السرقة مش زادت شوية فى مصر اليومين دول ولا ايه

**Ah.Farid** · 21-02-2008 03:02 PM

واضح ان ارتفاع الاسعار وانخفاض الاجور لة تأثير كبير على الناس فى بلدنا لان معدلات السرقة فى البلد بيزيد
كل يوم اسمع من واحد صاحبى ان موبايلة اتسرق وكل شوية الاقى مصيبة سواء نصب او سرقة
ياترى اية الحكاية ؟
هل احنا مقدمين على ايام سوداء ؟ لان احساس الامان بيقل كل شوية
كمان معدلات التثبيت بالاسلحة البيضاء مابقيتش فى المناطق المترفة فقط دة بقت فى الشوارع المزدحمة كمان
وكمان الخناقات فى الشوارع فى ازدياد
هل الحالة الاقتصادية وسياسة الزحام بتتفاعل مع الناس لهذة الدرجة ,,,,,مش عارف
احساسى ان احنا قربنا اننا نعيش فى غابة فعلية
يمكن اكون متشائم شوية بس حوادث السرقة شغالة بزيادة
يجوز القاهرة والجيزة عاوزين اعادة تأسيس وتعليم من اول السطر

..........................
تم النقل إلى القسم المختص
الإدارة -3

**sherif_84** · 21-02-2008 03:27 PM

أنا معاك يا أستاذ أحمد فى الكلام اللى قلته فعلا ربنا يستر علينا من الأيام الجاية وفعلا فى عربية لانسر جديدة 2007 اتسرقت من قدام بيتنا كانت بتاعت واحد جارنا وطبعا هو بلغ لكن تلاقيها دلوقتى اتفككت واتباعت فى غمضة عين كمان فى عربية اسبكترا و مازدا قديمة فتحوا الشنطة وسرقوا منها شوية حاجات ربنا يسترها على عربياتنا
اللهم احفظ أموالنا وأموال المسلمين
يارب خلصنا من الحرامية اللى زادوا فى البلد

**analyzer** · 21-02-2008 03:44 PM

ارتفاع الاسعار + قلة الاجور + البطالة + البعد عن الدين = فشل تام وانهيار للمجتمع
مما ينتج عنه كل الافعال الا اخلاقيه التى نراها فى حياتنا اليومية .

حسبى الله ونعم الوكيل

يمهل ولا يهمل

جى رايح منه له

**Ah.Farid** · 21-02-2008 04:35 PM

على فكرة انا كل يوم اسمع عن طريقة جديدة فى السرقة او النصب
يعنى تسمع اللى يقولك حرص على ان سنتر وزجاج العربية يكون مغلق وانت ماشى لانك ممكن تقف فى اشارة فجاة تلاقى واحد حاطط مطوة فى رقبتك وياخ منك المحفظة والموبيل
ومرة تانية يقولك ما تمشيش فى الشارع وانت معاك شنطة حتى لو مفيهاش حاجة ممكن تتشرط الشنطة ويتاخد اللى فيها بدون ما تحس (سواء فيها حاجة غالية او رخيصة )
المهم هاتتقلب يعنى هاتتقلب
اثنين من اصحابى اتسرق منهم موبايلات فى اسبوع واحد واحد N95 والتانى 6600
وبنفس الطريقة بيتسحب من جيب الجاكت واحد فى وسط البلد والتانى فى مدينة نصر

المهم لما بيجى يعمل بلاغ (محضر )فى القسم تلاقى عدم المبالاة وان شىء طبيعى ومحدش عاوز يعمل حاجة الا لما يعرف ان ليك معرفة فى حتة عشان الناس تتحرك

حتى وكيل النيابة مش فاضى يقابل حد بس اول ما يجيلوا تليفون صغير من المعرفة يبقى كلة تمام يا فندم
وتلاقى الموضوع بدأ يتحرك ,,,,ويعنى اية يتحرك يا دوب يطلعلك جواب لشركات المحمول لتتبع التليفون
وانت وحظك ممكن بعد اسبوع او شهر يعرفوا التليفون فين دة لو ربنا بيحبك وماشى على الصراط المستقيم وكمان معاك وسايط ومعارف ممكن حد يسمعلك

يعنى لازم من الواسطة فى كل حاجة بالذمة دة كلام
معلش انا كنت بتكلم عن السرقة وحولت على موضوع الوسايط بس انا شايف انك فى البلد دة لازم علشان تاخد ابسط حق من حقوقك ان يكون ليك معارف وعلاقات علشان الدنيا تتحرك

**Xpert** · 21-02-2008 10:52 PM

نظراً للغلاء السائد بالبلد ... كان من الضروري علي الشعب المصري ابتكار طرق جديده للحصول علي الكاش ماني باسهل الطرق الممكنه .. لمواجهه الغلاء المعيشي و المستوي الاقتصادي السائد ..
و الجدير بالذكر ان السرقه احد هذه الطرق .. و يفضل ان يطلق عليها مبداء : اللي مامعوش ياخد من اللي معاه ...الغني يدي الفقير يعني هههه

**sherif Anton** · 21-02-2008 11:09 PM

انا فعلا 2 من اصدقائي اتسرق الموبايلات بتاعتهم الاسبوع ده ... الوضع فعلا مايطمنش

**mfa2009** · 22-02-2008 03:43 AM

احنا برده مسكوا حرامي بيلم -لا مؤاخذة- الجذم من علي ابواب الشقق وتاني يوم مسكوا حرامي بيفك الباب الالوميتال بتاع العمارة ايوه والله بتاع العمارة وفين قرب مدرية الامن
بس لازم نعرف اللي بيسرق مابيسرقش علشان يوكل عياله اللي بيسرق بيسرق علشان يعمر دماغه هدفه سامي برضه

**wawoo** · 22-02-2008 02:00 PM

اعرف شركة كبيرة , حرامى دخل الشركة لم كل موبيلات الناس و هى بتصلى , و لما الناس فى الدور اللى تحت عرفو طلعو عشان يشوفو حصل اية , نزل لم موبيلات الدور اللى تحت كمان , و هرب.