دا توكيل ولا وكالة البلح ؟
السلام عليكم ورحمة الله
اول امبارح كنت في توكيل الصحراوي عشان كذا عيب بشتكي منهم في العربية برتون واجا2009 عمله 7000كيلو
*عيب صوت طالع من العربية ناحية اليمين في العفشة غالبا هيطلع عيب علبة الدركسيون
*المالتي فنكشن بيعلق
*السنتر بيعلق
*مفتاح زجاج شمال بايظ
*اكرة باب يمين خلفي بايظه من يوم مخدتها
*فلتر البنزين محتاج تنظيف السحب في حاجه مش تمام
المهم بقي انا من المنصورة طبعا عشان اروح الصحراوي واول مره اروح خدت اجازة من الشغل طبعا وشديت الرحال من الساعه 7وصلت هناك 9ونص ودا كان معادي بالظبط سلمت العربية للستاذ محمد عبد الهادي وهوا تقريبا انضف واحد جوا التوكيل المهم عرفته الحاجات الي بشتكي منها وقالي استريح يا فندم وهتستلم العربية الساعه3 العصر
كان معيا ولدي واخويا الكبير قعدنا في الاستراحه مستنين المصير المجهول
بجد حسيت ان دا مش توكيل اساسا دا عبارة عن وكالة منغير بواب الي عاوز يدخل للورشة ويعرف حد بيدخل والي مش معاه وبيحاول يدخل جوا انسة داليا تهزقه وتقوله اطلع بره زي االعيل الصغير واحد حصل معاه كدا قدامي
المهم بقي العربية خلصت الساعه 2ونص وقالي محمد عبد الهادي تعاله جربها وطلعت اجربها مع واحد هناك والصوت بتاعة علبة الدركسيون زي مهو مفيش اي تغير
دخلت العربية واترفعت تاني وهنا جا دور الخبير الهندي يوووه اقصد الماليزي وقعد يدعبس ويفتي في العربية وكل المهندسين متجمعين علي العربية انا قولت خير العربية ولعت ولا ايه
المهم الساعه6 جا الاستاذ محمد عبد الهادي وقالي للاسف العيب متحلش وحضرتك هجيب العربية تاني وتسيبها عندنا لمدة يوم كامل احنا مش عارفين دا عيب ايه
طبعا انا دماغي غليت لاني خلاص بجد دماغي باظت من الصبح ومش نايم قعدت ازعق واعمل لقيت المهندس سيكو او سيد جاي بيقولي يا استاذ متزعقش وحضرتك ممكن تقارن عربيتك بعربية شاهين وشوف الفرق
بصراحه استفزني مسكته هزقته وشتمت التوكيل كله وقولت انتو ولا واحد فيكو فاهم حاجه
قالي حضرتك انا كنت ماسك ورشة فنية في المانيا ازاي تكلمني كدا قوتله فعلا وايه رجعك تمسك ورشة عز العرب بقي بدامك شاطر كدا لقيته سكت ومفتحش بقه
انسة داليا حولت تلطف الموضوع وشالت 100 جنية مصنعية تنظيف فلتر البنزين وقعدت تعتزر وتقول معلش يا فندم هتها يوم تاني وابقي سيبها وارجع تاني يوم خدها ومش هتلاقي مشاكل
ومحدش يقولي مظبطش مع ايمن ليه وخليته يجي معاك لاني مبحبش نظام ان حد يجي معيا وانا باخد حقي او يبقي متوصي عليا عشان ليا حق اخده ومنغير اي واسطه
انا فرحي يوم الخميس وكان كتب كتابي امبارح عشان كدا معرفتش اسيب العربية سعتها لكن هروح مره تانيه واسيبها ونشوف بقي ولو متحلتش مشكلتي يبقي هروح لحماية المستهلك
اسف اني طولت عليكو بس بجد دا مش توكيل دا ينفع يكون اي حاجه تانيه