الموضوع: النوبيرا هل هي مظلومة ؟؟

مبدئيا انا نسيت اضيف الجين2 و البرسونا لقائمة العربيات اللي فاتت , يمكن دي عربية اظن و الله اعلم ان امكانياتها اعلى من النوبيرا فعلا , و انا بصراخة معجب بالعربية دي, و ان كان طبعا فرق اسعار قطع الغيار بشع

المشاركة الأصلية كتبت بواسطة Casio2000

النوبيرا منتشره جدا - ايه اللي مخليك معتقد انها مش واخده حقها؟ - قصدي حقها اللي هو ايه؟ مبيعات؟ ولا رأي الناس فيها؟

تمام , مبيعات و سمعة , مش باشوف هنا على المنتدى حد مثلا ناوي يشتري نوبيرا مستعملة , ولا كنت باشوف حد ناوي يشتريها جديدة في أخر سنة او سنتين ليها , انا لما حجزتها زيرو و كنت هاشتريها , ما كانش حد حاجزها غيري ... علما بأن ناس كتير بتشتري عربيات مستواها اقل كتير ( كذا عربية من اللي انا ذكرتهم ) , يعني انا مثلا مش عارف ازاي يبقى فيه نوبيرا و الاقي الناس بتشتري الأفيو

المشاركة الأصلية كتبت بواسطة fdido26

النوبيرا عربية محترمة جدا و منتشرة اوي و سمعتها حلوة اوي في السوق بس يمكن موضوع الشكوي من عفشتها بالمقارنة باللانوس هي دي الحاجة الوحيدة اللي بتتكرر بين الناس و غير كده هي عربية زي الفل

انا معاك , بس منتشرة بالمقارنة بعربيات اول الألفينات , انما بالنسبة للعربيات اللي انا ذكرتها دي ( على الأقل موديلات السنتين اللي فاتوا ) لأ , و تعال نعقد مقارنة بين النوبيرا و بين العربيات اللي ذكرتها واحدة واحدة , هي هاتغلب اغلب العربيات دي في رأيي , لكن مع ذلك مش بتيجي في بال حد , مش عارف زهق بقى و لا ايه

المشاركة الأصلية كتبت بواسطة MoDy_ElMoSHaX

عربيتى نوبيرا وعربية والدى صنى...النوبيرا اوسع من الصنى وبحس ان امكانيات النوبيرا من الداخل اذكى من الصنى يعنى ممكن تلاقى زراير كتير فى الصنى ,النوبيرا لماها فى عدد زراير اقل وبيعملو نفس الوظيفة

ادي ميزة كمان , طب و بالنسبة للموتور والتسارع ؟ بالنسبة للثبات ؟ بالنسبة للكماليات ؟ و أسعار قطع الغيار ؟

المشاركة الأصلية كتبت بواسطة ahmed_nubira

الكماليات واحده فى العربيات اللى ذكرتها كلها تقريبا...ازاز كهرباء تكيف مرايات كهربه سنتر انذار باور كاسيت وخلافه

الليجانزا تعتبر اعلى فئه وهيا فعلا اللى مرسيدس الكورى.....وانا رأى ان النوبيرا لا تقل كفائه عن العربيات اللى اتقالت دى....بس الموضوع ان بقالها اكتر من 10 سنين بتنزل والناس زهقت من شكلها وعايزه تغير للاجدد....دة غير اللى يقلك ان شكلها شكل عربيه من 20 سنه واللى يقل عربيه عجوزه واللى واللى...عشان كده الناس مش بتفكر فيها
انا معايا العربيه من 2008 وعامل لحد دلوقتى 34 اللف
وانا راى انا العربيه دى الصراحه جيده جدا وليست بممتازه (زى برضه معظم العربيات اللى اتقالت وبصراحه مفيش عربيه فى الفئه السعريه دى نقدر نقول عليها ممتازه)
مميزتها:
1-كبيره وواسعه
2-صيانتها مش مكلفه
3-ثباتها معقول جدا جدا..انا جبت بيها 190 وكانت طلقه وماسكه نفسها بجد
4-موتور قوى وتكيف ممتاز وعلى فكره مواتير الدايو بتعيش عن عربيات تانيه كتير
5-سهوله اعاده البيع
6-قطاع غيار متوفره
العيوب بتاعت العربيه ضعف الصاج وصوت الشكمان..وصوت دبدبه فى المساعدين الخلفين مش عارف علاجهم ايه ولا ال........وانا شايف ان العفشه بتاعت العربيه بتستحمل...وانا مصادفتش مشاكل فى جلب المقصات او مشاكل فى الموتور الحمد لله
واسف للاطاله........

باحييك يا باشمهندس على تقييمك للعربية , اظن بقى لنا كتير ما عملناش تقييم لعربيات في الدايو هنا
و انا حاسس ان رأي معظم الناس شايفة ان الموضوع زهق مش اكتر , مع ان اللانوس مثلا كانت أولى بالزهق و بتتباع برده , اللهم الا ان كان تغيير شكل الشبكة الأمامية يعتبر تغيير , بالمناسبة , انا مثلا في مستوى العربيات ده باعتبر عربية زي الجين2 عربية ممتازة بنسبة كبيرة , لكني كنت نسيت اكتبها

المشاركة الأصلية كتبت بواسطة waleedrahmy

مظلومة في سعر اعادة بيعها

ايه السبب في رأيك يا استاذ وليد ؟

المشاركة الأصلية كتبت بواسطة mody_elmoshax

بصراحة النيسان احسن من (عربيتى) -وليس النوبيرا عموما -فى الموتور والتسارع لأن عربيتى موديل 97 والنيسان مو 08
يعنى فرق 11 سنة , غير كدة انا باعترف ان عربيتى الاقل سحبا فى جميع عربيات النوبيرا لأنى ماغيرتش ليها حاجة من اكتر من 3 سنين غير الزيت والفلتر بتاعه وحساس السرعة حتى المية ماغيرتهاش من يوم ماجبت العربية ههههه
وبالنسبة للثبات , جبت بيها 170 مستريح وكان ممكن ازود بس خفت لأن الكاوتشات اللى عندى اتنين من سنة 2000 واتنين من سنة2001 فخفت لتنفجر
ما قطع الغيار فتقريبا متقاربين فى السعر
وماتستغربش حضرتك من حكاية انى مابغيرش فيها حاجة بس ده نظرا لأنى طالب ولسه باخد مصروف وحالتى المادية تعبانة ومبحبش اقول لحد عايز حتى لو والدى
هانت كلها سنتين واشتغل ان شاء الله ساعتها بقى لو كانت العربية لسة بتمشى ممكن اغيرلها البوجيهات

ههههههههههههههههههه , ربنا يوفقك و ساعتها ان شاء الله تظبطها و ترجعها عروسة تاني , بس كل كلامك بيصب في خانة انها عربية عالية اوي

المشاركة الأصلية كتبت بواسطة waleedrahmy

حكاية الاتوماتيك بتاعها واعطاله والعفشة مشكلتها المقصات مسوءة سمعة العربية

الأتوماتيك بتاعها انا عارف ان سمعته وحشة فعلا , و اعطال العفشة مفروض ان لها حلول , لكن افهم من كلامك ان سمعة العربية سيئة بالظلم زي ما باقول ؟

المشاركة الأصلية كتبت بواسطة al_manara

واحنا عندنا اي حاجة فيها عيب . يعملولها فضيحة . وتبقي عربية زي الزفت .
وانا رايي مثل راي اعضاء كتير شاركوا في الموضوع ان العربية واخدة حقها بدليل انها موجودة كتير .
اما بالنسبة لمقارنتها بالعربيات الي ذكرتها . هما ميزتهم انهم جداد لاكن النوبيرا شكلها بقالة 10 سنين . فدة كتر اوي .

العربية موجودة كتير جدا فعلا , لكن مش واخدة حقها كسمعة , او على الأقل ده احساسي اللي ممكن يكون صح او غلط , اما بخصوص ثبات الشكل , فاللانوس نفس الكلام و بتتباع لحد النهارده , ولا هل تكون مشكلة النوبيرا ان انتاجها توقف ؟