المشاركة الأصلية كتبت بواسطة meemo
روحت يوم الخميس اللي فات عملت صيانة ال5000 واللي حصل بالتفصيل كالاتي بس في البداية هكتب الفاتورة والتعليق علي الاسعار هسيبوا ليكم
العمليات المصنعية
تركيب كاست وسماعات 100 جنيه
ضبط اكصدام خلفي 25 جنيه
صيانة 5000 50 جنيه
الاجمالي 175 جنيه
قطع الغيار والخامات الكمية الاجمالي
لمبة زئبق 20 جنيه
زيت موبيل سوبر 1 لتر الكمية (3 ) 99 جنيه
فلتر زيت 40 جنيه
الاجمالي 159 جنيه
خصم خاص 2.5 (لا تعليق) وخاص امال لو كان خصم عادي
مصروفات اخري 10 جنيه (بتاعت ايه المصروفات الاخري مش عارف)
ضريبة مبيعات 33
الاجمالي 374.5
معلش طولت عليكم بس لما رجعت فاتورة صيانة الالف الاولي كان نفس كمية الزيت 90 جنيه؟؟؟؟؟؟
كان سعر فلتر الزيت 45 جنيه؟؟؟؟؟ مش فاهم ايه الاختلاف انا كنت عامل الالف الاولي في الدقي وال5000 في ابوراواش
احكي باه وصلت بسلامة الله للتوكيل الساعة عشرة علشان الطريق كان واقف كان رقمي 25 ومكنتش حاجز ركنت العربية ودخلت الاستقبال حاجة غريبة لاحظت حاجة في الاستقبال مفيش مثلا شاشة تليفزيون علشان تتفرج الجريد اللي موجودة نسخة واحدة من الاهرام وزيها من الاخبار وكل واحد يستني التاني لما يخلص
المهم ربنا كرمنا وجيه الدور علينا بسرعة علشان الظاهر اللي كانوا قبلنا زهيقوا مشيوا فنادوا من رقم 13 لغاية رقم 25 ومحدش كان موجود جيه المهندس خير العربية فيها ايه طبعا خلت المدام هي اللي تكلم معها علشان هي اللي بتسوق العربية
قلتلوا بسمع صوت تكتكة في الخلف من العجل بس اي ناحية مش عارفة بص جوا العربية وسال بنفور واستغراب انتوا مركبين فرش قلنا ايه ومركبنوا بره قلنا اه هز الكنبة شوية وقال الساعة 3 هتكون خالصة انشا الله
دخلت العربية وابتدوا يركبوا الكاست وركبوه في مكان انا شايف انه كويس خلع مكان الهوايات بتاعت التكيف وركب مكانها يعني لاقص ولا حاجة ومكان قريب من السائق
طبعا المدام كانت عايزه تشوف بيعمله ايه في العربية دخلت الورشة وفضلت تتفرج ربطوا العفشة وبعد شوية رحت اتفرج لقيته فك حاجة من العجلة الشمال اللي وراء وركب مكانها حاجة جديدة طبعا قلبي وقع في رجلي وقلت ربنا يستر علي التكاليف المهم خرجت العربية وراحت السمكرة ربطوا الاكصدام وبعد الغسيل المهم خرجنا الساعة 5 بالدقيقة اخر ناس خرجين
المهندس وهو بسلمنا العربية قال انهم غيروا المساعدين علي حساب الضمان علشان صوت التكتكة كانت منه
بس وانا طالع علي الطريق وبهدي سمعت صوت صريخ في العربية من ورا جامد جدا
وبعدين سمعته تاني بس اقل لما وصلت فيصل ومسمعتوش تاني مش عارف ده علشان المساعدين جدد ولا ايه
بس بصراحة ربطوا العفشة تمام العربية وهي ماشية وخصوصا في الشوراع الجميلة في فيصل كانت بتصدر اصوات مزيكا وبترقص منها كمان