هو فيه أيه ؟؟؟

**Samir Elshahawy** · 06-07-2010 09:54 PM

النهاردة و أنا راجع البيت و عند وصلة الكيلو 4,5 و أذا بالطريق واقف كالعادة (لحد كده عادي و مافيش مشكلة)

الجديد بقي ....

كان علي يميني عربية أسعاف و شكله مستعجل و شمالي صف عربيات و بدأ الطريق يضييق و يادوب يأخد عربيتين

طبعا أديت أشارة شمال علشان أدخل في الشمال ووسع للأسعاف لكن فجأة عربية شيروكي بتقودها واحدة ست ظهرت من شمالي و راحت داخلة بأقصي سرعة و كادت أنها تأخد الرفرف الشمال بتاعي في طريقها

و علشان هيا واحدة ست و راكبة شيروكي أضطريت أوسع لها و بدأت أحاول أدخل وراها لكن العربية اللي جاية وراها (ماتريكس) كبست عليا و بدأ الطريق يقفل و كان خلاص فاضله سنتيمترات و يقعد جنبي و مصمم يعدي حتي لو هايخبطني

المهم ببص في المراية اليمين لاقيت الاسعاف وقف تماما رغم أني مديله أشارة شمال و بدأت أوسع له علشان يدخل هو من يميني ألا أنه أختار ينتظر علشان حس أني أتزنقت علشان أوسع له بينما الناس التانية ماعندهاش من الاحمر

و فعلا دخلت يمين وورايا الاسعاف

المهم مواقف من دي أتكررت تاني علي الدائري و باقي الطريق ناس تغير الحارة فجأة بدون مبرر و ناس تعدي من اليمين و المرايات تكاد تلامس بعضها و اللي يقف قدامك فجأة بصراحة حسيت أني بألعب في midtown أو crazy taxi

نفسي أعرف هو فيه أيه

**M.Zaher** · 06-07-2010 10:02 PM

اقولك فيه ايه يا بشمهندس

مش عارف اقول ايه !!!
البلد دي عمر ما حالها يتصلح

هوه فيه ايه ؟؟؟

**A.Saad** · 06-07-2010 10:07 PM

فيه ناس تيت بنت تيت
راكبين عربيات معندهمش دم
يارب الاسعاف تشيلهم بكرة ونرتاح

**د.محمود صلاح** · 06-07-2010 10:59 PM

مافيش أي بادرة امل ولو بسيط لتحسن الحالة العامة للمرور المصري

**Miss_Pharma** · 06-07-2010 11:23 PM

يعني محدش فيهم ممكن يتخيل انه لا قدر الله يكون هو اللي في عربية الاسعاف دي !!!
المفروض ان الاسعاف دي يكون ليها احترامها مهما كان ..
مش عارفة اقول ايه والله ..
ربنا يهديهم ..

**mrwho1982** · 06-07-2010 11:29 PM

في ............ حرف جر

بص اعمل زي وارمي بوز العربية واللي عايز يخبطها يخبطها بس ماحدش يزعل من اللي هايحصلو

وكمان انت مش مدي اشارة خلاص انت كده عملت اللي عليك ولا ناقص بقي انك تروح تسوقلو

فعلا عالم تيت وبالنسبة للست اللي راكبة جيب وانت وراها افضل اديها في كلاكسات مش هي فرود وعايز تعدي ماتمشي الطريق بقي يافرود

ابو عبد الله

**Samir Elshahawy** · 06-07-2010 11:33 PM

المشاركة الأصلية كتبت بواسطة mrwho1982

في ............ حرف جر

بص اعمل زي وارمي بوز العربية واللي عايز يخبطها يخبطها بس ماحدش يزعل من اللي هايحصلو

وكمان انت مش مدي اشارة خلاص انت كده عملت اللي عليك ولا ناقص بقي انك تروح تسوقلو

فعلا عالم تيت وبالنسبة للست اللي راكبة جيب وانت وراها افضل اديها في كلاكسات مش هي فرود وعايز تعدي ماتمشي الطريق بقي يافرود

ابو عبد الله

الفكرة انه لو خبطني صحيح غلطان و هأعرف اعلمه أزاي يحترم الناس بعد كده بس انا هاكون أستفدت أيه غير أن عربيتي اتخبطت و اتشوهت ده غير عطلة الاقسام و المحاضر و الاصلاحات

علشان كده بأتقي شر الناس دى و أسيبهم يغوروا في 60 ألف ........ (سلامة ) بس عربيتي ماتتعورش

مع خالص تحياتي
م/ سمير الشهاوي