الموضوع: لو عايز تقسيط إسلامي و أقل فايدة و أقل مقدم و أطول مدة

الحمد لله استلمت الساجا أخيرا :)
انا جايبها قسط عن طريق بنك ناصر الإجتماعي( تقسيط إسلامي 100% - أقل فايدة 6% - أقل مقدم 15% - و أطول مدة 7 سنين و نص )
حكتبلكم ايه الاجراءات عشان جايز حد يحب يجرب :)

مش مهم المشتري وظيفته ايه
المهم ( و هي دي أهم نقطة ) انك تعرف 2 موظف حكومي ( دكتور في جامعة - مدرس في مدرسة - ......)
لو ربنا أكرمك بالاتنين دول يبقا يلا بينا نروح بنك ناصر
أولا: الأوراق المطلوبة في البنك ( تجهزهم قبل ما تروح )
1- بالنسبة للاتنين ضامن
-2 صورة بطاقة شخصية (سارية) لكل واحد
-ايصال كهرباء فيه العنوان ( ممكن للوالد / للوالدة + شهادة ميلاد / ... )
-مفردات مرتب الضامن ( مختومة بختم النسر )
2- بالنسبة للمشتري
-5 صور للبطاقة الشخصية (سارية)
-الرقم التأميني مطبوع ( من أي مكتب تأمينات ) لفتح حساب جاري في البنك عشان الأقساط
-ايصال كهرباء
كده انت حتروح البنك و تسلم الورق ده ( من غير ما يروح أي ضامن معاك) انت بس :)
متنساش تاخد معاك دوسيه بلاستك أبو حديدة عشان يبقى ده ملفك عندهم
الموظف في البنك بقى حيديلك طلب (عرض السعر للسيارة من الوكيل ) ( و تقريبا كل ماركة سيارة وليها مكان للتعامل مع بنك ناصر والله أعلم )
حتدفع 40 جنيه استعلام مركزي + 10 جنيه مصاريف فتح الحساب الجاري
ثانيا: مشوار الوكيل - حتديلة الطلب و حتاخد منه العرض ( متنساش لازم يختمهولك )
عشان تاخد عرض السعر لازم تحجز سيارة باللون المطلوب و تدفع مبلغ (500 جنيه مثلا) يتخصمو من الثمن الكلي للسيارة و حتاخد عرض السعر بالمبلغ المتبقي
ثالثا: رجعنا البنك تاني و حنتكلم في الفلوس بقى :)
-يتم حساب أقل مقدم 15% من ثمن السيارة كما ورد في عرض السعر
-يمكن التقسيط حتى 90 شهر (7.5 سنة) بفائدة 6%
شوفوا اللي تم معايا كمثال حي
-ثمن السيارة الساجا 70000
-خصم 1000 جنيه للي من طرف الأستاذ أيمن (نيل موتورز) ربنا يباركله :) يبقى تمن العربية 69000
-دفعة حجز 500
-يبقى عرض السعر من الوكيل عز العرب 68500
البنك بيعمل تأمين حياه اجباري على المشتري ( بيختلف حسب السن)
-انا 32 سنة (السنة ب 100جنيه في 7.5 سنة) 750 جنيه
--- اجمالي السعر (68500 + 750 ) = 69250
-المقدم اللي دفعته 28000
--- الباقي من سعر العربية ( 69250 - 28000 ) = 41250
-فائدة البنك (7.5 * 0.06 * 41250) = 18563 ( تم اضافة نص جنيه لجبر الكسور :) )
-مصاريف إدارية 1% = 413 جنيه ( تم اضافة نص جنيه لجبر الكسور )
---إذا المبلغ الذي سيتم تقسيطه (41250+18563+413)=60226
بالقسمة على 90 شهر يعطي 669 و كسور
فيكون القسط الشهري 670 مضروب في 89 شهر = 59630
و يكون آخر قسط هو المتمم للمبلغ الأصلي (60226) = 596

رابعا: بعد الاتفاق على المقدم و الأقساط يتم استلام و رقتين لكل ضامن
1-طلب تحويل مرتب عند الطلب ( توقع من 4 مسئولين في العمل عند الضامن و تختم بالنسر )
2-نموذج توقيع للأربع مسئولين الموقعين في الورقة الأولى و تختم أيضا بالنسر
كده تقدر تروح من بنك ناصر بعد ثاني زيارة و تسلم الورق للاتنين ضامن و بعد انتهاؤهم من الورقتين
دلوقتي نبدأ الزيارة الثالثة للبنك و معاك الاتنين ضامن
خامسا: يتم التوقيع على عقد بيع السيارة (مع الاحتقاظ بحق الملكية للبائع) كطرف ثاني في العقد ( الطرف الأول هو البنك)
ملحوظة هامة يمكن ان يذهب كل ضامن على حدة كل واحد و وقت فراغه
المشتري يوقع على بعض الاقرارات في البنك بالاضافة لعقد البيع ( مثل اقرار بصحة البيانات - اقرار بحق البنك في الاستفادة ب 2% من المبلغ المتبقي في حالة السداد الكاش - ....)
يعطيك البنك طلب تخصيص رقم شاسيه و موتور من الوكيل
سادسا: تذهب للوكيل و تسلم الطلب و تستلم تخصيصك (ممكن يبقى في يوم تاني لو العربيات لسة ما وصلتش)
سابعا: نرجع للبنك بالتخصيص و يتم دفع
60 جنيه مصاريف بنكية + 100 جنيه صدقة جارية (إجبارية على كل عربية)
كدة الملف كمل و المفروض يدخل للمدير عشان يمضي العقد كطرف أول و يطلعلك ورق الاستلام ( غالبا حتيجي تاني يوم)
ثامنا: استلم أوراق الاستلام من الوكيل و استلم أوراق الترخيص في المرور (اتأكد من المرور اللي انت عايز ترخص فيه)
تاسعا: سلم الورق في الوكيل و استلم العربية و ورق المرور بالإضافة للإفراج الجمركي (ممكن ياخد وقت الورق ده)
عاشرا: روح المرور رخص و لازم تاخد بالإضافة للرخصة و النمر ( رخصة عليها حظر لبنك ناصر الإجتماعي) بتاخد برده شهادة بيانات بالعربية للبنك ( مهمة عشان البنك يطلع الفلوس للتوكيل)
أحد عشر: توصل البنك تسلم الشهادة و صورة الرخصة و تختم صورة تانية من الرخصة للتوكيل ( حتسلمها في التوكيل مع صيانة الألف ان شاء الله)
و مبروك مقدما لأي حد حيشتري عربية ان شاء الله :)


أي حد عايز أي اسفسار انا تحت أمره على 0117324567
و أخيرا أحب أشكر جدا
استاذ أيمن
و أستاذ هاني
و الأستاذ محسن صالح ( في التوكيل )
و خدمة العملاء في بنك ناصر 16868

الف مبروك علي العربية وربنا يحفظهالك ويكفيك شرها
وشكرا علي الشرح الوافي والمفيد