حصر لملاك السيارة شيفروليه لانوس 2010 - أدخل قول معلومات عربيتك وانطباعك عنها

**mohamedhmk** · 30-06-2010 12:42 PM

السلام عليكم ورحمة الله وبركاته

أعضاء منتدى نايل موتورز الكرام

انا حبيت أعمل حصر لملاك السيارة شيفروليه لانوس 2010 علشان نكون مع بعض ونحل مشاكل بعض ونستفيد من خبرات بعض

لو انت من ملاك العربيه

قولنا معاك من أمتى؟
لونها إيه؟
تقييمك ليها؟
لو فيه مشكله لا قدر الله كانت إيه واتعاملت معها ازاي؟
اكسسوارات عربيتك - ايه ومنين؟
وأي حاجه حابب تضيفها

تحياتي للجميع

**wael_dosoky** · 30-06-2010 02:37 PM

العربية معايا من ديسمبر 2010 عملت بيها 11000 كيلو لغاية دلوقتي - نبيتي- ركبت ليها انذار وسنتر وفرش جلد للأرضية وفرش عادي للكراسي
العربية معاملتيش معايا مشاكل كبيرة والحمد لله لغاية دلوقتي
اقصي سرعة انا جبتها بيها كانت 140 وكانت ممكن تجيب اكتر بس انا ماليش في السرعات
لكن انا حاسس انها موش متزنة علي الأرض اوي زي ما كانت اللانوس 99 إلي كانت معايا قبل كده
ده إلي حاضر في دماغي لغاية دلوقتي

**emad_banda** · 30-06-2010 02:53 PM

العربية معاها لية شهر عملت بها 300 كيو
اللون رومادى ميتاك
الموتور صوتة عالى الغيار الاول عزمة قليل
الفرامل خفيفة
اصلت بالتوكيل رفضوا يركبو انذار وسنتر هل دة صحيح ولا تزويح ونفسى اركب انذار
الدريكسيون فية رعشة بسيطة على الغيار الاول

**mikeflyer** · 30-06-2010 07:25 PM

انا معايا لانوس شيفروليه اشتريتها في نوفمبر 2009 وعملت لحد دلوقتي حوالي 8000 كيلو
اشتريت اللون السماوي وطبعا بحاول احافظ عليها جدا جدا
لحد دلوقتي جبت انذار اول ما اشتريتها وبعدها ركبت فرش جلد وطبعا الغسيل والمعطرات
ومن اسبوع تقريبا شمعتها علشان شكلها يفضل زيرو

اقصى سرعه جبتها بيها 165 على الدائري الساعه 2 باليل والحمد لله كانت ثابته جدا والدركسيون ثابت في ايدي يمكن علشان ساعتها كنت محمل ناس في العربيه معايا

الرأي العام كويسه والمشكله الوحيده في السحب على الاول والتاني وخصوصا مع التكييف بس ده عادي في اللانوس واتعودت عليه

**mikeflyer** · 30-06-2010 07:26 PM

المشاركة الأصلية كتبت بواسطة emad_banda

العربية معاها لية شهر عملت بها 300 كيو
اللون رومادى ميتاك
الموتور صوتة عالى الغيار الاول عزمة قليل
الفرامل خفيفة
اصلت بالتوكيل رفضوا يركبو انذار وسنتر هل دة صحيح ولا تزويح ونفسى اركب انذار
الدريكسيون فية رعشة بسيطة على الغيار الاول

همه فعلا في التوكيل بيرفضو يشتغلو في الكهربا انا لما سألتهم قلتلهم عايز اعمل سنسور بارك قالولي لأ قلتلهم طيب والضمان قالولي مفيش ضمان كهربا في اللانوس

**hazemhassan** · 30-06-2010 08:23 PM

المشاركة الأصلية كتبت بواسطة mikeflyer

اسبوع تقريبا شمعتها علشان شكلها يفضل زيرو

عايز اعرف ياباشا شمعتها فين عشان العربية حاسس انها اللون طفى

وبالنسبة لتقيمى ليها عايز اقول انها كويسة
انا جايبها شهر سبتمبر الللى فات عامل 17000 كم
صيانة فى التوكيل غيرولى سير التكيف والبلية فى الضمان عشان كانو عاملين صوت والصيانة الدورية
ساعات الباور بيتقل
بس ركبت سنتر وفرش وساعة فقط ولسة قربب هركب سينسورر وزينون بس ربنا يفرجها
العربية جبت بيها 140 وكان صوت الماتور عالى
حاسس انها بتاكل بنزين

**yassin_samir** · 30-06-2010 09:21 PM

العربية معايا من شهر 8 اللى فلت الحمد لله مفيش الا مرة واحدة لما فولت للاخر جوان الطرمبة تقريبا باظ فحصل تسريب بنزين غير كدة المد للة على قد تمنهااللون ابيض الكيلو متر 8000

**mohamedhmk** · 01-07-2010 01:24 AM

شكرا جزيلا على المشاركه الفعاله

ايوه كده عايزين تفاعل كده علشان نستفيد من بعض

تحياتي للجميع

**dr_mak** · 01-07-2010 03:35 AM

المشاركة الأصلية كتبت بواسطة yassin_samir

العربية معايا من شهر 8 اللى فلت الحمد للة مفيش الا مرة واحدة لما فولت للاخر جوان الطرمبة تقريبا باظ فحصل تسريب بنزين غير كدة المد للة على قد تمنهااللون ابيض الكيلو متر 8000

كل الشيفرولية الانوس حاطين فيها طرمبة صيني ام 150 جنية ....مش عارف لية ؟؟؟...يعني واحد دافع حوالي سبعين الف جينة هيعمل اية تاني اكتر من كدة علشان يحطو قطع نظيفة في العربية

**RimonWagdy** · 01-07-2010 12:48 PM

صباح الفل عليكم جميعاً ...
موضوع جميل و شيق , أنا معايا الشيفرولية الانوس 2010 من شهر تقريبا , عملت بها 1500 كم و أقصى سرعة 140 كم\س .
بصراحة العربية ظريفة و ناعمة بس الفرامل خفيفة و الموتور صوته عالى , التوكيل يرفض تركيب انذار و ديه حاجه بايخة ...