و تتوالى مفاجآت m11

**ahmeddarhos** · 30-06-2010 02:58 PM

و دى يا جماعة هى أحدث مواقف الجميلة M11 معاى...

يوم السبت اللى فات كنت رايح العيادة بالليل و كنت ماشى و كله تمام و مافيش أى مشاكل .. ركنت و طلعت شغلى و بعدين نزلت الساعة 12 بالليل....
أول لما دورت العربية سمعت صوت غريب جدا شبه صوت غليان الميه ( صوت فقاقيع هوا) ...لما قفلت الأزاز فضلت سامع نفس الصوت و حسيت انه جاى من ناحية الدركسيون المهم ,, قلت يا واد طنش خالص و روح التوكيل بكرة شوف ايه الحكاية .. و بالمرة اعمل صيانة ال 15000كم..
قلت باسم الله و جيت أمشى لقيت الدركسيون تقييييييييييييييييييييييي يييييل جدا جدا و بيلف معاى بالعافية..
قلت يبقى الباور هو اللى فصل...
المهم روحت طبعا ماشى باتمختر و براحتى على الاخر و تانى يوم الصبح رحت تكنوسيرفيس و قلتلهم الحكاية..
بعد ساعة تقريبا جه المهندس و قاللى علبة الدركسيون عاوزة تتغير وهى مش موجودة عندنا و هنطلبها من أبورواش و ربنا يسهل و تيجى على بكرة....
أنا بصراحة أول ماسمعت الكلام ده .. قلت له طب ايه اللى بوظها ,, قاللى عادى بتحصل أحيانا.. بس مافيش سبب محدد.. المهم طبعا أنا بقيت خبير فى التعامل مع مراكز الخدمة.. شوية كلام جامد على حبة زعيق و قلتله أنا جاى بكرة علشان أستلم العربية و لو ماكانتش خلصت مش عاوزها .. خليها عنكم و ادينى ما يثبت لأن كده كده أنا مستنى ميعاد لجنة الفحص اللى جهاز حماية المستهلك هيحدده .. أنا هقضيها مواصلات و مترو لغاية لما ترجعولى فلوسى..
المهم رحت تانى يوم الظهر و لقيتهم الحمد لله خلصوا كل حاجة و عملوا الصيانة و مشيت و لقيت الدركسيون بقى أخف من الأول... مش أخف كتير بس أخف بدرجة ملحوظة.

اللى نفسى أفهمه هو ايه اللى حصل و ايه السبب.؟؟
أنا عربيتى عاملة 15000كم بالظبط..
غيرت بوجيهات عند 8000كم
و غيرت دينامو عند 11000كم
و غيرت علبة دركسيون عند 15000كم

ده غير الناس الأفاضل اللى غيروا بطارية .. سربنتينة تكييف..الباور ..... طنابير.. تيل فرامل (عند 9000كم) ...و طبعا عماد اللى هيغير التابلوة كله ....!!!!!!!

أنا عاوز حد من الناس اللى بتدافع عن الاسبيرانزا عمال على بطال يقول لى هل اللى بيحصل ده طبيعى فى عربيات لسه زيرو... و كل اللى شاريها كان هدفه الأساسى انه يريح دماغه أول 4 أو 5 سنين و مايعملش أى حاجة غير الصيانات الدورية و بس..
اسف للأطالة يا شباب .. و ياريت تكون الردود مقنعة لأن الحاجات دى حصلت فى عربيات كتير .. يعنى مش حالات فردية..

**msobhy** · 30-06-2010 03:22 PM

بجد يا دكتور احمد الله يكون فى عون حضرتكوالله بجد انا مبقتش عارف هل ديه حالات فردية ولا كل العربيات كده
بس بجد فى ناس كتيييييييييييييييييير بتشكر فى الاسبرانزا وفى ناس بتلعن جدودها مش عارف هل المشاكل الكتيييير اللى حضرتكم بتتكلموا فيها هيه سبب النزول الحاد فى سعر اعادة البيع للعربية ديه

انا فى الفترة اللى فاتت قابلت 516 مستعملة كتيييييييييييييير
تخيلوا موديل 2006 ب 40 الى 43 الف بالكتييييييييير
2007-2009 ب 44000 الى 50000 بالكتيييير
2010 كسر زيرو وهو ده المضحك مش بتزيد عن 55000 والسعر المتعارف علية 52 الى 53 وطبعا كل العربيات ديه فابريكة بره وجوه - أمال اللى رشة بره تعمل كاااااااااااااااااااااام؟ والله العظيم انا قلقان جدا لأن هاشترى 516 موديل 2009 خلال يومين أو ثلاثة - ربنا يستر

**mohamed9999** · 30-06-2010 03:46 PM

و الله انا شفت واحد راكن العربيه a113 فى نزله 26يوليو ورافع الكبوت و الله صعب عليه ربنا يكون فى عونكم (انا معايا 128) بس لو نويت على جديد مش هجيب صينى مع انى عجبانى اوى a516

**etsh1413202** · 30-06-2010 07:55 PM

بصراحه كان الله في عونك ....... عموما انا من متابعتي لاخبار اسبرانزا باستمرار فعلا m11 اكتر عربيه من ابو الفتوح فيها مشاكل وحوارات ...... مش عارف اقولك ايه بس هي المشاكل الى بتحصل عندك مش طبيعيه ولا حالات فرديه لانك لو لفيت لفه في قسم اسبيرانزا هتلاقي من ده كتير ..... ربنا يكون في عونك وتحاول تخلص منها على خير

**د.محمود صلاح** · 30-06-2010 08:14 PM

ربنا يكون في عونك ..
انا كانت عندي الجيلي ck1 غيرت علبة الباور على 15 الف بسببب انها رشحت زيت ...

**emad7759** · 30-06-2010 10:33 PM

حسبي لله ونعم الوكيل فى اللى كان السبب ى مجايب العربيات الزباله

واللى مستغربله ان لسه فيه ناس مقتنعه بيها وبيقولو قصايد شعر فيها

ربنا يخلاصنا منها على خير

**mif** · 01-07-2010 04:24 PM

انا مش عارف الناس مخنوقة ليهههههههه؟

لان كل واحد ربنا ادالوا عقل يفكر قبل ما يتصرف ليه اروح اشترى عربية صينى و انا متاكد 100% ان انا ليسة عايش فى بلدى المنهوبة ام الدنيا مصر و متاكد اكتر ان مفيش جهة واحدة و لا حكومة و لا خاصة حتحمينى او تفكر فى راحتى او فى صحتى او حتى مستقبلى لان الحجات دى كلها ملك الكبار او الحيتان احسبها كدة من اول ما تشترى العربية حتلاقى نفسك بتعدى على مجموعة من الحيتان اللى يقعدوا ينهشوا فى لحمك علشان يوصلوك لحاجة من الاتنين يا اما تبقى حوت زيهم او تبقى هيكل عظمى كدمية فى يدهم

عن نفسى بفضل العربيات الاروبية خاصة الالمانى و الايطالى

و ربنا يرحمنا و يكشف الحرامة الملاعين اللى بيسرقوا كل طبقات الشعب ليل و نهار