تربو دى يا كابتن ؟؟؟ .... إضحك مع زاستافا فلوريدا!!
الزاستافا فلوريدا ... أغرب عربية إتعملت فى التاريخ...
و ليها معايا مغامرات كتيير جدا ...
هبدأ أقولكم منها شوية مغامرات ...
العربية دى منحوسة ... أيوة منحوسة ..
لازم لما تتخبط ... تبقى راكنة و واقفة .. و تنزل متعرفش مين إللى خبطها ...
من كام إسبوع كده ... كانت مركونة الضهر قدام البيت ...
نزلت لقيت الباب بتاع الراكب الأمامى مخبوط خبطة شديدة ... جدا .... قوايم الباب إللى فوق طالعة لبره ..
و بلاستيك إللى على الباب من جوه إللى فيه الأكرة و كده داخل لجوة و مكسور ... من الأخر الباب إدمر!!
و الباب مش بيفتح!
و مين عمله متفهمش !!! و أكيد إللى خبطه خبطة على سرعة لأنها خبطة بسرعة .. أبدا محدش شاف!!!
ما علينا ...
كان فى يوم حر جدا .. كان يوم الأحد 20 يونيو ...
العربية و أنا راجع سخنت جدا ... و انا مأخدتش بالى ...
لدرجة إنها بقت تسقف فى أى سرعة على أى غيار .. و لو شلت رجلى من على البنزين تبطل !!!
و كل ده و انا مش واخد بالى إن عداد الحرارة متقفل ... المهم عرفت أرجعها البيت ..
نزلت شميت ريحيت شياط!!
بفتح الكبوت .. أفاجأ بخراطومين سايحين!!
قولت بس ... عمرة :36_1_8[1]: .... و طبعا غطاء الرادياتير مش موجود .. و مفيش مياه فى الردياتير !!
نزلت تانى يوم روحت جبت الميكانيكى .... قولتله تعالا شوف فيها إيه و محتاجة إيه ...
الميكانيكى شافها ... قال زى الفل مافيهاش حاجة ... الخرطوم إللى سايح حته منه ده بتاع هواء ..
بيركب فى العمة ... و مش محتاج يتغير .... هتسمع بس صوت زى تنفيسه هواء ( نفس صوت التربو تقريبا :B4_282: ) عشان فى حته مشروخة ... ههههههه
المهم لما جربت العربية بعد ما مشى ... رغم إن الميكانيكى مجرد ركب الخرطوم العمة بس ...
العربية بقى صوت الموتور هادى جدا .... السحب إتحسن :majd(4): ؟؟؟
إزاى ؟؟؟؟ متسألنيش !!!
أنا عندى تفسير ... إن مع السخونة الحديد تمدد فالموتور بقى واخد راحته ( بهجس مش كده :ma: ) ؟؟؟
ما علينا ...
المغامرة الأخيرة ....
أول إمبارح ... لمضة البطارية بتسرى ... وديتها للكهربائى قالى دى محتاجة كتاوت دينامو ...
إديانى الكتاوت الأقديمة و نزلت التوفيفية و شارع زكى أجيب زيها ...
كل ما أقول لحد عندك زى ده ... يقولى إيه ده ... انا عمرى ما شفت حاجة زى دى ؟؟ :36_1_8[1]: ...
بدور على عيل تايه تقريبا !!! المهم مالقيتهاش ...
سألت عند واحد تانى مسكه كده بإستغراب ... قالى عربية إيه دى ؟؟؟ بويك ؟؟؟
قولتيله لأ .. دى زاستافا فلوريدا ...
قالى أمريكانى يعنى ... لأ مش عندى :ma: ....
المهم رجعت للكهربائى قفايا يأمر عيش ....
فإتضرينا نجيب كاتوات خارجية و وصلنا بالكتاوات الداخلية ... فالدائرة بقا معكوسة ...
فلمضة البطارية تفضل منورة علطول ... و لما يكون فى عيب البطارية تطفى :36_1_8[1]: !!!!
قولت ماشى ... سبته و مشيت و حاسبته ..
الملحوظات بعد العملية دى ...
سحب العربية إتحسن جدا جدا !!!
إزاااااااااااى ؟؟؟ حد يفهمنى إيه علاقة الكتاوت بتاعات الدينامو بالسحب :majd(4): !!!!
ما علينا طبعا مبسوط بالسحب و فضلت بلف بالعربية و أكبس بنزين ... و صوت تنفيسه الهواء مسخننى !! ...
و لما أكبس شوية و صوت التنفيسة يعلى الناس تبص عليا ...
فواقف فى إشارة لقيت شوية عيال سيس قاعدين فيرنا و مجنطين و معليين الكاسيت على الأخر ..
فالواد إللى جنب السواق بيسألنى من الشباك .. .
توربو دى يا كابتن ؟؟؟ ( قال تووربو مش تربو :ma: ) ....
قولتله أه تربو ( عشت فى الدور :ma: ) ....
قالى نوعها إيه العربية دى يا كابتن ؟؟؟ قولتيله لانشيا إنتجرا :ma: ...
قالى كام سي سي ؟؟؟ قولتله 2500 تربو ...
تحب تشد معايا ؟؟؟
قالى لأ شكرا و سكت .... هههههههههههه
و أنا ماشى قعدت أضحك من الإشتغاله ...
دى ميزة إن معاك عربية محدش عارفها ... و كمان العلامات إللى عليها مسروقة :ma: ....
الواد مشكش فى كلامى رغم إن العربية شكلها متبهدل و مش متجنطة ولا أى حاجة تدل على إنها رياضية غير صوت الهواء :ma: ...
دى كانت مغامرة من مغامراتى مع الزاستافا فلوريدا