الكيا برايد بتشرب مياه في الردياتير

**may_moon911** · 06-07-2010 06:36 PM

بسم الله الرحمن الرحيم

السلام عليكم

معايا كيا برايد موديل 2000 و الحمد لله شغالة زي الفل ما بتنطقش
بس من تلات ايام لقيتها بتشرب ميا بطريقة فوق الفظيعة

الاول لقيتها عالية كانت علي الشرطة اللي تحت الواحد بس عادي انا قومت منزلها و كنت بلاقيها سخنة

زودتلها ميا و سافرت اسكندرية و ونا هناك كانت بتسخن جدا لدرجة اني ونا راجع النهاردة عداد الحرارة كان واصل للشرطة الحمرا اللي في الاخر بس الصراحة انا كملت عادي و وصلت البيت لقيت بردو الميا ناقصة

مع العلم انها عمرها ما عملت كدا قبل كدا ولا اشتكت قبل كدا خالص

و لما كنت بزودلها الميا قبل كدا كانت بتاخد حبة صغيرين دلوقتي بزودلها بالزجاجة اللتر

لو حد حصلت معاه الحكاية دي في اي عربية يا ريت يفيدني و الف شكر مقدما

**MoMohsen** · 06-07-2010 09:18 PM

كان عندى نفس مشكلتك و السبب كان طرمبة المياة و جبتها كورى بـ 100 جنيه
روح للميكانيكى خليه يتأكد لان ممكن تكون بردة طبب موتور

**theking2690** · 06-07-2010 10:45 PM

انا عندى نفس المشكلة الميه بتنقص كتيير كل شويه و العربيه الكربراتير بتاعها مش مظبوط انا نفسى فى ميكانيكى يكون فاهم فى العربيه ديه لأنى كل اما اوديها لواحد بيحسسنى انى موديله لغز مش عربيه و عمرهم ما بيعرفوا يصلحوا حاجه فيها ابدا

**may_moon911** · 06-07-2010 11:01 PM

عندك حضرتك المشكلة دي من زمان
يعني انا مثلا العربية عمرها ما عملت كدا طول العشر سنين
و للاسف انا مع حضرتك بردوا مافيش حد فاهم
انا قولت اجيب من الاخر و اسال الناس اللي بتفهم هنا و يارب يقدرو يساعدونا

**MoMohsen** · 07-07-2010 07:52 AM

لو عاوز ميكانيكى كويس فيه ورشه فى حدايق القبه اسمها ورشة الاصدقاء بجد ناس ممتازة هتلاقى عنوانها لو دورت على المنتدى.
اما لو عندك مشكلة فى الكربرادتير فا أحسن مكان هو ورشة الصفا اللى فى جسر السويس وليهم فرع تانى عند سوق القتال قرب الحرفيين.
وعلى الفكرة العربيه سهلة جدا فى الميكانيكا بتاعتها بس هما الصنايعيه اللى بيستهبلو

**ahmed000** · 07-07-2010 09:48 AM

المشاركة الأصلية كتبت بواسطة may_moon911

بسم الله الرحمن الرحيم

السلام عليكم

معايا كيا برايد موديل 2000 و الحمد لله شغالة زي الفل ما بتنطقش

بس من تلات ايام لقيتها بتشرب ميا بطريقة فوق الفظيعة

الاول لقيتها عالية كانت علي الشرطة اللي تحت الواحد بس عادي انا قومت منزلها و كنت بلاقيها سخنة

زودتلها ميا و سافرت اسكندرية و ونا هناك كانت بتسخن جدا لدرجة اني ونا راجع النهاردة عداد الحرارة كان واصل للشرطة الحمرا اللي في الاخر بس الصراحة انا كملت عادي و وصلت البيت لقيت بردو الميا ناقصة

مع العلم انها عمرها ما عملت كدا قبل كدا ولا اشتكت قبل كدا خالص

و لما كنت بزودلها الميا قبل كدا كانت بتاخد حبة صغيرين دلوقتي بزودلها بالزجاجة اللتر

لو حد حصلت معاه الحكاية دي في اي عربية يا ريت يفيدني و الف شكر مقدما

ارفع مقاس الزيت وبص عليه
لو لقيت الزيت لونه ابيض زي الطحينة كده يبقى العربية ضرب فيها جوان وش سلندر والمية اللي بتحطها كلها بتدخل على الموتور من جوه..وفي الحالة دي فورا لازم يتعمل الجوان والا هايبوظ وش السلندر لو مشيت بالعربية كده..
طبعا الموضوع ده هو الارجح طالما المية مش بتنقط من العربية...
اما لو العربية فيها مية بتنقط يبقى احتمال خرطوم مية او كوعة مية او اي حاجة في دورة المية عموما مقطوعه وفيها تسريب وممكن من الطرمبة نفسها..
ابقى طمننا عملت ايه..
بالتوفيق ان شاء الله

**may_moon911** · 07-07-2010 05:24 PM

المشاركة الأصلية كتبت بواسطة momohsen

كان عندى نفس مشكلتك و السبب كان طرمبة المياة و جبتها كورى بـ 100 جنيه
روح للميكانيكى خليه يتأكد لان ممكن تكون بردة طبب موتور

السلام عليكم
الف الف شكر لرد حضرتك و اسف انا رديت من غير ما اشوفو
شكرا مرة تانية و هاروح اشتريها بكرة ان شاء الله و اجرب

**may_moon911** · 07-07-2010 05:28 PM

المشاركة الأصلية كتبت بواسطة ahmed000

ارفع مقاس الزيت وبص عليه
لو لقيت الزيت لونه ابيض زي الطحينة كده يبقى العربية ضرب فيها جوان وش سلندر والمية اللي بتحطها كلها بتدخل على الموتور من جوه..وفي الحالة دي فورا لازم يتعمل الجوان والا هايبوظ وش السلندر لو مشيت بالعربية كده..
طبعا الموضوع ده هو الارجح طالما المية مش بتنقط من العربية...
اما لو العربية فيها مية بتنقط يبقى احتمال خرطوم مية او كوعة مية او اي حاجة في دورة المية عموما مقطوعه وفيها تسريب وممكن من الطرمبة نفسها..
ابقى طمننا عملت ايه..
بالتوفيق ان شاء الله

لا الحمد لله انا ببص علي الزيت كل يوم لوحدي عشان لو بعد الشر الموتور بياكل زيت و الزيت تمام و مافيهوش حاجة الحمد لله انا هاشوف طرمبة الميا و هاركبها و هاعدي علي الميكانيكي اللي في الحرفيين اشوف بردو هايقول اية و ان شاء الله خير و بجد الف شكر لرد حضرتك

**may_moon911** · 13-07-2010 09:50 PM

الحمد لله كان في خرم في الردياتير ما كنش باين الا لما بقفل الغطا و بقرص علي الموتور و دا الحمد لله عرفتو بعد ما رحت للميكانيكي بتاعنا اللي انا ما كنتش عارفو بس للاسف ونا راجع من فايد كلت مطب عمل حاجة في الشكمان مش عارف اية هيا هاروح اشوفها الصبح ان شاء الله