الموضوع: من قائد موتوسيكل الى قادة السيارات ..... ارحمونا الله يرحمكم

بعد شهر من قيادة الموتوسيكل في مختلف انواع الطرق (محور, دائري, شوارع رئيسية و غير رئيسية, طرق صحراوية) ...

بجد يا جدعان ارحموا ركاب الموتوسيكلات !!!

1- لما تعدي من جنب موتوسيكل .... عدي من شماله .... هو ما بيبقاش متوقع انك تعدي من يمينه ...... انا امبارح مش اقل من 10 عدوا من يميني بسرعات تتجاوز سرعتي بما لا يقل عن 100 ...... يعني كان ممكن يشيلني و انا باعمل مناورة عشان اتجاوز مطب او حفرة لاني بابقى عامل حسابي ان يميني فاضي

2- الموتوسيكل صغير صحيح ....... بس ليه حق في حارة زيه زيك ..... ما تزنقوش بينك و بين العربية التانية ..... و ما تقعدش تقلب له نور و هو واقف بالطول بينك و بين اللي قدامك ..... صدقني ال 2 متر دول مش هيوصلوك بدري اكتر من 5 ثواني !!! و اما تتخطاني لف من برة الحارة ما تزنقنيش في نص الحارة من فضلك ......

3- بلاش تستخسر في الموتوسيكل انه يعدي منك و الدنيا واقفة او زحمة ...... فيه ناس بتبقى واقفة بينها و بين الرصيف او الجزيرة الوسطى مسافة نص متر من الناحيتين ...... لو حضنت على ناحية و سبتني اعدي هاكون شاكر ليك ..... انت مش خسران حاجة بس انا هاكسب اني هاسلك نفسي ..... مما يقودنا الى رقم 4

4- كتير جدا في الزحمة الاقي ناس ظراف حلوين بتقفل عليا الغرزة ..... مع العلم ان الفراغ اللي انا هادخل فيه يعديني بالعافية يعني مش هيدخل عربية الا لو كانت عربية سفنج !!!!! و مع ذلك يتعمد يقفلها لي ببوزه عشان ما اعديش ...... طب ليه ؟؟؟؟؟؟؟؟؟؟ عملا بمبدأ يا نعيش سوا يا نموت سوا و لا بمبدأ لو انا مش هاوصل انت كمان هتتلطع جنبي

5- الحارة اليمين هي اللي المفروض الموتوسيكل يمشي فيها ..... انا معاك ..... بس للاسف عمليا ده مستحيل لان الحارة اليمين و جانب الطريق عادة بيبقى مليان نقر و حفر و مطبات (هتضايقك شوية و انت سايق عربية بس ممكن تقلب الموتوسيكل تماما !) و مشاة ظراف خفاف واكلين فول و بصل و عندهم تناحة تكفي بلد سادين عليك الطريق ........ فمن فضلك لما امشي في نص الطريق ما تظهرش تأففك ...... غير اني ماشي على 100 زيي زيك يعني مفيش اصلا داعي لمشيي على اليمين !

6- الموتوسيكلات المصنوعة للتصدير لامريكا و معاد تصديرها لمصر نورها ما بيتطفيش ...... ما تخنقنيش كل شوية بالنور و تقول لي اطفيه !!!!!! نوري مضايقك في ايه بالنهار يا اخي؟؟؟؟؟؟

7- الاظرف بقى ..... لو باتجاوز عربية طويلة (مقطورة او تريلا) على طريق سريع حارتين .... و التريلا يمين و انا باتجاوز من الشمال و انت ورايا عاوز انت كمان تتجاوز ..... معلش تعالى على نفسك دقيقة لحد ما اعدي التريلا و بعدين عديني ..... معلش بس لو سمحت اصلي باتضايق لما باقع و اتهرس تحت عجلات تريلا !!!!

8- اجراءات قيادة الموتوسيكل بامان في كل دول العالم تتطلب مني اقلب لك النور و اديك كلاكس قبل ما اتخطاك عشان اتاكد انك شايفني في مرايتك ..... حتى في امريكا و اوروبا اللي الكلاكس فيهم ممنوع للسيارات للضرورة, مسموح للموتوسيكل في وقت التخطي ...... ما تاخدهاش بشكل شخصي بعد اذنك .....

9- من فضلك ما ترميش عقب سيجارتك من شباك عربيتك ..... معلش اصلي مش عايز هدومي تتحرق و لا عيني تطير ...... لو سمحت ...... كفاية علينا البقر بتوع التريلات اللي شايلين رمل و زلط و سن و ماشيين من غير تغطية الحمولة لحد ما الواحد اتصنفر من الرملة !!!

10- من فضلك ما تفضيش كباية الشاي و لا ترمي علبة البيبسي الفاضية و انا وراك برضه !!!

11- من فضلك بلاش تعامل قائدي الدراجات النارية بطبقية و عنجهية ...... للاسف اكتشفت ان الكثير من راكبي السيارات مقتنعين ان راكبي الموتوسيكلات دول درجة تانية و المواقف كتير ....... اللي متضايق اني واقف قدامه في طابور محطة البنزين (انا جاي قبله بخمس دقايق !!!) و عمال يضرب كلاكسات و انا بافول و في الاخر اتحرك و خبطني عمدا !!! ...... و اللي داخل الصينية عكس و كان هيشيلني ..... و اما قلت له "إييييييه؟" مستنكرا ..... رد و قال لي "جتك الأوى !!" ......


ملحوظة على رقم 11: بعض راكبي السيارات يجهل قيمة الدراجات النارية ..... و يجهل انها احيانا بتكون اغلى من سيارته نفسها !!!!!!

12- انا مش "كابتن" و لا "وله" و لا "ريس" ......

13- زي ما في قائدي السيارات ناس كويسة و ناس ضاربة (ميكروباص, تريلا ... الخ) زي ما برضه في قائدي الموتوسيكلات ناس كويسة و ناس ضاربة ..... !

14- يا ريت تخلي بالك من برك المية .... لو انت مش هامك الباب و العتب بتوعك يتوسخوا ..... انا عايز هدومي تفضل نضيفة !





بس كده و لو افتكرت هازود.