ما اهى افضل المدارس فى نطاق التجمع - القطامية - مدينة نصر

**KarimAbulEla** · 20-02-2008 10:07 PM

الاخوة الاعزاء بعد التحية
كما نعلم جميعا ان خبرات اعضاء المنتدى تعدى موضوع السيارات و تطرق لكل مجالات الحياة و انا من هذا المنطلق استغل فرصة بحثى عن مدرسة مناسبة للمجننى فى حياتى - زياد - حيث انه سوف يكون فى 18 اكتوبر القادم اكمل اربع سنين و اريد ان تشاركونى ارائكم فما هى المدارس المتاحة فى نطاق التجمع او مدينة نصر او القطامية فى رنج ال 6 ال 8 الالف التى لها سمعة جيدة او يكون لاعضاء المنتدى اولاد بها فاستفيد من تجاربكم .

شكرا جزيلا

**Sherif Khalifa** · 20-02-2008 10:18 PM

مصر 2000
اخر طريق الحى العاشر بعد الدائرى

اكثر من ممتازة

بحوالى 5000 جم سنوى

**Sharky** · 20-02-2008 10:30 PM

حلو قوى الموضوع دا يا كريم لإن أنا برضه عندى عمر و حيتم الـ 4 سنوات فى شهر 6 يعنى برضه واقع فى نفس الحيرة بتاعتك و برضه نفس المناطق

يا ريت الأعضاء إللى يعرفه حاجة كويسة يقوللنا

**fahd_628** · 21-02-2008 12:06 AM

بجد يا جماعة حاولو تدخلوهم فرنساوى بجد حينفعهم جامد و عن تجربة لأنة الولد حيطلع بيعرف فرنساوى و انجليزى تمام و حينطق الفرنساوى و الأنجليزى تمام لكن لو دخل انجليزى حيعرف انجليزى تمام بس فرنساوى مش قوى و برضة النطق فى الفرنساوى حيبقى مش اوى و حتى لو عاوز يقوى الأنجليزى بتاعة اكتر بكورسات حيبقى 100% و لكن لو هوة انجليزى طبعا ممكن ياخد كورسات فرنساوى بس مش حتبقى سهلة لأن الفرنساوى مش سهل زى الأنجليزى + ان الأنجليزى حيتعلمة حيتعلمة لأنة اكيد حيقعد على الكمبيوتر و حيلعب علية العاب و حيقعد على النت و حيخطلت بحاجات كتيير حتخلية يعرف انجليزى كويس

بس حيبقى طبعا فية عيب ان نطاق المدرسين الخصوصين حيبقى محدود لأنة حيدرس الرياضة و العلوم بالفرنساوى و الكتب الخارجية مش حيلاقى الا قليلا حاجة بالفرنساوى للرياضة او العلوم

انا دة رأى و طبعا اللغات بتنفع فى المستقبل

و شكرا

**casper2010** · 21-02-2008 12:42 AM

فيه مدارس عربي و لغات ازهرية منها :
الكمال و الموقع بتاعها ده http://www.alkamalschools.net/
و فيه مدارس الغد المشرق في التجمع بس معرفش الموقع بتاعها
و فيه مدارس منارة الفاروق بيقولوا عليها مستوي غالي جدا

**Sherif Khalifa** · 21-02-2008 12:50 AM

المشاركة الأصلية كتبت بواسطة fahd_628

انا دة رأى و طبعا اللغات بتنفع فى المستقبل

و شكرا

انا متفق مع حضرتك ان اللغات بتنفع
بس بعد مرمطة فى سوق العمل فى مصر و الخليج و بعض البلاد القليلة
الانجليزى هوا الاساس فى كل حاجة
تقريبا مشفتش حد بيستعمل اى لغة اخرى غير فى مجالات السياحة و خدمة العملاء

بس انا عن نفسى لما يبقى عندى اولاد انشاء أللة هختار ان الغة الاولى انجليزى و الثانية المانى
اصل بصراحة نفسى استغل الفرصة و اتعلم معاهم :):)

**OlaOsman** · 21-02-2008 07:01 AM

في مدرسة اسمها نور في القطامية لسه فاتحة السنة دي جديد بس 3 من أصحابي مدخلين ولادهم فيها و بيقولوا عليها ممتازة.. تعليم مستوى عالي و منهج انترناشيونال و تعليم سلوكيات من منظور إسلامي و مصاريفهم في الرينج اللي انت بتدور عليه يا كريم و ده رقم تليفون من تليفوناتهم 0125298813

منارة الفاروق برضه اسمع انها ممتازة.

**ecybrarian** · 21-02-2008 07:08 AM

في مدرسة جنب جولف القاطمية اسمها مصر للغات وفي مدارس طيبة كمان (في واحدة في التجمع وواحدة تانية عند نادي الصيد امام كارفور)

**KarimAbulEla** · 21-02-2008 02:28 PM

اشكركم جزيلا على كل معلوماتكم القيمة التى قمتم بالافادة بها و ان شاء تبقى مرجع لنا جميعا و يستمر باقى الاعضاء فى افادتنا بما هو مفيد فى هذا المجال ، انا باذن الله سوف ابدأ الاسبوع بعد القادم فى زيارة هذه المدارس و انهاء موضوع التقديم ان شاء الله