الموضوع: طرمبة بنزين السبكترا

بسم الله الرحمن الرحيم

أولا ... أنا بقالي فترة سحب العربية مش عاجبني خالص وخصوصا في الحر ومكنتش فاضي اشوف فيها ايه

من كام يوم رحت بنزينة وفولت التانك كعادتي (غني جدا وما يهمنيش الفلوس) لقيت العربية بتقطع جامد ووصلت انها تبطل (عربية أوتو) وعمرها ما عملتها فضلت اسايس فيها لحد ما مشيت

وهيا ماشية كله تمام المشكلة تظهر اول لما اهدي واجي ادوس تاني الاقي التقطيعة دي وكمان فجأة عوامة البنزين بدأت تلعب وعداد البنزين خرف

قولت تبقى الطرمبة ومكدبتش خبر رحت لميكانيكي قاللي اه الطرمبة وكشف عليها قالي الموتور ضعيف ومحتاجة موتور وجابه وركبه بس العوامة معرفش يعمل فيها حاجة قولت مش مشكلة دلوقتي

بس العربية زي ماهيا وما حاسبتوش عالموتور

ثانيا
جبت أخري من الطرمبة قولت اجيب واحدة جديدة، كلمت حلمي سليمان والجندي ملقتهاش
قولت أمري لله أروح التوكيل وبالمرة اعمل كام حاجة مأجلهم بس اتصلت أحجز لقيت قدامي أكتر من اسبوع والموضوع مستعجل

رحلة العذاب

شديت الرحال النهاردة الساعة 7 وتوجهت لأبو رواش من هضبة الهرم ... وكنت الفائز وصلت ملقتش حد خالص قولت مصلحة وأخدت رقم 1 واستنيت شوية والناس بدأت تهل عليا
2 سيراتو شامبين وبعديهم بيكانتوهاية وبعدين كارينزاية وبعدين بيكانتوية كمان

الساعة 8 وربع فتحو البوابة ودخلت أول واحد خرج مهندسة استقبال ومهندس استقبال راحو على عربية رقم 2 ورقم 3 ... معرفش ليه بصراحة دمي اتحرق فضلت واقف شوية كانت المهندسة خلصت مع العربية رقم 2 ولقيت مهندس طلع من المكتب وجه عليا وبيسأل على رقم الحجز قولتله مش حاجز وعندي مشكلة عاجلة .. قالي النظام لازم حجز علشان اليوم متقسم على العربيات قولتله يعني أمشي ضحك وقالي للأسف هتمشي أو تسيب العربية تبات ليوم الأحد ونبص عليها الأحد

طبعا اتقفلت قفلة وحشة أوي ...

ثالثا: قولت اروح تكنو وان أهو الناس بتشكر فيه ... وشديت رحالي على الدائري بس فجأة جت على بالي فكرة وافتكرت موضوع حد قال فيه ان كيا القديم اللي في العبور (وليد توفيق) لسه بيستقبل عربيات قديمة سيفيا وسبكترا وبرايد

قولت مصلحة اروح اشوفهم واكيد هلاقي قطع العربية عندو لأني شاريها منه وكلمت للعبور واذ بي اتصدم ان المركز بقى هونداي ... لفيت شوية وقولت لأ ده هو المكان أنا فاكر كويس

رحت للأمن سألتهم قالولي كيا ورانا ... رحت لكيا ويالها من صدمة (عزيز قوم ذل) عبارة عن هانجر جواه كل الأعمال وفيه اتنين سيراتو بيتعملو سمكرة ومكتبين واحد مهندس وخزنة والتاني قطع غيار

قعدت مع المهندس وحسيت انه فاهم وشرحتله القصة قالي تمام وعمل أمر الشغل بس بما إن الدنيا هوا ومفيش حد لقيته بينده على الراجل بتاع المخزن وقاله عندك طرمبة بنزين ودراع اشارة وعتبة بلاستيك سبكترا
قاله اشوف المخزن

ورجع وياريته ما رجع .. قالي الدراع طفم كامل لازم تاخده على بعضه اشارة ومساحات 700 جنيه (في أبو رواش دراع النور 120 جنيه)

طيب الطربمة قالي 1500 جنيه (حلمي سليمان قالي 700 جنيه بس مكنتش عنده ساعتها وأبو رواش قالولي اسال عليها الأسبوع الجاي في التليفون)

قولت للمهندس الاسعار عالية شوية .. رد عليا لسه الضريبة والمصنعيات .. حسيت اني واقف وسط حرامية

سيبته ومشيت ولقيت مديري متصل يسأل على حاجات في الشغل ... رحت واخد طريقي للمعادي ورايح الشغل

جبت البلد شرق غرب شرق



الخلاصة:
1. التوكيل القديم ده انسووووووووووووه خالص محدش يفكر يروح
2. احجز قبل ما تروح ابورواش عشان ما يبقاش شكلك وحش
3. ما تدورش على طرمبة البنزين للسبكترا جديدة عشان مش موجودة - على الأقل اليومين دول


سلااااااااااااااااااااااا اااااااااااااااااااااام

وانا اللي فاكر اني انا بس اللي عندي مشكلة ... طلع الموضوع كبييييييييير والناس كلها بتدور عالطرمبة
عشان كده الراجل بتاع قطع الغيار ف أبو رواش أول لما قولتله طرمبة بنزين قالي هتيجي الاسبوع الجاي وافتكرت ان فيه واحد قارفه كل يوم ييتصل بيه يسأله

عالعموم أنا هاستنى شوية كد واغيرها كلها الجديد برضه بيريح الدماغ