Wartsila-Sulzer RTA96-C , اقوى محرك ديزل فى العالم !!

**ganash** · 01-07-2010 03:14 PM

محركات عملاقه فعلا

**Ahmed Nouh** · 01-07-2010 03:36 PM

المشاركة الأصلية كتبت بواسطة د.محمود صلاح

اييه ده .. انا كنت فاكر ان محركات القطارات هي الأكبر والأقوى

محركات القطارات عاديه جدا ومفيهاش اى مواصفات تشد للدرجه , انما موضوع السفن ده ياكل الدماغ

المشاركة الأصلية كتبت بواسطة ahmedtefagad

ودة فى منة استيراد يركب على الانوس ولا لازم اعدل القواعد :):)

ينهاااااااااااااااار بتنجان انا كنت متصور ان متور السفن دية كبيرو حاجة جامدة لاكن مش بالمنظرالمبالغ فية دة ......

حقيقى تسلم ايدك يا باشا على الموضوع

الله يكرمك يا استاذ احمد

المشاركة الأصلية كتبت بواسطة SE_coralsea

عارفين بقي العمرة بتتعمل أزاي في المحركات اللي من النوعية دي ؟؟

أولا .. التعامل بيكون بالوحدة .. يعني (رأس - أسطوانة - مكبس - عمود مكبس - كراسي)
cylinder head - liner - piston - piston rod - big end bearing

كمان المكبس بيكون عبارة عن 3 أجزاء :
tag - skirt - rod
كل وحدة بيتعمل لها العمرة بتاعتها لوحدها و بتتعامل علي أنها محرك مستقل بذاته علي عدد ساعات تشغيل

زمن اجراء العمرة الكاملة ممكن يوصل الي 12 ساعة لو فيه تغيير للقميص أما في حالة وجود مكبس بديل جاهز بدون تغيير للقميص فممكن زمن العمرة يصل الي 6 ساعات لو الطقم مدرب بشكل جيد

أما نصف العمرة (تغيير الرأس فقط) فممكن يتم خلال زمن من (3 -4) ساعات

الطريف بقي أن لو المحرك ده مكون من 9 وحدات مثلا (زي معظم المحركات اللي أشتغلت عليها) فمن الممكن فصل وحدة كاملة عن العمل و تشغيل المحرك بالثماني وحدات المتبقية و هذا بعد عمل بعض الاجراءات و ده بيكون في حالات طارئة نتيجة لوجود خلل بهذه الوحدة

حقيقي الموضوع ده كبير و يتكتب فيه مواضيع و لكنه شيق جدا و كل جزء في المحركات البحرية حكاية لوحده , البحر في حد ذاته عالم أخر له قوانين و أليات تحكمه مختلفة تماما عن الارض و أهم مبدأ فيه هو السلامة safety first و ده اللي أحنا بنفتقده هنا في عالم البر

لو انتوا حقيقي مهتمين بالموضوع ده ممكن أكتب لكم عدة موضوعات عن السفن الكبيرة و تشغيلها و المعدات الموجودة عليها

مع خالص تحياتي
م/ سمير الشهاوي

انا بجد فعلا نفسى اعرف اكتر عن الموضوع ده

طيب الاوناش اللى بتدخل تصين ده بتتثبت ازاى ولا هو بيبقى معمول حسابها ومتثبته مسبقا جوا غرفه المحرك , ده بجانب ان اصلا ازاى قطع الغيار العملاقه دى بتدخل المركب وهى فى الميه وازاى مهمه بالحجم ده تخلص فى الاوقات البسيطه دى وازاى اصلا ممكن يتعمل صيانه فى المحرك وهو شغال والسفينه ماشيه كدا !!!

ياريت يا بشمهندس اول ما وقت حضرتك يسمح بجد تمتعنا بالحديث فى الموضوع ده

المشاركة الأصلية كتبت بواسطة NFS

يا نهار ابيض ايه كل ده, ده ممكن و هما بيصينوه ينسوا مهندس جوه سلندر ولا حاجه.

ههههههههههههههههههههههههه ههههههههههههههههه , وممكن وحياتك ينسو ونش مش بس مهندس

بس على اى حال يعنى ايا كان اللى هينسوه جوا مشكلته لن تتعدى مجرد تشغيل المحرك وهيطلع مع اول فتحه صباب للعادم :) , بس على شكل بخار بقا ويبقى حظه وحش لو الموتور متربن

المشاركة الأصلية كتبت بواسطة Mohamed.Raafat

ليه بس التعقيد ده

هو احنا ناقصين

حرررررررااااااااااااااااا اااام
انا نفسيتي تعبت
انا كنت بس اشوف الموتور 2500 سي سي بتعب
ده 1820000 سي سي
يالهوي

لالالا انت مخدتش بالك , ال 1820000 ده سعه السلندر الواحد انما الموتور كله 25.000.000 سى سى

**Samir Elshahawy** · 01-07-2010 04:16 PM

المشاركة الأصلية كتبت بواسطة Ahmed Nouh

انا بجد فعلا نفسى اعرف اكتر عن الموضوع ده

طيب الاوناش اللى بتدخل تصين ده بتتثبت ازاى ولا هو بيبقى معمول حسابها ومتثبته مسبقا جوا غرفه المحرك , ده بجانب ان اصلا ازاى قطع الغيار العملاقه دى بتدخل المركب وهى فى الميه وازاى مهمه بالحجم ده تخلص فى الاوقات البسيطه دى وازاى اصلا ممكن يتعمل صيانه فى المحرك وهو شغال والسفينه ماشيه كدا !!!

ياريت يا بشمهندس اول ما وقت حضرتك يسمح بجد تمتعنا بالحديث فى الموضوع ده

بالنسبة للاوناش اللي بتستخدم في رفع قطع الغيار بتكون مبنية أساسا من ضمن تجهيزات غرفة الماكينات و هيا كمان بدورها لها برنامج صيانة و شهادات و كشف دوري و هي بتكون من طراز ال bridge cranes

أما قطع الغيار العملاقة دي بتدخل عادي جدا من خلال فتحات موجودة بغرفة الماكينات hatchs بواسطة ونش أخر مثبت علي سطح السفينة

اما عن كيفية انهاء العمرات او الاصلاحات في المدة اللي اتكلمت عنها قبل كده فده بيكون نتيجة أن طاقم الماكينات اللي بيشتغل عنده خبرة بمثل هذه المحركات و مؤهل علي قدر عالي جدا بالاضافة الي أن الصانع لما بيعمل محرك زي ده بيعمل معاه المعدات الخاصة بصيانته special tools اللي بتخللي اداء الصيانة يتم في وقت قليل

اما عملية الصيانة فمش ممكن تتم و المحرك شغال و لكن لازم يكون متوقف عن العمل
و لكن فيه أنواع من الكشف و الاختبارات بتتم أثناء التشغيل زي :
- اختبار كفاءة الحريق
- اختبار ضغط الانضغاط و معرفة حالة الشنابر و هل فيه منها شنابر مكسورة و لا لأ
- قياس القدرة المتولدة من المحرك و قياس العزم الناتج
- و من خلال متابعة الحرارات و الضغوط يمكن معرفة حالة بعض الاجزاء و تحديد العيوب تمهيدا لعمل الصيانات أو الاصلاحات اللازمة في أقرب فرصة

عموما سوف أكتب أن شاء الله في أقرب فرصة عن هذا الموضوع بالتفصيل بس اخد فرصة أجهز فيها المادة كاملة بالصور و الافلام علشان يكون الشرح وافي

مع خالص تحياتي
م/ سمير الشهاوي

**marsguy** · 02-07-2010 10:16 AM

موضوع شيق جداً

شكراً ليكم بجد يا جماعه على الموضوع ده

فعلاً مواتير المراكب دية ليها مقاييس تانيه خالص

**Mzeid** · 02-07-2010 04:48 PM

طيب يا بشمهندس سمير مقلتلهمش على كمية الغزعاج اللي بيعملها محرك الديزل اد ايه

انا الحمد لله نفدت من الديزل و اشتغلت في بخار

**Amr Mohamed** · 03-07-2010 01:31 AM

بجد معلومات تحفه وكنت محتاجها وبقالى كتير بدور عليها وطريقة عرض تحفه بج دواحلى حته بتاع بير البترول هاها :b4_388::b4_388:

**Samir Elshahawy** · 03-07-2010 04:39 PM

المشاركة الأصلية كتبت بواسطة Mzeid

طيب يا بشمهندس سمير مقلتلهمش على كمية الغزعاج اللي بيعملها محرك الديزل اد ايه

انا الحمد لله نفدت من الديزل و اشتغلت في بخار

الصوت طبعا بيكون عالي جدا في المحركات البحرية و لكن في المحركات العملاقة عادة بيكون مقبول نظرا لأنها محركات بطيئة (أقل من 250 rpm)

المشكلة بتكون في المحركات متوسطة السرعة (500 rpm فأكثر) و عالية السرعة و دي اللي بيكون الصوت فيها مرتفع جدا لذا يجب أستخدام واقيات للأذن و ألا بعد فترة بيحدث ضعف للسمع
و من الطبيعي أن يتم عمل كشف دوري علي العاملين في غرف الماكينات كل 5 سنوات للتأكد من سلامة الأذن و العصب السمعي بالاضافة الي عدة أختبارات طبية أخري لبيان مدي لياقتهم و قدرتهم علي أداء مهامهم