيراتو كان بيعمل الصيانة بتاعت العشرين الف بتاعتة في نفس الفترة كلفتة 700 جنية وشوية (ممكن ااقل بسيط يعني 600 وشوية) .. ولما سال هناك على فلتر التكييف قالولة بي 140 جنية.

المهم خلصت واتكلت على الله بس لاحظت انهم معدلوش علامة service now فرجعتهلم تاني .. دخلولها على الكمبيوتر وخرجوها بعد 15 دقيقة (علشان كانوا راجعين من رست بتاعهم).

ملاحظة : العربية ميش مكتومة ذي مكنت ملاحظ بعد صيانة ال 10000 .. ميش عارف المشكلة من عندهم ولا اية.

يعني انطباعاتي عادية عنهم .. ميش ابهار وميش متضايق .. عادي يعني بس مستغرب اذاي المهندس قلي 800 جنية (على فكرة في حد قالي كمان ان تيل الفرامل ميش بي 520 جنية دا بي 300 وشوية بس متاكدتش من المعلومة دي).

بس كدة هو دا التقرير .. واي سؤال انا تحت امركم