الموضوع: بشوف يا عم، بشوف

السلام عليكم ورحمه الله وبركاته

إمبارح، كنت رايح أنا وأصحابي الزقازيق
المهم ماشي وقدامي عربيه نص نقل شرقية
وماشيين على سرعه والدنيا زي الفل
على يمين الطريق فيه حادثة صغيره، عربيتين خابطين في بعض من ورا وأصحاب العربيتين واقفين وواقف معاهم عسكري
حاجه هايفه يعني
أنا بطبيعتي مبحبش أوقف الطريق علشان أتفرج على الحوادث
فلمحت الموضوع من بعيد وكملت على سرعتي زي ما أنا
المهم، بعد ما عدينا الحادثة بخمسه ولا عشره متر تقريبا
الأخ اللي قدامي في النص نقل كان سرحان تقريبا ومخدش باله من الحادثة
قام هوب ضارب فرامل مره واحده، وهوا في الحارة الشمال وأنا وراه
طبعا قام العبد لله رازع فرمله وقامت العربيه معومه يمين وشمال
واتحكمت فيها بالعافيه

دا كله كوم
ولما جينا جنبه وزعقناله، فيه إيه يا عم إنتا
قام بكل بجاحه
باصصلنا طرف عينه وقايلنا "بشوف يا عم، بشوف" وبيشاور على الحادثة
صراحة أنا كنت هغلط فيه
وقمت دايس بنزين وشديت ومشيت، لحسن بجد كنت هتغابى عليه
رغم إن كل اللي في العربيه معايا قالوللي دا ننزل نتخانق معاه

منتهى البجاحه وقله الذوق
بشوف يا عم، بشوف
كإنه من حقه إنه يضرب فرامل من غير سابق إنذار في الحارة الشمال
كإن الحاج الوالد واخدله الطريق إيجار جديد
عالم .....

استغفر الله العظيم هية العالم دى هاتتعلم امتى بقى؟