الموضوع: حوادث و نصائح ( تجارب حقيقية )

الحمد لله محصليش حوادث كبيره بس اخر حاجه حصلت لوالدي كان راكب نص نقل ونازل من علي كوبري مرغم في الأسكندريه واول ماانزل لقي زيت مغرق الطريق - طبعا زيت مع نص نقل ومش محمله العربيه عومت وكانت رايحه ناحية عمود نور والدي لم العجل قامت رايحه علي الرصيف اللي بين الحارتين شايلاه

والدي مكنش رابط الحزام فراسه اتخبطت في القزاز كسرته ودي كانت اول حادثه لوالدي بعد 30 سنه سواقه لدرجة ان والدي لما شافني عيط

العربيه طبعا اتبهدلت من تحت ومتظبطتش خالص واتباعت

انا باحييكم على الموضوع ده بجد رائع
هاحكيلكم أخرحادثه حصلت لى لانها كانت اقوى حادثه فيهم ..

اليوم : 3/6/2010
المكان : بعد نهايه مطلع الحى ال 11 فى الشيخ زايد
الساعه : 10 صباحا

فى اليوم ده سبحان الله كنت صاحيه متأخر و ميعاد شغلى اصلا الساعه 9 و لقيت جوزى صحى و قاللى استنى اوصلك لبسى الولد على بال ما البس و انزل معاكى و انا كنت دايما باعترض علشان مش لسه هاستناهم يلبسوا و كده

المهم وافقت .. وصلنا ابننا للحضانه و انا سلمته للمشرفه و رجعت اركب العربيه سبحان الله برضه انا دايما من انصار لبس حزام الامان .. بس المره دى قلت افكها على نفسى بقى لحد بس مدخل الشيخ زايد و اول ما نطلع على المحور البسه .. يا دوب خمس دقايق طلعنا المطلع و خلصناه و دخلنا فى الشارع الرئيسى و جوزى كان ماشى بسرعه 80 مثلا او 70 لقينا ميكروباص ماشى بيتمخطر من شارع جانبى يمين و وقف بينزل ناس فى عرض الشارع الرئيسى طبعا جوزى لانه كان جاى بسرعه ما لحقش يفرمل و العربيه اتدمرت من قدام تماما

انا ما حستش باى حاجه خالص غير انى شفت قزاز العربيه متكسر من الناحيه بتاعتى فتخيلت ان فيه حاجه خبطت فيه من بره
لقيت جوزى نزل يتخانق مع شواق الميكروباص .. نزلت احوشه لقيت الناس الى كانت متجمعه على جوزى و السواق و بيفضوا الخناقه سابوهم و اتجمعوا عليا و اللى بيصوت و الى بيقول اقعدى اقعدى .. اتارى انى بانزف من راسى جامد جدا
النتائج بقى :
العربيه اتدرمت من قدام
عندى الجبهه محتاجه متابعه مع دكتور تجميل
الدروس المستفاده:
الامان انى اسوق بحكمه و بالسرعه المعقوله حتى لو انا دارس المنطقه كويس و محترف سواقه .. انت واثق فى قدراتك شك فى قدرات السواقين اللى حواليك و توقع الخطأ من غيرك و سيب لنفسك فرصه انك تتفاداه
مهما كانت الدنيا فاضيه .. امشى فى الحاره المخصصه ليك .. ملحوظه ان جوزى كان ماشى فى نص الشارع و الشارع اتجاهيين اعتقد ان لو كان ماشى فى اليمين كان الموضوع هيكون ارحم شويه
و الحمد لله على كل شىء و ربنا يستر طريقنا كلنا

موضوووووووووووووع رائع

انا كان ليا تجربة وحيدة يارب متتكررش لانه بيكون احساس صعب وحالة اصعب ..

كان اول يوم شغل ليا رابع يوم العيد والدنيا فاضية ومكنش في مصر كان في الكويت

كنت ماشية بسرعة نسبيا عادية 100 تقريبا
في شارع اول مرة امشي فيه وداخلة على تحويدة مطلع كوبري .. فرملت وهديت ل حوالي 60 او 70
لكن التحويدة كانت حادة جدااا والعربية عومت مني وخبطت في سور الكوبري ورديت على الناحية التانية بعد ما النص اللي قدام من العربية اتدمر

الغلطة : حاجتين
1- ماشية في شارع معرفوش واول مرة امشي فيه يبقى التزم الحارة اليمين واهدي سرعتي
2- داخلة على تحويدة او ملف اعرفه او معرفوش لازم اكون مهدية جدااا جداااااااا محدش ضامن الملف ده شكله ايه

الضرر :
تلف في النص الامامي للعربية كله وخسرت الاير باج اللي فتحت ومش هعرف احط غيرها تاني وكنت شارياها من كام شهر ولما تمنتها بعد التصليح خسرت نص تمنها بسبب الحادثة دي

النتيجة عليا :
كل لما ادخل ملف بعد كده لااااااازم اهدي على الاخر وقلبي يفضل يدق لحد لما اخلصه
ولو راكبة مع حد وخد الملف بسرعة بيبقى قلبي هيقف ورجليا بتترعش من اللي شفته

وربنا يحمينا جميعا من شرور الطرق

http://www.nilemotors.net/Nile/148962-2009.html

السلام عليكم موضوع بجد كويس علشان نستفيد من بعض
اوقات مبتكنش الحادثه غلتطك بس بتبقى نصيب

الحمد لله انا طلعت منها سليم و بعد معاناه اربع شهور اخيرااااااااااااااااااااا اا هستلم عربيتى

المشاركة الأصلية كتبت بواسطة C500

طيب ممكن تحكيلنا على الحدثة ازاى حصلت علشان نقدر نجمع اكبر قدر من الاخطاء علشان كلنا نتعلم ونستفاد
وشكرا لك

يا باشا انت تأمر
كنت ماشى على الكرنيش راجع من سيدى جابر ماشى 50 قدام سان ستيفانو عربيه فيرنا عدت الجزيره و مره واحده لقيتو فى وشى ملحقتش المس الفرامل اصلا خبطنى فيس تو فيس هوا وقف فى ماكنه و رجعنى بظهرى 20 متر فى وسط الكورنيش و طلعنى على الجزيره طبعا انا مدرتش بحاجه بعد ما الاير باج طلع طبعا بذكائى مكنتش رابط الحزام علشان مكنتش بجرى و ده اكبر غلط عملته

طبعا العربيه اتدمرت من قدام و انا جرح فى راسى و تمزق اربطه ايدى و اشتباه ارتجاج و بس الحمد لله طبعا

الباشا الى كان سايق الفيرنا بقى اولا مش عربيته ثانيا ظابط فى المرور و رتبته ملازم اول بس هوا اتخرشم انا مشفتوش هوا الاسعاف جت خدته لانو مكنش فايق انا الحمد لله اغمى عليا دقيقه تقريبا بس نزلت من العربيه على رجلى طبعا بقى مشاكل و حوارات بقالها 3 شهور و طبعا كلو عاوز يخدم الباشا بس البلد دى غريبه لو معاك كوسه كلو بيمشى و الحمد لله اثبت كلو فى المحضر بعد مكان هيتكوس و كانو عايزين يبيتونى فى القسم
جبت 3 محامين ورافع قضيتين و التالته فى السكه انا مش ناوى اسيبه ابداااااااااااااااااااااا اااااااااا
الرجال المحترم مكلفش خاطره انو يسأل اصلا و لا حتى مقدم رخصه قيداه صباح الفل يعنى

المهم انا عربيتى هتلمها قريب اوووى ان شاء الله و عملت عليها حبه تعديلات

نصيحتى كلنا شباب و بنحب نجرى بس الحزام بيفرق اوى بجد انا لو كنت رابطه مكنش حاجه حصلتلى
الحادثه بتحصل فى اقل من ثانيه سواء غلطك او لاء

قدر الله وماشاء فعل. احمد ربنا ياتامر انك نزلت علي رجلك ده حادثة وش في وش يعني اقل واجب ( لقدر الله ) خبطة دماغ الازجاج الامام. ولا ايرباج ولا حاجة ربك سلم بس وستر . ومتزعلش عالعربية اللي ييجي في الحديد ميتبكيش عليه. وحمد الله هالسلامة