الموضوع: عربية شرطة كسرت الفانوس الخلفى .. الحمد لله

اللى حصل انى ماشى فى امان الله و الشارع اصلا واقف و ميخدش غير عربية واحدة و كان معايا المدام و الاولاد و مرة واحدة سمعت صوت خبطة جامدة ورا و صوت حاجة اتكسرت .. نزلت اشوف فى اية لقيت عربية شرطة خبطتنى و كسرت الفانوس الخلفى يمين .. انا اصلا من ساعة مشفت انها عربية شرطة و انا سخنت و قلت مش هسيبة .. المهم الشارع كان فاضى من المارة و مرة واحدة لقيت جنبى 3 من اللى بيطلعوا فى كل حادثة .. و معلش يا بية دة عسكرى غلبان و انت هتقبل العوض و انت معاك عيال و الخ الخ .. و العسكرى يقولى الفرامل سايبة و رايح يجيب عمود كردان .
قلتلة انا مليش دعوة و لا بفراملك و لا بكردانك انتى ماشى فى شارع وسط عربيات و ناس و سواء كان الخبطة دى بخطأ شخصى منك او انك طالع بعربية مفيهاش فرامل انا مليش دعوة .. و من اتلف شىء علية اصلاحة و لا انت فاكر عشان عربية شرطة هتعمل اللى انت عايزة .. لا يا بية انا مقلتش كدة و اللى اتأمر بية قلتلة الفانوس دة تمنة 500 جنية طبعا الواد تنح و لقيت واحد بيقولى دة عسكرى غلبان و انت كدة هتأذية و هيدفع فلوس منين .. قلتلة و انا ذنبى اية اللى مشغلينة يدفعوا او يتحاسبوا .
و لقيت الواد بيتصل بالظابط بتاعة و كان باين انة بيتظبط شوية شتيمة و شوية تهديد و وعيد و بقى عامل زى الفرخة الدايخة و ابتدا يصعب على الناس و واحد يقولى الظابط هييجى يديلة المين و خلاص و انا كنت ابتديت اهدى شوية و ابتديت ازهق و اصلا كنت مستعد ادفع اى مبلغ بس اوصل البيت لانى كنت فى غاية التعب .. بس لازم اعمل كدة على الاقل يحس انة غلط و يتحاسب .
المهم يا ريت لو حد يعرف ثمن الفانوس الخلفى كام فى التوكيل و برة .. و الحمد لله الذى لا يحمد على مكروه سواه

شكرا يا باشا .. و الله انا اسة مش عارف اغيرة بالكامل و لا اغير الوش بس .. انا سألت على الوش فى شركة الاهرام لقيت منة مصرى ب 45 جنية بس خامتة تعبانة قوى و لقيت الصينى ب 90 جنية و بعدين مش عارف لو اشتريت الوش بس مين هيركبة صح