انا عايز اجيب تكيييف اسبليت 1.5 حصان ففكرت في تكييف سامسونج فكنت عايز اعرف هو فعلا كويس و لا ايه
و خصوصا في ناس كتير رجحت السامسونج علشان صناعتة كوري و الكباسات بتخلي التكييف بيبرد بسرعة
عرض للطباعة
انا عايز اجيب تكيييف اسبليت 1.5 حصان ففكرت في تكييف سامسونج فكنت عايز اعرف هو فعلا كويس و لا ايه
و خصوصا في ناس كتير رجحت السامسونج علشان صناعتة كوري و الكباسات بتخلي التكييف بيبرد بسرعة
و الله يا اخي انا ماجربتوش بس بادعبس على كل حاجه على النت قبل ما اشتريها وده قبل مااجيب تكييف شارب من سنتين سبليت 1.5 والتاني شباك برضو شارب وسبب ده الضمان الشامل خمس سنوات وده ضمان استبدال اما السامسونج فلقيت ناس كتير في منتديات خليجيه بتشتكي منه في حاجات عيوب صناعه وفي توكيله اللي هوا المتبولي في السعوديه تحديدا وده مع العلم ان الاجهزه اللي بتروحلهم افضل من اللي بتيجي عندنا -اعتقد- مع العلم اني مش عارف ضمانه في مصر كام سنه علما ان وكيله منصور . بس لنا كمان من معلوماتي ان احسن تكييف في مصر و اللي احسن من شارب هو ترين ودول اساتذة التكييف عالميا وفي الخليج بيبرد الصحراء اللي بتوصل الحراره هناك ل 60 درجه واكتر وده ان شاء الله اختياري القادم في حالي توفر الكاش عشان الدنيا بقت موت . وسعره على ما أظن 2750 للسبليت .
جيب ماركه متجربه كتير ومعروفخ علشان تبق فى الامان
شــــــــــــــــــــــــ ـــــــــــارب
وريح دماغك جهاز متجرب وشغال ميه ميه وضمان وصيانة كويسين
شوف اخي
انا كمان بفكر في السامسنج
ودى المعلومات اللى عندي:
الصناعة: مصانع سامسنج في الصين
الضمان: 5 سنوات
الضمان استبدال بالكامل خلال اول 6 شهور لو حصل حاجة في الجهاز
بعدها ضمان زي اي جهاز تكييف تاني (ده كلام المهندس اللي كنت عايز اشتري منه)
والدعم الفني خلال 48 ساعة من الاتصال بيهم
اقتباس:
و الله يا اخي انا ماجربتوش بس بادعبس على كل حاجه على النت قبل ما اشتريها وده قبل مااجيب تكييف شارب من سنتين سبليت 1.5 والتاني شباك برضو شارب وسبب ده الضمان الشامل خمس سنوات وده ضمان استبدال اما السامسونج فلقيت ناس كتير في منتديات خليجيه بتشتكي منه في حاجات عيوب صناعه وفي توكيله اللي هوا المتبولي في السعوديه تحديدا وده مع العلم ان الاجهزه اللي بتروحلهم افضل من اللي بتيجي عندنا -اعتقد- مع العلم اني مش عارف ضمانه في مصر كام سنه علما ان وكيله منصور . بس لنا كمان من معلوماتي ان احسن تكييف في مصر و اللي احسن من شارب هو ترين ودول اساتذة التكييف عالميا وفي الخليج بيبرد الصحراء اللي بتوصل الحراره هناك ل 60 درجه واكتر وده ان شاء الله اختياري القادم في حالي توفر الكاش عشان الدنيا بقت موت . وسعره على ما أظن 2750 للسبليت .
بالنسبة لدول الخليج
انا فعلا كنت عايز اعرف رأيهم في التكيف السمسنج
ياريت لو فيه معلومات اكتر
بالنسبة لترين:
هو فرنسى والمكونات الداخلية صيني حاليا (معرفش ليه كل حاجة قلبت صيني)
بالنسبة لشارب:
المشكلة ان الموديلا المتوفرة في مصر
مش موجودة عالميا نهائي
واضح انها موديلات قديمة جدا
ادخل على موقع الشركة هتلاقي مدلات رهيبة وتكنولوجيا تانيه من شارب
وشارب بتاعنا من عالم اخر
حاجة تانيه في شارب:
نوع الدعاية مستفز
تلاقيهم كاتبين بالخط العريض وشوية نجوم : ده فيه تيربو
ده فيه تنقية للهواء
(عاملين زي اللى بيطلعوا في القنوات الفضائية ويقلك جهاز كزمبيوتر جبار الهارد 40 جيجا بحالهم ايوه 40 جيجا) بيستغلوا جهل الناس
اما السامسنج وبكل احترام
لما تشوف صفحة الخواص التقنية
تلاقيهم امام خاصية التيربو حاطين صح (الخاصية دى قديمة وتقليدية والمفروض تكون متوفره عادي مهياش نهضة علمية محتاجة دعاية)
قدام التنقية بكذ وبكذا حاطين صح
الخ من مميزات كتير في رأى احسن من الشارب
بس المشكلة:
اقتباس:
جيب ماركه متجربه كتير ومعروفخ علشان تبق فى الامان
اقتباس:
شــــــــــــــــــــــــ ـــــــــــارب
وهنا المشكلة الحقيقيةاقتباس:
وريح دماغك جهاز متجرب وشغال ميه ميه وضمان وصيانة كويسين
الكل عارف الشارب من زمان
اما السامسنج لسه جديد في السوق
عشان كده حاولت اني اجيب معلومات عنه من اراء الاخوة في دول الخليج
بس معرفتش ياريت اخونا grumby78
يضيف معلومات اكتر
ارشح لحضرتك يونيون اير تكهيف متجرب من سنين و حمال قسية و سعره افضل من الانواع التانية و برده ضمان خمس سنين
كده الواحد هيتوه ياريت نعمل مقارنه
و الله اليونيون اير و ناس كتير اعرفها بتشتكي منه و الكاريير كويس و الشارب فعلاا كويس جدا و الناس بتشكر فيه بس سعرة غالي و كمان التكنولوجيا بتاعتة قديمة . لكن السامسونج اللي عجبني فية شكلة و مميزاتة و غير كدة شركة سامسونج اتقدمت كتير قوي خلال السنتين الي فاتوا . علشان كدة بفكر اجازف و اجربة و اهو يبقي اسمي من اول الناس اللي جربته .
ايه رأيكم يستحق المجازفة و لا اعيد تفكيري مره تانية
الكرافت
صوت واطي و مفتري في السقعه
اسأل على تكييف اسمه إيجات
كويس وسعره رخيص
انا عندي في البيت شارب
وفي الشغل كل المكيفات ايجات بقاله 3 سنين وشغل مستمر
ماشاء الله كويس اوي وشكله مايفرقش عن الشارب
انا شفت اعلان في الوسيط كانوا كاتبين سعر تقريبا 1300 ودا متهيألي ممكن يكون اقل سعر جهاز شباك 1.5 حصان
دي الصورة اللي لقيتها على النت
http://www.egatgroup.com/images/EGAT...T_Elegance.jpg
شكرا ياباشا على جهدك
واضح ان البائع وراني اصدار من 10 سنين ولا حاجة
الصورة كانت غير كده خالص
تفضل بس مشكلة توفر وكيل معتمد والصيانة والضمان
وزى ما قلت يقال ان المكونات بتاعته كويسه (حسب كلام البائع)
---
بس مش كاتبين حاجة عن:
نوع الكومبريسور
الخواص الاضافية زي التيربو والفلترة والريموت...........الخ
معلومات عن ايجات
المصدر اتصال تليفوني بالشركة
3 حصان سبليت السعر 4830
الريموت والتربو وغيره وكله موجود
الصناعة:
القطع يابانى والتقفيل مصنعهم في 6 اكتوبر
الكومبريسور: روتاري صناعة توشيبا اليابان
الضمان 3 سنوات
الشركة في الاساس متخصصة في التكييف المركزى
اخي اولا بخصوص مكيفات samsung فهي غير اعتماديه في الخليج نظرا لشدة الحراره هناك وكمان خدمة مابعد البيع وهي الاهم في اي تكييف سيئه ونظرا لان الجهاز حساس فأعطاله كثيره هناك ودي مش معلومات من عندي دي معلومات من ناس جابته هناك. علما بان سعره هناك رخيص جدا نسبيا مقارنة بالتكييفات الاخرى mitsubishi و trane و general وبعدين لسه لم يجرب بالقدر الكافي في مصر لانه لسه جديد ومقارنته ب sharp هي لصالح الشارب من منطلق ضمان شامل على الوحدتين الداخليه والخارجيه بالكامل لمدة 5 سنوات . اما ترين trane فدول مش زي ماقالولك فرنسي الصنع لا ده امريكي الوحده الخارجيه امريكي وهما من سنه 1913 بيعملوا تكييفات وهما من افضل الشركات في امريكا من ناحية ال customer reviews اما الوحده الداخليه فهي صيني بمواصفات ترين المعتمده . وتكييف samsung صيني بالكامل بتكنولوجيا كوري والكومبرسور بتاعه من نوع rotary compressor في 1.5 و 2.5 و 1.25 ماعدا ال 3 حصان فده من نوع piston compressor وده اعتماديته اكتر وده من واقع التجربه للمستهلكين والفرق بينهم ان الpiston فده من اسمه زي pistons العربيه دراع متحرك داخل اسطوانه لضغط غاز الفريون وده معمر جدا ولكن وخصوصا في المناطق شديده الحراره كالخليج وده الموجود في trane اما rotary compressor فده باختصار ريش تدور بسرعه عاليه لضغط الفريون وزي ماقال اخ فاضل مره قريتله في موضوع هنا وهو مهندس شبكات محمول وشاف ان الافضل والاقل احتياج لصيانه وده في محطات موبينيل هو trane وقال ان lg سئ وغير معمر ومشاكله كتير في مروحه ال rotary compressor والكلام ده منواقع مشاهدته . اما مكيفات craft فدي امريكي تقفيل سعودي وهيا موجوده في btech ولكن عرفت من واحد فني ان الوحده الداخليه واللي عليها ضمان سنه فقط بتضرب فيه كرتة الكهربا احيانا وده عيب شائع . و صحيح زي مااتقال ان الفرق بين sharp في الخارج وهنا كبير في الموديلات وكمان في استهلاك الكهرباء بقى الجديد والموجود في اوروبا اقل استهلاكا للكهرباء وهنا العربي بيجيب موديلات اقدم عشان ارخص والمكسب يكون اعلى وللتأكد راجع موقع sharp europe .
ملحوظه اخيره trane من الاجهزه الممتازه واللي ناوي اجيبه ان شاء الله ولكن مالوش دعايه في مصر ولا تستقي معلوماتك من اصحاب شركات التكييف عشان كل واحد بيقولك حاجه تخدمالمنتج اللي بيتعامل في وغير كده يقولك وحش وماتجيبوش واي هجص يعني عشان تجيب منه وبس. كلمه اخيره يونيون اير وباور الاسواء على الاطلاق ولا تستحق ان تكون شركات تكييف اصلا .
حجيب لك من الاخر
انا عندى فى البيت شارب و يورك بقالهم 3 سنوات
و امبارك ركبت فى شقة اخى سامسونج 1.5 و 3 حصان طبعا بعد مباحثات و مقارنات واسعة المدى و لا تتخيلها (لان نسيبى عنده شركة مكيفات و قد نصحنى حاليا بالسامسونج و طبعا سألت كتير و استقريت على السامسونج
بصراحة جهاز فوق اممتاز و صوته هووووووووس و تبريده محترم
و طبعا انا شفت الجهزه و هى بتتركب طبعا السامسونج محترم فى و صلاته و جودة مكوناته دا حتى بكر العزل جايه معاه غير ان وصلاته تفوق الاجهزه الاخرى بمراحل و حتى باعتين مع الجهاز الصلصال اللى هيسد مكان فتحة المواسير اللى ركبت فى الحيطه !!
و فى الاخر استخير الله و عموما فرق الاجهزه فى السعر مش كتير
شكرا على المساهمات الجميلة من الشباب
الموضوع قرب يصبح مرجع للي عايز يشتري تكيف
انا شخصيا كل معلوماتي مستقاه من البحث والسؤال فقط
وده اول مرة اقرر اشتري تكييف
طيب:
هل نوع mitsubishi
موجود في مصر
لان في مهندس لسه جاي من السعوديه شكرلى جدا فيه
----------------------
بالنسبه لترين:
ان فعلا اغفلت التكييف ده هحاول اكلمهم واشوف ايه الاسعار والتفاصيل التانيه (عشان تضاف على الموضوع هنا)
-----------
السامسنج:
الاراء عليه متضاربه ولسه جديد في السوق بس هو فعلا تكييف شيك وتكنولوجي ممتازة
وهنا في مصر درجات الحرارة مش زي دول الخليج
نفس الحاجة في سامسنج + حسب ماسمعت ضمان استبدالى وليس اصلاح خلال اول 6 شهوراقتباس:
ومقارنته ب sharp هي لصالح الشارب من منطلق ضمان شامل على الوحدتين الداخليه والخارجيه بالكامل لمدة 5 سنوات
وبالتالى الضمان متساوى في النوعين
انا هحاول اكلمهماقتباس:
ملحوظه اخيره trane من الاجهزه الممتازه واللي ناوي اجيبه ان شاء الله
لو ليهم خط ساخن ياريت تقلى عليه
واهى فرصة نشوف التكنولوجى بتاعته مقارنة بالانواع الاخري
---------------------
مجموع اراء الاعضاء حتى الان:
شارب : الافضل بالاجماع- مجرب من ناس كتير- ضمان صادق- وخدمة مابعد البيع ممتازة
العيوب: تكنولوجى قديييم
سامسنج: جهاز جديد في السوق
امكانيات حديثة اكتر من ممتازه +انه شيك جدا وملهوش صوت + اول دفعة من اي نوع جديد دايما المستورد بيجيب فرز اول بعدها الكلام بيتغير
العيوب: مفيش معلومات كافيه عن متانة القطع الداخلية + خدمات مابعد البيع لم يتم اختبارها بعد
ترين:
مرشح قول وسمعه عالمية كبيره
لاكن المعلومات غير كافيه بعد
يونيون اير: فاشل
اتفضل يا أخي الرقم المختصر لترين 19212 والفيديو ده من مصنع ترين
YouTube - Trane Air Conditioner - How It's Made
انا عايز اركب تكييف عندي و احتمال كبير جدا اجيب السامسونج بس انا كنت عايز اعمل حركة و كنت عايز اعرف منكم هي حتنفع و لا لأ .
عاوز اركب 2 تكييف كل واحد 1.5 حصان في غرفتين النوم بس في قدام الغرفتين صالة صغيرة مساحة كل اوضة حوالي 11 متر و مساحة الصالة الصغيرة 15 متر فكنت عايز اركب في كل غرفة تكييف و اسيب الباب مفتوح علشان يسمع برة .
ممكن ينفع الكلام ده و لاحيبقي ضغط علي التكييف و ممكن ميفصلش الكباس.
سامسونج او ال جي مش عارف موجود في مصر ولا لا بس هو:verygood:
تكييف ترين:
الرقم: 19510
الجهاز امريكي
التجميع في الصين
الكومبريسور صيني
النوع روتاري
الضمان:
5 سنوات على الكومبريسور
سنه واحدة على الجهاز
كده ترين خرج خارج المنافسة في رأيي
---------------
معلومات عن شارب الجديدpremium plus
(مقارنة ب premium )
البلازما ايونز: الضعف
امكانيه توجيه الهواء لاى نقطة في الغرفة عبر الريموت( الغرفة مقسمة 6 نقاط في برمجة الجهاز ويتم توجيه الهواء حسب رغبة المستخدم)
في حالة انقطاع التيار فان الجهاز يعمل ذاتيا عند عودة التيار ثانية
خاصية التنظيف الذاتي (تحتاج 45 دقيقة)
الميقاتى 24 ساعة
السعر: اغلى ب 300 جنيه عن ال premium العادي
+ القطع ياباني تجميع مصري
الكومبريسور يابني
الضمان 5 سنوات على كل اجزاء الجهاز
اهم العيوب: وجود رائحة غير محببة (حسب ما افاد به مراسلونا في المنتديات الاخري)
------------------------
سامسنج:
التصنيع كوري
التجميع صيني
الكومبريسور كوري نوع روتاري
الضمان 5 سنوات على الجهاز بالكامل
السعر ارخص من شارب
بص وانت ماشي على العمارات هتلاقي 70% من التكييفات اللى راكبه كاريير
اماكن الخدمه الشاقه (المحلات فروع البنوك المطاعم ) هتلاقيهم كلهم كاريير
مع انه ضمان سنه واحده وفيه مكونات صيني (مابقتش عيبه) الا اني اعتقد انه اقوى جهاز في السوق وعمري ما سمعت حد اشتكى منه .
بالامس اشتريت سامسونج ماكس حائطى 1.5 ب-س
سوف يتم التركيب اليوم
سوف اوافيكم بالاخبار اولا باول
الاخ عادل منتظرين تقريرك عن التكييف السامسونج .......
بصراحة بعد تكيف ال جى ارت كوول انسى صناعة كورى تقفيل تركى مستورد بالكامل منتظرين الاخ عادل تقريرك عن التكييف السامسونج
[overline]
السلام عليكم ورحمه الله وبركاته
بالنسبه لتكييف ترين .. صراحة اول مره اسمع عنه
اما تكييف شارب .. انا بستغرب ازاي من اهم عيوبه حسب كلامك وجود رائحه غير محببه
مع ان هو التكييف الوحيد اللي نازل بتكنولوجيا البلازما كلاستر .. اللي بتقضي على الروائح الكريهه في المكان
فأزاي هو نفسه يسبب رائحه غير محببه ؟!
انا معلوماتي ان اي تكييف يعمل رائحه غير محببه .. لو الميه في الحوض راكدة ( ودة بسبب عدم ضبط ميل او ارتفاع التكييف بشكل مناسب )
بالنسبه لمعلوماتك عن شارب بريميم بلاس .. فعلا صحيحه لأني اتصلت بتوشيبا العربي وقالي نفس الكلام
وسعر ال 3 حصان سبليت شارب برميم 5235 جنيه بارد / ساخن ( بارد فقط اقل ب 100 جنيه )
سعر ال 3 حصان سبليت شارب بريميم بلاس 5535 جنيه بارد / ساخن
لكن المشكله ان شارب عليه ضغط .. وتم تحديد موعد معاينه خلال 10 ايام ( وقت طويل اوي )
كمان خدمه المبيعات في توشيبا .. ضعيفه في معلوماتها ( يعني مش بيفيدك بشكل كامل )
يعني تقوله لو انا جبت الجهاز من موزع معتمد ليكم .. ايه نظام الضمان معاكم ( يقولك معنديش معلومات )
لو قولتله طب لو اشتريت التكييف من محل ولا شركه بتبيع شارب .. هيبقى الضمان من خلالكم ولا ايه ( يقولك معنديش معلومات )
لو قولتله طب اقرب موزع شارب لسكني ايه ( يقولك معنديش معلومات )
طب هل في تقسيط ( يقولك دي تكلم فيها مع الفني اللي هيعاين .. انا معنديش معلومات )
لو سألته ايه الفرق بين البريميم والبريميم بلاس ( يقولك انتظر دقايق اتأكد من المعلومه )
المبيعات ضايعه صراحه .. فأيه ظروف الدعم الفني والصيانه ؟
معلومه اخيره .. انا جربت كاريري سقفي مستعمل .. صراحه معجبنيش وكان صوته مزعج ( صوت الهوا بتاع المروحه شديد اوي وعالي .. مزعج مزعج مزعج )
فهل شارب له صوت ؟
[/overline]