متغاظ

**mrwho1982** · 06-07-2010 04:25 PM

السلام عليكم اولا

ثانيا ايه كمية القرف اللي الناس عايشاه في الدنيا دي
للدرجة دي وصل بينا الحال والقرف للدرجة دي يا جماعة بجد الحال مابقاش يتسكت عليه
الحال من سيء الي اسوأ
بدايه من الساده المسئولين الي ........
طيب نعمل ايه نسرق ننهب اخلي ابني ومراتي ياكلو قرش حرام يبقي حرام عليه وربنا هايحاسبني انا

انا في واحد زميلي مرة كان بحكيل موقف كان هو بيعمله وهو انو بيطلع مصلحة من اوامر الشراء وبيحلفلي بالله العظيم ان هو كان بيطلع بمصلحة من 100 الي 150 جنيه في اليوم وكانو بيصرفو في يوم وفي مرة بعد ما اخد الفلوس الصبح الكاوتش اتقطع باليل
ادي اخرة القرش الحرام بياخد معاه فلوس حلال وصحة
طيب احنا عايزين حلول
ايه رايكم لو عملنا دولة فيها قانون محترم يراعي ادمية الانسان
دولة مافيش حاجة فيها بتغلي بدون وجه سبب
دولة تراعي البني ادم وماتخاليش الناس تقتل بعض علي 20 جنية ( يعني البني ادم = 20 جنيه)
عمرك في مرة سمعت ان في حمار قتل حمار او كلب قتل كلب
الظلم زااااااااااااااااد قوي والافتراء زاد جداا وانا بصراحة قرفت بجد من البلد دي انا مازهقتش من اهلها لاني انا من اهلها
بس زهقت من الحرامية اللي في كل مكان ....... للاسف في ناس وصلت لمرحلة ان هي مابقاش يهمها حد ولا تراعي شعور حد ولا بتراعي ربنا في معاملتها مع الناس
بالعربي كده ناس واكله مستهبلة بالسكر والمكسرات
ارجوكم حطو حلول بلاش ناخد الموضوع هزار مطلوب حلول وسيبكم بقي من حقوق الانسان لان حقوق الانسان دي مش موجودة
انا والله العظيم متغاظ جداااا وبقالي يجي اكترمن اسبوع مابتكلمش مع حد ( مضايق من السلع الغذائية اللي غليت مضايق من عدم وجود احترام مضايق من الناس اللي بتضحك في وشك ومن وراك يلعنو اليوم اللي شافوك فيه ومضايق من الحكومة اللي قاعدة تدوس علي الناس ولا هاممها )
بجد حاجة تقرف وتجيب المرض فبناء علي ماسبق
قررت اني انعزل عن الدنيا دي بقرفها ومش هاعمل غير الحاجة اللي انا مقتنع بيها وشايف ان هي صح
معلش اعذروني لاني متغاظ جدااا ومضايق اوييييي ( يارب انتقملي من الحكومة اللي رخصتنا للدرجة دي )
ارجو من كل من يقرأ هذه الرسالة يقول في سره او جهرا ( حسبي الله ونعم الوكيل في الحكومة دي )
ابو عبد الله

**Mzeid** · 06-07-2010 04:35 PM

هههههه
لو غيظك 24 فدان مش قيراط يبقى ميجيش واحد على مليون من غيظي
لو عايز تعرف ايه الحل
اول حاجة كل واحد يرجع لدينه بمساعدة الاخرين و كل واحد يحكم عقله و ميتصرفش بتلقائية
نبحث عن حد يحمينا من اخطار العولمة اللي جت على دماغنا ( اخطارها و مساوءها) و الاولاد بقوا يقلدوا كل حاجة يشوفوها في التليفزين و النت و كل واحد عايز يبقى كوووول و نحاول نتخذ قدوة حسنة
نحاول نخلي قلوبنا على بعض بس بطريقة عقلانية يعني مش صاحبي يجي يقولي انا اتخانقت مع واحد و الشخص دة ضربني اقوم انا رايح و مطلع تييتت تييت تتييت الشخص دة لا اتصرف بتعقل و احاول اكتسب صفات حميدة

بس لما افتكر هقول تاني

**m_car** · 06-07-2010 06:29 PM

المشاركة الأصلية كتبت بواسطة mzeid

هههههه
لو غيظك 24 فدان مش قيراط يبقى ميجيش واحد على مليون من غيظي
لو عايز تعرف ايه الحل
اول حاجة كل واحد يرجع لدينه بمساعدة الاخرين و كل واحد يحكم عقله و ميتصرفش بتلقائية
نبحث عن حد يحمينا من اخطار العولمة اللي جت على دماغنا ( اخطارها و مساوءها) و الاولاد بقوا يقلدوا كل حاجة يشوفوها في التليفزين و النت و كل واحد عايز يبقى كوووول و نحاول نتخذ قدوة حسنة
نحاول نخلي قلوبنا على بعض بس بطريقة عقلانية يعني مش صاحبي يجي يقولي انا اتخانقت مع واحد و الشخص دة ضربني اقوم انا رايح و مطلع تييتت تييت تتييت الشخص دة لا اتصرف بتعقل و احاول اكتسب صفات حميدة

بس لما افتكر هقول تاني

كلامك جميل اوى وعين العقل بس خيالى اوى

كلامك ده معلش بيدل انك مش متغاظ ولا حاجة ولا متأثر اوى بالجو اللى حوالينا

ياباشا اقسم بالله العظيم انا بحسد كل واحد بيموت والله بحسد اى شاب او راجل كبير او طفل بيموت لانه بروح لعالم الحق مش الباطل والظلم

احنا فى زمن كله فيه رخيص كله مالوش تمن

انا ممكن احسن من غيرى بمراحل كتييييييير بس خايف اتجوز خايف يجى عليا يوم ما القيش اكل ولا ادفع فلوس علاج لابنى

اه ربنا اللى بيرزق ونعم بالله بس فين نلاقى الرزق وفى الاخر بنقول الحمد لله من قلبنا

العملية معقدة انا بمشى فى الشارع وانا خايف ان يجى مخبر ولا ظابط يضربنى ويطلع عينى واموت اوترمى فى الشارع زى الكلب
خايف فى مرة الاقى مراتى ولا ابنى جاى البيت متعذب لحد ما مات

فين الحياة فين العيشة منها لله فى وقت وادان الناس الللى خلتنا نعيش بالطريقة دى

الاسرائلى احسن مننا للاسف نجحوا اننا نقول كده من ضعفنا وذلنا اللى حاسين بيه

حرااااااااااااااااااااااا ااااااااااااااااااااااااا ااام والله حرااااااااااااااااااااااا ااااااام

**akramlail** · 06-07-2010 07:07 PM

منة لله ربنا يورينا فية يوم يبقى عبرة للعالم كلة

**pro_samir** · 06-07-2010 09:11 PM

مش انت لوحدك اللي متغاظ

الفترة دي فعلا الموضوع زاد عن الحد لدرجة ان دة بقي الموضوع رقم 1 في الكلام

ادخل المنتدي أو اقابل اصحابي او اقعد مع أهلي أو في الشغل برضو هو نفس الموضوع والناس كلها بتتكلم فية

الناس كلها مكبوتة وعلي أخرهم

لكن اية الحل ؟

أكيد المشكلة فينا احنا كمان مش في الحكومة بس ،، يمكن علشان ساكتين لحد ما هننفجر

يا تري انت فين يا ظاظا