الموضوع: كروديا كروديا بس أعيش

الله يرحمه بقى

ويسامحه

المهم ان العنوان صحيح أنا معاك اني أعيش كروديا ولا أموت كروديا برضه ههههههههه

والله ياجماعة ببعد بعيد عنهم بقدر الامكان عشان عارف ان حياته في خطر لمسه ويطير اما فوق الطيرة الاخيرة او يتدشدش
الموووووووووووووووتوسكل موتو سهل جدا
كنت سايق موووووووووووووتوسكل وكنت هموت ولله العظيم طرت في الهو ولموتوسكل معايا بس هو طلع اسرع مني وتفشفش بسبب
مطب عملينه علي طرق سريع وياريت كان باين عقبال ماخدت بالي كنت في الهوي والخسائر الحمد لله كانت طفيفه الموتوسكل اتفشفش وانا كنست الطريق
ومن ساعتها وانا كل ماشوف واحد راكب موتوسكل ابعد بعيد عنه خوفا عليه رغم انهم مش بيخافوا علي نفسيهم ويخشوا زي الي راكب دبابه مصفحه حاجه غريبة

يا جماعه الموضوع أكبر من موتوسكل ولا عجله
أنا بتكلم عن الناس اللي بتستنصح, على سبيل المثال:
واحد صاحبي أخد حكم حبس 3 شهور علشان واحد فهلوي بيعدي طريق الواحات في الضلمه, رغم إن تحقيق الشرطه بيقول إن صاحبي مش غلطان.

ولما واحد فهلوي برضه, يقرر إنه يعدي الشارع من حته ممنوع فيها عبور المشاه, وتحسبا للفهلويه بيعملوا سور حديد, ييجي صاحبنا يلاقي الكروديات بيطلعوا فوق كوبري أو نفق عبور المشاه, ويقول جملته المشهوره: "أنا جامد قوي, ولاد العبيطه دول مش واخدين بالهم إنهم ممكن ينطوا من فوق السور بدل مايطلعوا السلالم" وطااااخ يقع يتكعور في نص الطريق عشان رجل البنطلون شبكت في الخازوق الحديد اللي الحكومه حاططاه عشان تمنع الفهلوه.

ولما واحد فهلوي تالت, يبقى سايق في شارع حارتين, حاره رايح وحاره جاي, ويلاقي الحاره بتاعته زحمه والتانيه فاضيه, ويقول برضه نفس جملته المشهوره: "أنا جامد قوي, الكروديات دول واقفين في الحاره دي ليه, مالتانيه فاضيه أهه, أنا هاكسر شمال واجري شويه ولما ألاقي حد جاي في وشي أبقى أكسر يمين تاني على واحد من الكروديات الأغبيا دول" وهوب مع أول فهلوي يبتدي ينفذ, تلاقي إخواته الفهلويه في ديله, وفجأه يبقى الشارع عباره عن حارتين رايح وحارتين راجع, مع إنه أصلا حارتين.

ولما واحد فهلوي رابع, يبقى سايق ويقرر إنه عاوز يلف ويرجع: "أنا جامد قوي, الكروديات دول بيمشوا 500 متر زياده عشان ياخدوا الـ U turn بتاعتهم, ومالها يعني الـ U turn العكسي؟ كفرت؟ ماهي شغاله أهه, أنا بستعجب والله إزاي الناس دي كلها مش واخده بالها" ويلاقي الحكومه مزوده الرصيف بتاع الـ U turn حته كبيره عشان تمنع الفهلويه إنهم يعملوا الحركه دي, وتلاقيه عشان يطلع منه, عرَضها بالجامد في وسط الشارع, وهو وحظه بقى, ييجي أتوبيس يشيله أو تيجي عربيه طريه تتدغدغ على عربيته.

ولما ييجي الفهلوي رقم 21349 ينزل ميدان لبنان من الدائري ويلاقي المنزل واقف: "أنا جامد قوي, أنا هاخد شمالي في الحته الفاضيه وقبل الفتحه علاطول هاكسر يمين عمودي على إتجاه السير, وادخل قدام واحد من الكروديات اللي واقفين في طابور عشان ينزلوا, أصل أنا جامد قوي, أنا أحسن منهم كلهم, أنا لازم أنزل قبلهم, هم مش مهم, يولعوا" ويقف الطريق كله اللي نازل واللي مش نازل

ولما ييجي الفهلوي رقم 98738598345 يلاقي عربية إسعاف: "أنا جامد قوي, بص والنبي, شفت كل الكروديات دول؟ أهم فاكرين إن العربيه دي فيها عيان وحالته خطيره, إنما أبدا هاهاهاAbsolutly هاهاها, دول كروديات, خليهم يوسعوا وأنا أرشق في الإسعاف هاهاهاها".

يوميات الفهلويه مابتنتهيش, مش بس على الطريق, في المحلات, المطاعم, المصالح الحكوميه, الشركات... إلخ

الفهلوه ليها جين في كروموسومات الشعب المصري


اللهم لا تؤاخذنا بما فعل السفهاء منا
اللهم لا تؤاخذنا بما فعل السفهاء منا
اللهم لا تؤاخذنا بما فعل السفهاء منا
اللهم لا تؤاخذنا بما فعل السفهاء منا

والفهلوي اللي ينط من الأوتوبيس ويجري يعدي الطريق من قدامه كأن مافيش عربيات ممكن تيجي من شمال الأوتوبيس .. الواد فهلوي وهايخسر مليون جنيه في البورصة لو استنى ربع دقيقة لغاية الأوتوبيس ما يمشي ويقدر يشوف السكة !!!

موضوع الفهلوي ده ظريف لأن الفهلوة جين من الجينات الفرعونية المتوارثة زي مانت قلت :)

الحمد لله اني بقالي 12 سنة بسوق فيها و انا عايش كروديا
و لحد اما اموت اكيد اتمنى اني افضل كروديا
و ربنا يحفظنا و يحفظ الجميع من الفهلوية