الموضوع: أرجوك..التوقف فجأة مش قرارك لوحدك

المشاركة الأصلية كتبت بواسطة sara2001

عن نفسي المعاناه في الحالتين

يعني انا حصلي قبل كده حوادث سير ومازلت اجد صعوبه في التعديه في اماكن لدرجة اني اركب تاكسي يعديني في شارع زي صلاح سالم مثلاً

ومع ذلك اكتر ناس بخاف منهم وانا سايقه المشاه والموتوسيكلات
لما اعرف اهدي اللي بيعدي يتمخطر في الشارع
ولما ما ينفعش اهدي تلاقي اللي بيعدي رمى نفسه فجأه في وسط الشارع
وكله كوم واللي بيعدوا في الملفات واللي بينزلوا او بيجروا يركبوا الأتوبيسات في منتصف الشارع

آخرها النهارده حصلي موقف مع واحد من المنتحرين اللي بيجروا وراء الأتوبيسات وهي ماشيه
كنت في اليمين وراء اتوبيس بيحمل ركاب وواقفه ودايسه على الفرامل ومستنيه الأتوبيس يمشي لأني هدخل اول شارع يمين
وجه من على شمالي اتوبيس تاني عايز يطلع امام الأتوبيس اللي انا وراه وفجأه سمعت صوت خبطه في شنطة العربيه من ناحيتي وهبد في العربيه والأرض
انا افتكرت ان الأتوبيس خبط لي الشنطه وكسر الفانوس ووالدي نزل بسرعه يشوف في ايه
المفاجأه ان طلع في واحد من البياعين بتوع الأتوبيسات اللي معاهم بطاريات وحاجات كده كان بيحاول يركب الأتوبيس ده وهو ماشي ولأن الأتوبيس ماوقفش وقع هو بين الأتوبيس وخبط في العربيه وبعدين وقع في الأرض هو وحاجته
مش عارفه اقولكم حجم الصدمه عندي لما شفت ان في واحد واقع تحت وراء العربيه ووالدي بيسأله ايه اللي حصل ووقعت كده ازاي وانت كويس وحصلك حاجه؟
وهو بكل بجاحه عمال يهلل ويزعق لنا ويقول ان احنا السبب علشان واقفين وراء الأتوبيس
واحاول افهمه ان انا ما اتحركتش من مكاني وان هو اللي غلطان ومش المفروض تركب الأتوبيس وهو ماشي في منتصف الشارع ومنتظرينه يلم حاجته اللي وقعت من على العربيه وتحتها وبعدين نمشي
ومفيش فايده مش عايز يعترف بخطأه وعمال يدعي علي ويزعق ويهلل .... حسبي الله ونعم الوكيل
وطبعا ً لولا ان والدي معايا مش عارفه كان عمل ايه اكتر من كده
كل ما اتعرض لموقف من المواقف دي بحس ان انا مش سعيده على الإطلاق بفكرة العربيه

دا بقى الجهل بعينه أن اللى قدامك يبقى غلطان ويدعى عليكى ودى اكتر حاجه ممكن تخلينى ساعتها من وجهه نظر الناس دى وفكرهم المتخلف مفترى وجبار