الموضوع: حكايتي مع حادثة موتوسكل ( واتصرفت إزاي )

المشاركة الأصلية كتبت بواسطة ashussein

السلام عليكم وحمه الله وبركاته

تعرضت لحادث فجائي وحبيت انصح الجميع عن ما تعلمتة وكيفية التصرف في مثل هذا الموقف ( حماكم الله )

وانا ماشي علي مهلي جدا عادي يعني وكلنا عارفين الشوارع المصري ومره وحده لاقيت واحد بموتوسيكل رشق في بوز العربية من الجنب لدرجة اني شوفتة بيطير والله في الهوا والموتوسيكل في ناحية وهوا في ناحية

وقفت بالعربية مزهول ايه اللي حصل
حضنت علي جنب ونزلت اشوف فية اية
سبحان الله ربنا الهمي ابوص حولين مني وعلي مكان الموتوسيكل واللي سايقة وفوجيئت ان
فية لون اخضر علي الارض وعرفت فورا انها الماية الخضرة بتاعت الردياتير
بابوص علي الاكسدام والفبر اللي تحتة والفوانيس لاقيتهم كل واحد في ناحية

* اول شيء عملتة اني شوفت الناس متجمعة واللي سايق الموتوسيكل بيتحرك عادي وماسك دراعة بس اتطمنت شوية
*بدئت اتصرف بعقل شوية وضربات قلبي بدئت تهدء علشان افكر
*قلت بأعلي صوتي ياجدعان حد شاهد اني ما صدمتش الموتوسيكل ده وانه هوا اللي غلطان رد علية بعض الناس اللي اتلمت وحد قالي ايوه انا شاهد ان انتو الاتنين ترددتوا مين يدخل فادخلتو في بعض
*سألتهم فورا شايفين ( بأعلي صوتي ) ما فيش فرامل في الارض يعني انا ماكنتش بجري شايفين ياجدعان

وبعد كده جية سعادة اللواء ( امين الشرطه النجدة ) وكلمني بتناكة ( الرخص والبوطاقة )
قلتله (( من غير ما تكتب ان مافيش اثر لفرامل وان الخبطه من الجنب ))
رد قالي (( عارف عارف ))

قولت الحمد لله (( رد قال تعالو ورايا علي القسم ))
قلتلة العربية زي مانتا شايف (( ماتت ومش هاتمشي من مكنها ))
يا جدعان انا كل ده عاوزاثبت اني ماكنتش بجري (((((( واثبت ده في المحضر واني لو نقلت العربية وحصل حاجة للواد اللي سايق ها روح في 60 الفف داهيية ))
))
المهم والحمد لله خدهم ( الرخص والبطاقة )) الامين والظابط اللي مانزلش من العربية اصلا وقالي (( قفل العربية وحصلني علي القسم

المهم جت عربية الاسعاف خدت الواد وحد طرفة شال الموتوسيكل ومشي بية ( ركب الموتوسيكل لانة سليم وراح بية للقسم ))
لاقيت نفي واقف لحودي واشلاء العربية في الارض

المهم رحت لامم كل شيء جوة العربية (( كل الفتافيت )) وقفلتها علي ما واحد صحبي جالي بسرعة خليتة واقف جنب العربية

ورحت القسم
خلوا بالكوا انا لسه مادخلتهوش والعربيه لسه في مكانها

المهم قابلت (( الامين اللي خد الرخص والبطاقة )) اول شيء سألتة علي الواد قالي ان الواد في المستشفي بس الحمد لله سليمه دراعه مكسور بس ))

((( هرشت امين الشرطة من عينة انه طماع وعاوز اي مصلحة )))
قلتله ممكن اتصرف ازاي دلوقتي

قالي ممكن تخليني اكلم اهل الواد وتحاول تخليها ودي ( تتصالحوا ويدار مادخلت لها شر))

جريت علي اهل الواد لاقيتهم هما اللي بيصلحوني وخايفين مني (( طبعا والحمد لله مش انا اللي غلطان ))
المهم عرفت ان الواد بخير

وجت رحلتي بقي مع (( امين الشرطه بعد ما إتصافيت مع اهل الواد ))

قلتله عاوز اعمل محضر (( علشان شركه التأمين ))

ضحك وقالي ومالة (( انا فهمته طبعا انه عاوز فلوس ))

والله ما رضي الا ب (( 150 جنية )) علشان يعمل محضد ضد مجهول علشان شركة التأمين رغم انه عارف ان الواد بخير وان الموتوسيكل مع اهل الواد ومافيش اصلا غيري انا اللي متضرر

المهم عمل المحضر (( قلتله عاوز صورته )))

قاللي لالالالالا بعد 3 ايام (( من النيابة ))

المهم

رجعت العربية فورا وكلمت دليل التليفونات 140 سألتهم عن اقرب (( سيارات لخدمة حوادث الطريق ))
والحمد لله عرفت في النهايا ان ممكن تسأل عن(( اقرب بنزينه فيها الخدمة ))
المهم جت العربية بتاعت السحب دي من البنزينه القريبة علشان توديهالي التوكيل خدت ( 235 جنية )

المهم الحمد لله اخيرا العربيه في امان وبعد 3 ايام فعلا رحت اخدت صورة المحضر من النيابة بعد ما لفيت ال (( 7 )) دوخات وبرقم المحضر


الشيء المهم اللي عاوز اقوله
1- لازم تخلي معاك قلم وورقه في العربية (( غير معداتك العادية ))
2- لازم تتصرف بدون (( زعيق ولا خناقات ))
3-شاحن موبايل في العربية علشان ها تتكلم كتير
4- توقف العربية فورا مكان الحادثة وتعرف فيه اية

ولازم لازم لازم (( تمشي علي مهلك وبلاش سباقات شوارع مصر مش مستحملة ))

5- اوعي تسوق وانتا مش مركز او تعبان

واخيرا ادعو الله لكم بالاستفادة من تجربتي وان يحفظكم جميعا يارب

اخوكم

السلام عليكم جميعا اخواني
تكملة القصة

اولا - بالنسبة لل 150 جنية اللي انا اديتها للامين ده ماكنش غير علشان اصلا يرضا ان العربية تفضل في مكانها عند مكان الحادث وانها ماتتحرزش في القسم لاني عارف لو حصل كده العربية (( هاتتصفي وتتسرق تماما عفوا داخل القسم )) كان فيها طفاية حريق وكاسيت وشنطه عدة وشرحة شنطة اسعاف وغطا عربية جلد وفرش جلد كل ده كان هايروح
ثانيا- دفعت ال 150 جنية علشان كنت ها ادفع للبنزينة اللي بعتتلي عربية النقل والرفع 80 جنية للساعة وماكنتش عارف اني ها افضل قد اية في القسم
ثالثا- انا مش سازج علشان ادفع شيء رغم ان ده حقي بس الحكمة (( كان لازم ادفع علشان يغير نوع المحضر من تهمه لسواق الموتوسيكل وانه قانونا لازم يحضر ويمضي عليه وبالطبع العربية والموتوسيكل ها يتحجزو وضياع وقت علي الفاضي واصلا الموضوع خلص بره القسم بالتراضي )) غير نوع المحضر الي (((((( ضد مجهول ))))) وانة كان امام (( سرايا القسم ))

دفعت فلوس علشان ارحم نفسي والعربية من ظلم (( القانون في ظل الظروف دي - شغلي اروحو إزاي -الاولاد ومدارسهم- تقريبا كل ده كان هايتوقف لغاية التالي

لازم- طبيب شرعي يشوف الواد ويحرر محضر انه سليم
لازم ظابط يعاين مكان العربية ويؤكد سبب الحادث
لازم العربية تتفرتك وتتساب بره القسم جنب اخواتها وتتسرق وفي النهاية استلمها بعد المعاينة

عرفتم بقا انا دفعت لية 150 جنية علشان اخلص في يومها رغم اني مظللللللوم

بدل ما اشتكي الوضع وضياع الوقت والمال والبهدلة (( ومن غير ما اخد حق حد بالرشوة ))
دفعت فلوس علشان الموضوع يمشي صح