احم....

النهاردة هنتعرف على اهم الواضيع اللي يتميز بيها الشعب المصري دون عن غيره فيما يتعلق بالصوت في السيارة
و مع احترامي للمفاهيم دي -و طبعا ملهاش اي معنى بالنسبة لي- فهي مطروحة للنقاش و كل واحد يقول رأيه
و بما ان انا اللي كاتب الموضوع فبالتالي هقول رأيي اول واحد

المفهوم الاول: كاسيت الفبريكة و تميز وجوده

و هو الكاسيت الاصلي المعفن الموجود بفبريكة اي عربية , و بصراحة مش فاهم ايه سبب تمسك الناس بالكاسيت ده بالرغم انه دايما حاجة تعبانة زي كلاريون المصنع مصري و تلاقيه ضايع و ملخلخ و زرايره سايبة و اول كلمة تسمعها : اصل ده فبريكتها!! من انه اتعس من اتعس كاسيت شبه محترم في السوق!!
و الكوميدي ان السيارات النضيفة بتيجي بسي دي بلاير بيشغل اوديو بس ولا ام بي ثري ولا يحزنون و لكن التمسك بالحاجة دي بيكون فوق الوصف و تلاقي لو واحد بيركبلك كاسيت يقولك بنظرة كلها طمع : و هتعمل ايه في كاسيت الفبريكة يا بيه؟


المفهوم التاني: مش عايز اقطع في الرف الوراني

طب انا راضي ذمتكم...حد لما ييجي يشتري مستعمل بيبص على الرف الوراني ده؟
و حتى لو بيبص...ايه يعني لما اقطع في الصاج دايرة علشان السماعات...خلاص كده العربية راشة دواخل؟؟


المفهوم الثالث: كل ما تجيب سماعات اكبر يبقى الصوت احلى

و طبعا اللي ما يتسمى ال Gm ده اختراع للهبد و الرزع بالصبات ولا علاقة له بالسماعات
و محدش يعرف انه كل ما تكون الوات بتاع السماعة اعلى يكون مقاومتها اعلى و حمل اكبر من ان الكاسيت يقومها صح
(علشان كده كل ما تروح تركب سماعات 600وات مثلا تلاقي الواد اللي بيركب يقولك خد ال400وات صوتهم احسن) و طبعا هما ولا احسن ولا حاجة بس الكاسيت يقدر يقوم ال400 وات اسهل


المفهوم الرابع: دايما السي دي بلاير صوته احسن من الكاسيت العادي بدون شك

لأ طبعا لأن فيه موديلات كاسيت بيكون تحكمات الصوت فيها تحفة و كمان دولبي سيستم و تطحن مشغلات ام بي ثري كتير قوي


المفهوم الخامس: ثقافة اليبضاوي

اول ما تفكر تركب سماعات تروح تجري تجيب طقم بيضاوي
و بالمناسبة في سماعات دائرية مش محتاجة حفر و بنفس القوة و تركب بمنتهى السهولة علشان تحاقظ على المفهوم التاني


المفهوم السادس: اركب 4 سماعات في الرف الوراني

شيئ ظريف فعلا!! و كمان الواحد يقولك اركب 2 سوني و 2بيونير علشان ياخد مميزات الاتنين و طبعا يبقى الصوت زي صوت الافراح البلدي و متفهمش حاجة


المفهوم السابع: السماعات اللي قدام ملهومش لازمة

يا سلام !! امال مكانهم معمول ليه؟ عياقة؟


المفهوم الاخير: عايز سماعات تديني صوت بيز جامد

عمرك ما هتسمعه جامد من غير صب....امال تفتكر عملو الصبات ليه؟