الموضوع: تجربتى مع شركات التأمين

اردت ان اقوم بالتأمين على سيارتى الصغيرة ، فقمت بالاتصال على رقم شركة اليانز مصر فرع الاسكندرية و هذا ما حدث بالتفصيل :

انا : الو صباح الخير

الموظفة : may i help you

انا : لو سمحتى عايز اسأل عن تأمين السيارات

الموظفة : اوكى ثوانى معايا ...... صوت موسيقى

الموظف : الو ايوه

انا : من فضلك عايز اسال عن تأمين السيارات

فجاءة صوت موسيقى استمر شوية .... صوت كركبة و اوراق و مستندات ..... صوت موسيقى مرة اخرى

الموظف : ايوه معايا ؟؟

انا : ايوة كنت بسأل عن تأمين السيارات

الموظف : فى البداية كدة التأمين عندنا 4.75 فى المية ده غير الدمغات ، هى العربية ايه

انا : سوزوكى التو موديل 2008

الموظف يسأل موظف اخر يبدو انه يجلس بعيدا : عربية سوزوكى التو موديل 2008 تعمل كام ؟

الموظف الاخر يرد ( صوته عالى لذلك سمعته ) : هو جابها بكام ؟

الموظف : العربية جبتها بكام ؟؟

انا : 47000 جنيه مصرى مكيفة

الموظف لزميله الجالس بعيدا : جابها ب 47000

الموظف من بعيد صارخا ( ايييييييييييييييييييييييي ييييييه ؟؟ 47000 ليه ؟ دى تسوى 30000 )

الموظف على الهاتف : العربية تسوى 30000

انا : طيب متشكر اوى بس قول لزميلك ان الاسعار غالية و مفيش عربية زيرو بخمسين الف اصلا

الموظف : معلش هو ممكن يكون مش عارف سعرها هى عموما من 30 الى 35

انا : طيب متشكر و انهيت المكالمة بسلامو عليكو

الغريب هو عدم وجود قاعدة بيانات بأسعار السيارت و الاسلوب ايضا ازعجنى جدا

المهم ، ذهبت بعد ذلك لشركة مصر للتأمين فرع سيدى جابر ، الاستقبال جيد و المعاملة جيدة جدا لكن العيب هو عدم وجود نظام تقسيط و ان المعاينة فقط فى شارع فؤاد و الركن هناك شبه مستحيل ، و النسبة هى 3.75 لو بدون تحمل
و 3.25 لو تحمل اربعة فى الالف مع وجوب عمل محضر شرطة فى اغلب الاحيان .

بعد ذلك ذهبت لشركة كونتاكت فى داون تاون ، بصراحة معاملة جيدة جدا ، اسلوب سهل و سريع فى دقائق كانت البوليصة جاهزة و المعاينة ايضا . النسبة هى 4.25 و كمان بالتقسيط على سنة . و تم احتساب سعر العربية على اساس تاريخ الشراء و سعر الشراء و السعر الحالى فى حالة الزيرو ، و تم تقييم السيارة ب 40 الف .

و ربنا يسترها علينا و عليكم