تحذير من خدمة كليب بلس في موبينيل

**MRBEBO** · 04-07-2010 04:49 PM

انا جربت يا جماعة خدمة كليب بلس +Clip من موبينيل فترة شهرين تقريبا

واللي ميعرفش الخدمة دي

هي عبارة عن خدمة رسايل بتبلغك بكل واحد حاول الاتصال بيك لما يكون تليفونك مقفول او خارج نطاق الخدمة

الرسالة بيكون فيها رقم الطالب وتاريخ ووقت المكالمة وعدد مرات الاتصال

وعاوز اقولكم تقييمي ليها علشان اللي بيفكر يشترك

طبعا الخدمة بالنسبة لنظام الكارت ب 5 جنيه شهريا والاشتراك عن طريق 442

المهم اول ما اشتركت كانت الخدمة ممتازة جدا ومفيش فيها اي مشاكل خالص

الكلام ده تقريبا في اول اسبوعين تلاته بس بعد كده بدات المشاكل

الخدمة ساعات توقف تماما يعني مفيش اي ارقام بتوصل

وساعات ارقام توصل وارقام متوصلش

وساعات فترات معينة من اليوم الخدمة شغالة وفترات مش شغالة

طبعا اتصلت وعملت شكوى

وفعلا رجعوا معايا كل حاجة وقالولي الخدمة شغالة تمام واتاكدوا ان المشكلة مش من عندي

المهم الخدمة رجعت اشتغلت يوم واحد وبعدين ولا حس ولا خبر المشكلة رجعت تاني واسوء

يعني الخدمة وقفت خالص بقالها اكتر من 10 ايام وعملت بدل الشكوى 4 ومفيش اي نتيجة

واخر مرة خدمة العملاء قالتلي ان المشكلة عامة في الشبكة لان فيه كذا عميل بلغ بكده

والمشكلة انها ولا قالتلي امتى هتشتغل او هل فيه تعويض عن كل الايام اللي الخدمة وقفت فيها

وحاسس ان خدمة العملاء مش بيهتموا بالشكاوى قوي وان كل وظيفتهم انهم يهدوا العميل ويمتصوا غضبه بس بدون حل

المهم انا حبيت احذر الناس من الاشتراك في الخدمة دي لانها مش مستقرة حاليا وكلها مشاكل

ولو فيه اي اقتراحات انا معاكم

**m_car** · 04-07-2010 06:41 PM

هو فى لسه حد ياعم شايل خط موبينيل

الشركة دى احسن حاجة ليها تصنع قلل وكابانيهات

ياعم دى خسرتنى خسارة فى شغلى منهم لله والله

**pro_samir** · 04-07-2010 07:24 PM

أم نبيل دي دي حرامية بجد

احنا عاملين ضدهم كذا شكوي بسبب السرقة بتاعتهم في الفواتير علي خطوط الشغل

لاحظنا زيادة الفواتير تدريجيا وطلبنا فاتورة تفصيليلة طلعو عنينا كذا شهر علي ما جابوها واتفاجئنا ان مكالمات فريق العمل اللي هي المفروض مجانية بيتدفع ليها اشتراك بنتحاسب عليها وكمان التسعيرة مش ثابتة مرة ب15 قرش و مرة 25 وقمة الأستهبال يعني قعدو يسرقونا شهور طويلة من غير ما نعرف يعني سرقو ألافات

وفي الأخر وقفنا الخطوط وبعتنلهم اخطار رسمي وبرضو فضلو يطلعولنا فواتير ويطالبونا بيها !!

عادي يعني لما يلطشو الخمسة جنية وميشغلوش الخدمة :)

**hazoom2006** · 04-07-2010 07:37 PM

الخدمه عندى شغاله مجانا من اكتر من سنة ونص تقريبا

والايام الل فاتت شغاله عادى مفيش مشاكل هيه اه كانت بيجليها ايام والرسايل ببتاخر او متوصلش بس بتتظبط تانى بعد كده

بس الفتره اللى فاتت شغاله مظبوط