الموضوع: حل مشكلة الاستهلاك العالي للبنزين في نيسان صنى و تغيير ضفيرة الموتور

طبعا هؤلكوا ايه اللي حصل في العربية اننهارده لكن ..........
اننهارده كانت احسن المفاجأت لما روحت توكيل السبع اوتوسيرفيس
أول حاجه اني قابلت ناس هناك من المنتدي و دي كانت احلي مفاجأة لى اننهارده و كانوا المهندس حاتم و الدكتور احمد عادل و الاستاذ محمد فوزي اللي اخدت اننهارده سبق و هؤلكوا ان الاستاذ محمد فوزي اشتري عربية نيسان اي اكس فيراني فاتح عربية ماشاء الله جميلة اوي .. الف الف الف مبروك يا استاذ محمد و ربنا يباركلك فيها ويديك خيرها و يكفيك شرها و ان شاء الله هتعيش بيها احلي لحظات حياتك
و بصراحة لما روحت السبع و لاقيت الناس الحلوة ديه كانت مفاجأة جميلة اوي اوي بالنسبة لي و فعلا ناس محترمة جدا و اتكلمنا و ضحكنا كتير اوي اوي لدرجة ان الناس في التوكيل بقوا يستغربوا اوي مين احنا و لاقينا ناس جاية يتعرفوا علينا و كمان هيدخلوا قسم نيسان و هيشاركوا و حسينا اننا نعرف بعض من زمان اوي .. ربنا يديم المحبة ديه علطول .
ثاني حاجه ان بشكر و من عمق القلب المهندس عمر و المهندس كريم اسامه و المهندس حاتم علي اهتمامهم الغير عادي بالعربية و جميع جروب السبع اللي الابتسامه مش بتفارق وجههم ابدا ابدا و كمان بشكر عم رجب ذو الوجه البشوش اللي اخدنا اننهارده انا و المدام بعربية التوكيل وودانا الي كارفور المعادي علي ما العربية يخلص الشغل فيها في التوكيل
طبعا عايزيين تعرفوا انا روحت التوكيل اننهارده ليه .....
من فترة انا عملت صيانة 15000 كيلو و كان من المشاكل اللي بتواجهني ان العربية بتسحب بنزين بشكل غير عادي ... فالمهندس عمر قال لي فول التانك و اعمل بيه 200 كيلو و بعدين شوف المتوسط و بعدين فول التانك تاني و اعمل كمان 200 كيلو وشوف المتوسط
المهم عملت كده فعلا ولاقيت ان العربية بتاخد 26 لتر في الـ 200 كيلو يعني حوالي 153 كيلو في الصفيحة علي الهادي جدا و الار بي ام لا يتعدي 2500 . طبعا ده كلام صعب اوي
المهم لما المهندس عمر و المهندس كريم لاقوا الموضوع كده قالوا ان الضفيرة لازم لازم تتغير
و من هنا تم تغيير ضفيرة الموتور اننهارده و جاري عمل الاختبار بعد التركيب
لكن احب اقولكم ان اول مشكلة لي اتحلت بعد تركيب الضفيرة ان العربية كانت لما بضرب فرامل ساعات كتيرة بحس بنقلة في الفتيس بتحصل معايا لكن بعد التركيب لاقيت ان المشكلة ديه لا يوجد لها اي اثر خالص طول سفري من القاهره
فدلوقتي انا فولت تانك العربية و هبتدي اعمل تاني الـ 200 كيلو واشوف المتوسط بعد تركيب الضفيرة و طبعا هقول الاخبار هنا اول بأول
واي خدمة


----------
تم تغير عنوان الموضوع بناء على طلب العضو

مشرف القسم
19ب

المشاركة الأصلية كتبت بواسطة emadsamy

غريبه رغم إنى إشتكيك من نفس الشكوى و أنا بسوق بنفس ظروف السواقه بتاعتك (سواقه هاديه -مافيش كيك داون- بدون تكيف معظم الوقت )و كان الرد إن دا العادى بتاع العربيه عشات الكتينه الحديد و عشان أتوماتيك و كان متوسط إستهلاكى 160 كيلو /صفيحه.(الكلام ده كان مع م/حاتم
فيا ريت توضيح أكتر عن ايه الى حصل عشان يغيروا الضفيره لإن ده من أكتر الأسباب الى مكرهانى فى العربيه و هل فى تحسن بعد التغير؟
معلش أنا طولت

أستاذ عماد انا لسة مركب الضفيرة امبارح بس و لسه تحت الاختبار و فاضل بالظبط 24 ساعة علي نهاية الاختبار عشان اكون عملت 200 كيلو و اعرف متوسط الاستهلاك بعد تركيب الضفيرة لكن في اعتقادي بنسبة 99% ان استهلاك البنزين هو سببه الفعلي الضفيرة لأن الضفيرة المصري بس في حالات فردية مش كل العربيات فيها عيب و هي الل عامله مشكلة سحب البنزين ده و هما غيروها لسببين ان متوسط الاستهلاك عالي و السبب التاني هو ان البوجيهات كانت مسودة بزيادة ... ارجو اني اكون افادت حضرتك و ان شاء الله بكرة بالليل هتلاقي نتائج اختبار الضفيرة

المشاركة الأصلية كتبت بواسطة import

مبروك على الضفيرة الجديدة يا باشا ، تم تغيرها فى الضمان بدون مقابل و لا دفعت كتير ، يا ريت توضح لينا و شكرا جزيلا

استاذ امبورت ... الف شكر علي مباركتك و الضفيرة اتغيرت في الضمان و مدفعتش ولا مليم خالص خالص و كل ده طبعا في توكيل السبع اوتوسيرفيس