الحمد لله عملت النهاردة صياتة ال 10000 للواجا في العجوزة. أنا كنت حاجز اول معاد الساعة التاسعة, ورحت قبل الموعد علشان عربيتي تدخل أول عربية, وفعلا دا اللي حصل. أنا اكتشفت لما بروح بدري بخلص بسرعة, وكنت مخلص كل حاجة الساعة العاشرة والنصف, والتأخير كان بسبب الكشف المجاني. انا جبت زيت موبيل 1 ب 250 جنيه ودفعت في الصيانة 205 يعني الاجمالي 455 جنيه. أنا مكانش عندي اي شكاوي, بس كان عندي شوية هواجس من الزجاج الكهرباء, بس المهندس أحمد مرزوق طمني, وقاللي خبر كويس ان الزجاج الكهرباء بتاع الواجا الشكل الجديد اللي من موديل 2009 هو هو بتاع الواجا, علما انه في الموديلات اللي قبل كدة الزجاج الكهرباء كان على لوح فيبر وكان فيه شكاوي منه. بعد ماخلصت مليت استمارة تفيد بمدى رضاء العميل عن الصيانة. وبصراحة اديتلهم ارقام عالية, وموظف الحسابات اللي اداني الورقة دي قاللي لو كنت جئت امبارح كنت اشتكيت من التكييف بتاع الريسيبتيون علشان كان عطلان, واضح ان التوكيل عايز فعلا يحسن من نفسه, وعايز انتهزها فرصة وأشكر المهندس احمد مرزوق على مجهوده الكبير في العجوزة, ورأيي دا بعد التعامل معهم اربع مرات.نيجي لتقييم العربية بعد 10000 ك , العربيةالحمد لله لغاية دلوقتي ماخيبتش ظني فيها ولا مرة
التكييف: اكثر من ممتاز في الحر اللي احنا فيه, العربية بتكون متحمصة في الشمس والتكييف بيسقع العربية في خمس دقائق
السحب: ممتاز, والعربية مغرية جدا للسحب علما بان سواقتي في أغلب الاوقات بتكون هادية, بس للاسف شوارعنا زحمة ما بتديش فرصة للواحد يجري براحته. التكييف بيأثر تأثير بسيط على السحب. بالنسبة لأقصى سرعة جبتها هي 170 بالعافية, ودا غالبا علشان الموتور لسة مافتحش
الثبات: أكثر من رائع, عادي جدا تاخد ملفات عند 140
العافشة: اتحسنت كثير, كانت ناشفة جدا في الاول
الفرامل: ممتازة
الاضائة الداخلية والخارجية: ممتازة
سهولة التحكم والمناورة بالسيارة: فوق الممتازة
الرؤية الخارجية: ممتازة في جميع الاتجاهات ودي مش موجودة في عربيات جديدة كثير
المهم أكمل كلامي عن الصيانة, بعد ما خلصت الصيانة التهاردة كنت رايح مشوار في طريق الاسماعيلية سمعت صوت تكتكة واضحة جاية من الدريكسيون لما الفه يمين أو شمال, والصوت كان بيظهر شوية وبعدين يختفي. بصراحة دماغي اتلحست الصوت كان عالي جدا ومستفز, وهي نفس أعراض علبة الدريكسيون اللي هي البعبع بتاع البروتون, ومشمعنا بعد الصيانة مباشرة, دول حتى مقربوش من الدريكسيون. بعد عشر دقائق من العذاب النفسي قبل ماأركن علشان أدور على أي حاجة تكون مصدر الصوت, إكتشفت ان صوت التكتكة جاي من ساعة يدي. وطبعا كملت المشوار من غير الساعة
