الموضوع: حلقة خط احمر لوزير الماليه ؟؟!!!,,,

للاسف الردود كلها لن تخرج عن مجموعة من الشتائم،

وللاسف الناس غالبيتهم مش فاهمين حاجة فى النواحى الاقتصادية

وحيقعدوا يهاجموا وخلاص ولو طلع واحد قال الكلام مقنع يبقى ياما حزب وطنى ياما بيشتغل مع الوزير ياما مش فاهم حاجة

اه احنا بلد فقير ومواردنا ضعيفة مقارنة بمصروفاتنا (اللى انفاق الوزراء فيها كلام فاضى يعنى 100 مليون كتير بس ولا حاجة بالنسبة لميزانية 200 مليار

اه لازم الدعم يبقى نقدى علشان يتوجه للى يستحقه بس

اه عجز الموازنة مبيتمولش الا بالضرائب فقط ومفيش دولة متقدمة عندها دخل رئيسى قبل الضرائب

اه لازم تدى رجال الاعمال الاراضى ببلاش والطاقة باقل الاسعار علشان يبنوا وينتجوا ويشغلوا ناس والعجلة تدور


وحاجات كتير بس كلها بتتهاجم..مش عارف ليه الاقتصاد هو الحاجة المباحة لاى حد يقول رايه فيها ..رغم انى مش ممكن افتى فى الهندسة او الطب

المشاركة الأصلية كتبت بواسطة thedeveloper87

موارد الدخل في مصر:
1. قناة السويس
2. السياحة
3. الغاز الطبيعي (اللي بيتباع ببلاش)
4. البترول
5. الاستثمارات الأجنبية
6. الضرائب
7. الصناعات

يعتبر الاقتصاد المصري هو الثاني حجما بين الدول العربية بعد السعودية

حضرتك نص الحاجات اللى حضرتك قلتها لا علاقة للحكومة بها

1-السياحة (الدخل كله تقريبا يذهب للشركات والافراد..هى الحكومة بتقبض ايه من السائح ومحدش يقولى تذكر المتحف ولا الفيزا لان ده رقم تافه جدا لكن السائح بيصرف فلوسه على تاكسى على مطعم على فندق ..على بازار...وبالتالى الحكومى مبتكسبش من السياحة لكن تشجعها علشان تشغل ناس وتحرك عجلة الاقتصاد وده طبيعى برده فى اى دولة فى العالم

2- الصناعات..اى صناعات؟ معظم الاقتصاد دلوقتى بيقوم على القطاع الخاص وغالبية المصانع الحكومية فاشلة ولو فى كام شركة ناجحة فديون الشركات الخسرانة بتاكلها ويدوبك من سنتين تلاتة لما القطاع العام كمحمل بدا يسدد ديونه ...محدش يقولى وليه المصانع متكسبش وتنافس لان الكلام ده اثبت فشله من عشرات السنين وكل الدول خرجت من الصناعة والانشطة الاقتصادي بصفة عامة واكتفت بالرقابة والتحفيز


3-الاستثمارات الاجنبية: شرح السياحة والصناعات...هل لما بنقول دخل للبلد 10 مليار دولار استثمار اجنبى يبقوا دخلوا جيب الحكومة؟؟؟؟؟؟؟؟؟؟؟ الاستثمار الاجنبى بيجى يبنيله شركة ولا مصنع ولا فندق وبالتالى مبيدفعش حاجة للدولة الا الضرايب

4- قناة السويس...ًرح عملاق بس الناس ماسكة فيه واتحدى ان اى نقاش يتفتح من غير محد يقول كفاية قناة السويس...حتى حضرتك ذكرته اول واحد فى القايمة...لأكن لو سالنا حد هو بيجيب كام فى السنة مش حيرد...ولو رديت انا قولت بيجيب 30 مليار جنيه ...حتلاقى نط من الفرحة وكانه مسك الدليل اخيرا على فشل الحكومة اعتقادا منه ان ال30 مليار جنيه دول هما اللى حينقذوا مصر..رغم ان ال30 مليار دى لا تمثل اكتر من 10% من ميزانية مصر (التعبانة) التى لا تكقى تعليم ولا صحة ولا طرق ولا غيره...ويكفى ان اقول ان دعم البنزين فقط يلتهم (قناتين) للسويس لذلك ادعو الشعب المصرى لحفر 10 قنوات سويس جديدة حتى نكون قادرين فقط على اصلاح قطاع واحد فى البلد (يا التعليم يا الصحة يا الطرق)


استغربت اشارة حضرتك لاننا تانى اكبر دولة من ناحية الاقتصاد لان الكلام بتاع ويكبيديا مضلل..ازاى احنا اعلى دولة بعد السعودية فى وجود دول بترولية زى الكويت والامارات ...وحتى لو احنا تانى دولة من حيث الموارد بعد السعودية فاعتقد ان عدد سكاننا يتجاوز 10 اضعاف سكان السعودية وهو ما يعنى اننا لكى نكون دولة غنية لابد ان يكون ايرادنا (10) اضعاف ايراد السعودية والا حنضطر نقول اننا دولة مواردنا فقيرة مقارنة بعدد السكان


وفى النهاية لازم اقول الاكلشيه المعروف انا مبدافعش عن الحكومة ولا بقول اننا احسن دولة فى العالم بالعكس احنا اكيد ممكن نبقى احسن من دلوقتى ...لكن لا الشعب مستعد يفهم ولا مستعد يتحمل نتيجة اصلاح ولا مستعد من الاساس يشتغل ويتعب زى بقية الشعب مبتشتغل بجد واصرار وامانة