إستلمت الساجا أخيراً الحمدلله
السلام عليكم،
أخيراً و بعد طول إنتظار، و بعد الحجز ب 4 شهور إلا 4 أيام، إستلمت إمبارح الساجا :36_1_1[1]:
هي أوتوماتيك سوداء، و الحمد لله حتي الاّن من خلال المشوار اليتيم إللي إتعمل بيها من عز العرب فرع مدينة نصر إلي البيت بالعباسية، إنطباعي عنها كويس جداً الحمد لله (ده بغض النظر عن إني سوقت ساجا مانيوال بتاعة واحد صاحبي كذا مرة قبل كدة :ma: )
التقييم المبدأي للحاجات إللي كنت قلقان منها من كلام الناس:
1- التكييف كويس جداً مش ضعيف ولا حاجة الحمد لله
2- التكييف فعلاً بيأثر علي السحب، بس مش بشكل يضايق اللي سايق يعني .. أنا من الكلام اللي سمعته حسيت إني أول ما أشغل التكييف هابقي كأني رجعت لل128 :36_1_1[1]:
3- صوت الموتور مسموع من داخل العربية، ولكن مش عالي يعني .. ده غير إن الصوت حلو أصلاً و لو عليَ كنت هابقي مبسوط لو كان أعلي شوية :3mla:
4- الكلاكس كويس في الناحيتين اليمين و الشمال الحمد لله .. الناحية الشمال ماحسيتهاش تقيلة ولا حاجة
مكانش في غير ملاحظتين (أو سؤال و ملاحظة كدة يعني)
أول حاجة: هو الفتيس مش بينور ؟ يعني مافيش نور في المجري بتاع الفتيس يخليني أشوف الفتيس دلوقتي علي إيه مثلاً ؟
أنا عارف إنها بتبقي باينة في وشي في العدادات ما بين ال RPM و السرعة، أنا بسأل إذا كان الفتيس نفسه المفروض عنده نور ولا لأ ؟
تاني حاجة: الباركينج سينسور جميل جداً ما شاء الله و حسيته مفيد يعني
بس المشكلة إني حسيته قلبه خفيف شوية :ma: .. و بيزمر من بدري قوي و بيعمل الصفارة المتصلة دي و أنا لسة بعيد عن اللي ورايا بحبة حلوين .. شكله هايتعب معايا كل ما أركن :36_1_1[1]:
الكلام ده كله حتي الاّن بناءاً علي مشوار صغير واحد ... إن شاء الله النهاردة رايح أرخص و بعد كدة طالع علي الشغل في القرية الذكية .. إن شاء الله لو في أي حاجة زيادة خدت بالي منها (حلوة أو وحشة، و إن شاء الله مايكونش في حاجة وحشة :ask: ) هاقولها لما أرجع