ايه اللى يخلى بطاريه جديده تفضى؟

البطاريه القديمه مره نامت علشان كنت راكن العربيه و نور الصالون مولع
رحت شحنتها و مشيت كويس و كشفت على الدينامو قالى زى الفل
بعد فتره كنت واخد مشوار طويل و الجو حر نار و ركنتها و تانى يوم مدورتهاش جيت اليوم اللى بعده مدارتش و الكهربائى قالى بطاريه فجبت واحده جديده و مشيت زى الفل كام يوم و بعد مشوار طويل بليل وقفت منى وانا سايق و رحت للكهربائى قالى البطاريه فضيت و شحنها (حط بطاريه تانيه و هو بيشحن و قاس الدينامو و برضه مفيهوش مشكله)

دلوقتى لو فرضنا ان البطاريه الجديده مش بايظه, ايه ممكن يخليها تفضى مع المشوار الطويل ... هل ممكن يكون الدينامو فيه مشكله و مبيشحنش لما العربيه تكون سخنه ؟؟؟

العربيه سيينا 1600 مو2001

شكرا للمساعده

ديه عيبوب دينمو اكيد
حاول انك تكشف عليه كويس

دينامو شحنه ضعيف

وممكن يكون محتاج شربون فقط

اقتباس:

---

المشاركة الأصلية كتبت بواسطة samirayad

دينامو شحنه ضعيف

وممكن يكون محتاج شربون فقط

---

وممكن تكون الكتاوت بتاع الدينامو عايزه تتغير

اقتباس:

---

المشاركة الأصلية كتبت بواسطة eng:mohamed

وممكن تكون الكتاوت بتاع الدينامو عايزه تتغير

---

خليك أنت لابدلى كده فى الذره على طول

ماهو شحنه ضعيف
يعنى كتاوت أو شربون أو سوست

بس أنا بأخفف على الراجل
وبقوله

ممكن تكون الصدمه خفيفه ويطلع شربون ب5 ج

على مايحل الدينامو بس

ويشوف

شكرا ليكم جميعا
معلش سؤال تانى ... الدينامو فين بالظبط و علشان يوصلوله بيفكو حاجه تانى ولا باين على طول؟؟؟ اصل لو حد شاف السيينا 1600 هتلاقى كل حاجه على بعضها و عادة لما بيحاولو يوصلو لحاجه بيفكو حاجه تانيه و غالبا بيبوظوها !!!

اقتباس:

---

المشاركة الأصلية كتبت بواسطة mohamed_selim

شكرا ليكم جميعا
معلش سؤال تانى ... الدينامو فين بالظبط و علشان يوصلوله بيفكو حاجه تانى ولا باين على طول؟؟؟ اصل لو حد شاف السيينا 1600 هتلاقى كل حاجه على بعضها و عادة لما بيحاولو يوصلو لحاجه بيفكو حاجه تانيه و غالبا بيبوظوها !!!

---

الدينمو بيبقى باين ملف كدة و فى اخرة مروحه بتجرى عليها سير الدينمو :Ob_mak1[1]:

اقتباس:

---

المشاركة الأصلية كتبت بواسطة elewey

الدينمو بيبقى باين ملف كدة و فى اخرة مروحه بتجرى عليها سير الدينمو :Ob_mak1[1]:

---

بس ماظنش هتبقى 2001 و بمروحة:U_thin1[1]:
في رعاية الله........

روحت التوكيل و خليتهم يبصو على المشكله دى
طبعا اول كلام ان اكيد الدينامو فيه مشكله و يتغير قولتلهم طيب نقيس الشحن فا طلع ممتاز
فا قلتلهم سخنو العربيه و شوفو اللى هيحصل راح فاصل لما سخنت قوى
قالولى كده مش دينامو شكلها حاجه بسيطه بس محتاجين نراجع على الاسلاك و القواطيش و نمشى ورا الموضوع حته حته ....
ايه رأيكم؟

اقتباس:

---

فا قلتلهم سخنو العربيه و شوفو اللى هيحصل راح فاصل لما سخنت قوى

---

شوف يا أخى
ناس تانيين غير دول

كلامهم غير مقنع الصراحه

وواضح أن عندك مشكله فنيه فى الدينامو

كتاوت مثلا بيهنج بعد شوية شغل بساط

شكرا يا استاذ سمير
كده كده مصنعية الكشف هدفعها فهستنى لما يقولو على اللى هيلاقوه و مش هعمل حاجه غير لما اقولكو ان شاء الله

اقتباس:

---

كده كده مصنعية الكشف هدفعها فهستنى لما يقولو على اللى هيلاقوه و مش هعمل حاجه غير لما اقولكو ان شاء الله

---

هى مصنعية الكشف كام

معرفش بالظبط
هى الفكره انى بحب اروح كل 20-30 الف اشيك على العربيه عندهم فعندى فكره عن مصاريف الصيانه العاديه ... بياخدو 55 جنيه فى الساعه و بتعمل 3-4 ساعات شغل يعنى 220 جنيه بس بتطلع العربيه تمام
قبل كده مره كان عندى مشكله فى التبريد (كنت خابط كلب و لحمت الردياتير بس العربيه كانت بتسخن برضه) و طلع مش عارف حساس ايه و العربيه ظبطت بعدها ... ساعتها اتكلفت بالحساس (الحساس كان بحوالى 200-220 على قد مانا فاكر) حوالى 300 جنيه و محسبوش كشف دخلوه فى مصنعية التغيير
المشكله عندى يا باشمهندس ان السيينا 1600 ان الدنيا زحمه قوى ... يعنى مثلا علشان افك الراديتير كان لازم نفك الوش بالكصدام بالفوانيس !!! و دايما متعرفش ليه بيطلع حاجات ملهاش لازمه مع اللى بيفك :))) ف فى حاجات باخدها من قاصرها و اروحلهم على طول خصوصا لو فى لعب تحت الكبوت

عموما

لو لقيت الموضوع حيكلفك كتير عندهم

لأن واضح أنهم سلخاين قوى

ممكن تشترى دينامو أستيراد

عندك من بنك الأسكان ببور سعيد

وجربه عند البائع الأول وسخن العربيه

وأعمل كل حاجه ومعاك كهربائى من جنب البياع

تمن الدينامو مش حيزيد عن 150 ج

ويمكن أاقل كمان

هعمل كده ان شاء الله بس اوصل بيها بورسعيد ... ماهى المشكله بتبان مع المشاوير الطويله و خايف تفصل منى فى السكه ... بالمره استغل حضرتك فى سؤال للمعرفه العامه ... ليه لما البطاريه تفضى و العربيه ماشيه العربيه بتفصل و تقف
معلوماتى ان البطاريه بتشتغل و انا بدور اول مره ... السؤال: بتعمل ايه بعد كده؟ و هل بتفصل العربيه على طول مجرد متفضى ولا ممكن تمشى فتره من غير بطاريه؟

اقتباس:

---

ليه لما البطاريه تفضى و العربيه ماشيه العربيه بتفصل و تقف

---

شىء طبيعى لما يكون الدينامو تالف

وشغال بمزاجه ( بسبب الكتاوت مثلا أو لأى سبب )

أنك حتستهلك المخزون الكهربى اللى فى البطاريه

فى تغذية دورة الأشعال بالمكنه بالطاقه الكهربيه الازمه

ومجرد ماتخلص الطاقه اللى فى البطاريه والدينامو عطلان

المكنه حتبطل منك على طول

لأن الشراره أنقطعت عن غرف حريق المكنه

___________________

أما لو الدينامو شغال تمام

المكنه مش حتقف منك بالشكل ده

وحيقوم بتغذية دورة أشعال الحريق بالكهرباء الازمه لتكملة مسيرة حريق المكنه

لحد أنت ماتوقف الأشعال بنفسك

بغلق الكونتاكت

ولهذا السبب

بيسمى الكونتاكت .....بمفتاح الأشعال

ignition switch

اقتباس:

---

هعمل كده ان شاء الله بس اوصل بيها بورسعيد ... ماهى المشكله بتبان مع المشاوير الطويله و خايف تفصل منى فى السكه

---

على فكره يا أخى

مينفعش تسافر بالعربيه بالشكل ده

من القاهره لبور سعيد

لأنها حتبطل منك فى السكه

والكهرباء اللى فى البطاريه مش حتكفيك وتوصلك لبور سعيد

فحاول تحل قصة الدينامو عندك بالقاهره

ربنا يسهل ان شاء الله
انت عارف ان عندى فحص و ماشى فى شهر السماح :) غالبا هخلى والدى يدفع الضريبه و يعملى تصريح بشهر لحد ماحل الشكله

بجد ربنا يخليك يا باشمهندس و يجعله فى ميزان حسناتك

الله يخليك
وبالتوفيق

اقتباس:

---

المشاركة الأصلية كتبت بواسطة samirayad

خليك أنت لابدلى كده فى الذره على طول

---

:C_laugh[1]::C_laugh[1]::C_laugh[1]:
الحب ....إنه الحب يا هندسه:8_8_13:
وبعدين الموضوع اللي حضرتك مشارك فيه أو عامله..لازم أدخله..
كم من العلم الهندسي..لا يباع فى كتب..ولا يدرس فى كليات.للأسف

الله يبارك فيك

أخى الفاضل

باشمهندس : محمد

وحقيقى أنا بأعتز بصداقتك

وبلدياتى كمان

ربنا يديم الود والمحبه

باش مهندس سمير كدة انت هاتخلينا ندخل لمنتدى ندور على موضيعك ومشاركاتك وشكرا
احنا ممكن نقترح انك تعمل قسم كدة تسميه قسم المهندس سمير عياد ونعملك كمان خط ساخن علشان الجمال ده كله :7bteen:

ربنا يبارك فيك

يا أستاذ : محمود

ومتشكر جدا على زوقك

النهارده كلمت الكيلانى اسأل عاى الدينامو بكام تحسبا لأى شيئ
قالى 1500 !!!! اول مره فى حياتى الاقى حاجه فى التوكيل ارخص من بره :)))
حد عنده فكره اسأل فين تانى فى القاهره على دينامو للسيينا؟

ياباشا

هاتلك واحد أستيراد من الحرفيين عندك

فى أول جسر السويس

مش حيوصل ل 200 ج وحيقل عن كده كمان

دا لو دينامو الشرق الأوسط

ميعملش الكلام ده

:)))))
حلوه دينامو الشرق الاوسط
لسه مكلمنى و الموضوع طلع لحامات و قواطيش خرج الدينامو (معنديش تفاصيل اكتر دلوقتى لأن الكلام كان على التليفون) بس قالى انه كله اتلحم و فى وصلات اتغيرت و شحن الدينامو و البطاريه تمام و كده خلاص
الموضوع اتكلف حوالى 250 جنيه بس مش عارف قد ايه مصنعيه و قد ايه خامات ... لما اشوف الفاتوره و اعرف تفاصيل اكتر هبلغكم

بجد شكرا للمساعده

الكشف على العطل 27.5 + 10%
اصلاح ضفيرة الدينامو 27.5 + 10%
بكرة شريط لحام 4 + 10%
الموضوع كله اتكلف 65 جنيه

انا طبعا دافع اكتر علشان كان فى حاجات تانيه قايلهم عليها بس اللى فوق ده حساب موضوع البطاريه و الدينامو

لمل اخدت العربيه و مشيت بيها ييجى 15 كيلو على موصلت عند الشغل خليت بتاع البطاريات جنبى قاس الدينامو و العربيه سخنه و كان زى الفل
ربنا يسهل و تكون المشكله كده اتحلت :)

ألف مبروك إنها إتحلت وعرفت المشكله

الحمد لله من امبارح من ساعة ما اخدتها اديتها لف على طريق سريع و النهارده كان عندى مشوار فى مدينة الشروق و عملت حوالى 120 كم من امبارح للنهارده و فى حوالى 40 كم وانا مشغل التكييف فى الحر يعنى تحميل ممتاز
الظريف ان المؤشر على البطاريه (acdelco) كان مدينى امبارح اسود (اشحن) بعد المشوار النهارده قلب اخضر (ok) و دى حاجه كويسه و تخلى الواحد مطمن ان البطاريه بتشحن ممتاز الحمد لله