عربيتك اوتوماتيك؟؟ عايز تركن صف تاني؟!! الحل

**Ahmed Hassan** · 19-02-2008 04:34 PM

كلنا عارفين موضوع الزحمه الخانقه اللي عايشين فيه سكان القاهره.. و نتيجه لذلك اصبحت الركنه صف تاني (و ساعات تالت كمان) امر عادي جدا.

المشكله اللي كتير اشتكوا منها هيه ان العربيات الأوتوماتيك الجديده المفتاح مش بيطلع الا و الفتيس على وضع P يعني العربيه معشقه و مينفعش تتزق... و بالتالي مينفعش تتركن صف تاني.

الحل بسيط جدا... تطلع على مفتاح العربيه (مفتاح عادي بـ 5 جنيه) و تخليه في درج العربيه... لما تركن تحطه في الكونتاكت و تجيب الفتيس على وضع N و تسيب المفتاح في الكونتاكت.

طبعا العربيه موديل حديث... يعني فيها Immobilizer يعني (شفره) و المفتاح العادي مع انه بيدخل الكونتاكت مش هيدور العربيه... يعني مفيش خوف ان العربيه تتسرق لا قدر الله. طبعا لا ينصح بعمل الموضوع ده في عربيه من غير شفره لأن كده لو حد فتح الباب يبقى العربيه كلها اتسرقت خلاص.

**memo_hefnawy** · 19-02-2008 04:38 PM

فى المقابل يا حاج أحمد لما واحد يشوف العربية فيها مفتاح كده هايكسر عليها الزجاج :)

آه مش هاتدور بس كسرلك الشباك :)

حل ظريف يا أحمد باشا

بس الأظرف منه إن محدش يركن صف تانى أصلا و نيجى على روحنا حبه و نركن بعيد و نمشى

**Ahmed Hassan** · 19-02-2008 04:43 PM

المشاركة الأصلية كتبت بواسطة memo_hefnawy

فى المقابل يا حاج أحمد لما واحد يشوف العربية فيها مفتاح كده هايكسر عليها الزجاج :)

آه مش هاتدور بس كسرلك الشباك :)

حل ظريف يا أحمد باشا

بس الأظرف منه إن محدش يركن صف تانى أصلا و نيجى على روحنا حبه و نركن بعيد و نمشى

دي حلها بسيط يا محمود... ممكن تعمل المفتاح من غير راس و بكده مش هيبان انه راكب في الكونتاكت.
طبعا لو فيه امكانيه انك متركنش صف تاني يكون احسن.. بس هل يا ترى الاختيار ده موجود في القاهره؟!!
انا عن نفسي عربيتي مانيوال... بس بردو مستحيل اسيبها صف تاني ولا في القاهره او اي مكان تاني.. بس معتقدش ان سكان القاهره عندهم الاختيار ده

**memo_hefnawy** · 19-02-2008 04:58 PM

ليه يا حاج أحمد :)

هو خيار موجود بس للى عايز

أنا مابركنش صف تانى إلا فى حالة واحدة - أنا قاعد فى العربية أو سايب حد فى العربية و معاه المفتاح غير كده لا يمكن أعملها

أنا لما حد بيقفل عليا صف تانى و معشق ماقولكش بكون عايز أولع فى عربيته أنا آخر مرة إتعملت فيا والله كنت خلاص بوقف عربية نص نقل دبابة و كنت هاديله أى فلوس بس يجر العربية يرميها فى أى داهية لحد ما البقرة إللى كانت راكنها إفتكرت إنها قافله على بنى آدم و بعتت المفتاح مع ولد من الكوافير إللى هى متنيله قاعده فيه رغم إنى سألته قالى مش تبعنا و قال كان عايزنى أنقلها عشان مش بيعرف يسوق

عليت صوتى قولتله خلى البقرة إللى قاعده جوة تخرج تنقلها هى و طبعا كان صوتى جايب لآخر الشارع

بس تقول إيه ناس ماعندهاش دم