الموضوع: عملت اطول رحلة فى حياتى بالعربية امبارح

امبارح امبارح طلعت رحلة طوييييييييييييلة والحمد لله عدت على خير
حبيت احكيلكو عنها وعن الى ضايقنى فيها
طبعا العربية تويوتا ياريس 2007
الاول اتجمعت انا وصحابى الصبح حوالى الساعة 9ص ( كنا فى العربية انا و3 اصحابى وطفل اخو واحد من اصحابى ) وابتدينا المشوار
نقطة البداية أسكندرية وتوجهنا اولا الى بورسعيد بالطريق الدولى وهو طريق كويس الى حد ما بس فى بعض المناطق المكسرة وبيتهيالى مش مناسب اوى للسفر بالليل
المسافة الى بورسعيد حوالى 240 ووصلنا بورسعيد حوالى الساعة 1 ظ
وهى مدينة جميلة وفيها اماكن نضيفة جدا
لفينا واشترينا شوية هدوم وحاجات بس للاسف الجو كان حر جدا
المهم خلصنا فيها حوالى الساعة 5 العصر
طلعنا على الجمرك الى على طريق الاسماعيلية ( مجرد فتح شنطة العربية بص فيها بس )
وابتدينا نتحرك على الاسماعيلية وفى الطريق عدينا على كوبرى السلام واخدناه رايح جاى بصراحة حاجة تحفة
وهو بيوصل لشمال سيناء من فوق قناة السويس والنظر من فوقه روعة
مكانه بالظبط على طريق بورسعيد الاسعماعيلية الصحراوى
وبعدين كملنا على الاسماعلية ودخلنا جوه البلد جبنا طبعا شوية مانجو زى الفل ( بس الاسعار كانت غالية اوى والنصب عالى ) بس يمكن عشان احنا اغراب
اتحركنا من الاسماعيلية حوالى 7 المغرب
المفروض كان فى الخطة اننا نعدى على السويس بس الوقت كان اتاخر
فطلعنا على القاهرة مباشرة
وهنا بدات المأساة
حظنا العاثر خلانى اخش فى الطريق الدائرى والله بجد الله يكون فى عونكم مهزلة مهزلة بك ما تحمل الكلمة من معنى
كان فاضل شوية واشد شعرى فى ناس سايقة على الطريق تحس انهم ماشييين مش فاهمين اى حاجة وبالذات سواقين الباصات والنقل
بعد كده ابتديت اشغل ال GPS بتاع الموبيل الى كنت ناسيه وكنت عايز انزل العباسية عشان ناكل عند الشرقاوى بتاع الكبده
فنزلنا على طريق اسكندريه الزراعى فشبرا فعبود ثم كوبرى اكتوبر فالعباسيه ( طبعا لفه سواد بس فى ظل الجو الى احنا كنا فيه لما امشى شويه اكتر احسن ما أنزل اسال حد *هوضح بعدين*)
وبعدين طلعنا شوية على النيل وخدنا لفة فى البلد ور كبنا مركب
ومشينا من القاهرة حوالى الساعة 1 ونص بالليل عودة الى بلدى حبيبتى الاسكندرية

ملخص القصة دى كلها وملاحظاتى

1_الرحلة كانت كالتالى * الأسكندرية - بورسعيد - كوبرى السلام - الإسماعلية - القاهرة - الأسكندرية
2_المسافة تعدت ال 700 كم واداء فى رأيى رائع للعربية (العربية ماشية 60000 ) والتكييف كان مصبرنا على الرحلة الطويلة دى
3_الحاجات الى فى بورسعيد فى راى عادية جدا زى عندنا بس يمكن اسعار اقل شوية بس ناسها ذوق وهاديين
4_الاسماعيلية طلعت مالهاش لازمة تتراح الا للمانجا طبعا
5_كوبرى مبارك السلام تحفة وحاجة لازم تتشاف للى ما راحش
6_القاهرة مش عارف اقول فيها ايه مش عايز حد يزعل منى بس مكانش العشم
--- عند اخر الزراعى بعد عبود فى كمين وقفونا فيه إحنا بس دونا عن كل الالوف الى ماشية (امين شرطة وواحد تانى لابس مدنى )
اخد الرخص والبطاقة واخد كل بطايق الناس الى معايا (طبعا كلنا صيادلة ومعناش حد شكله مشبوه ) ونزلنا وفتشو العربية حته حته بشكل مهين جدا ومفيش اى مجال للنقاش
لما بسالو ليه كده انت شايفنا مجرمين ولا ايه قالى يكفينى انك ملاكى اسكندريه طبعا انا مش عارف هو حقه يعمل كده ولا لأ بس انا قولت يلا مش مشكلة مش لازم نلابط وخليها تعدى على خير
بس الموضوع ده بجد مضايقنى جدا لحد دلوقتى وندمان انى سبته يعمل كده
---ده غير المعاملة السيئة من بعض السواقين على الطريق زى واحد بتاع اتوبيس استلمنى على الدائرى والسكة واقفة تماما وده ورايا شغال فلاشات وكلاكسات بشكل مستفز والله كنت هنزل اتعارك معاه بس قولت احسن اتوه فى السيرك الى انا فيه ده وبعدين لقيت السواقين كلهم واقفين معاه ومستلمنى اكن انا السبب فى ازمة القاهرة
7_طريق اسكندريه الصحراوى الجديد رووووووعة بس فاضل حتت لسه ما خلصتش * معظم الطريق ماشى 170 عشان لو مكنتش بجرى كنت هنام وعدى على خير الحمد لله
8_ال GPS بتاع الموبيل ممتاز وساعدنى فى حاجات كتير يمكن طول الرحلة سالت مرة او 2 بس
9_متوسط استهلاك البنزين طول الرحلة حوالى 6 ل/100 كم بره وجوه المدن والتكييف شغال متواصل

معلش الموضوع مش متنظم عشان التفاصيل اصلها كتير قوى وانا تعبت من كتر الكتابه

يابختك ...انا مش بحسد انا باؤر بس...اكتر حاجة بعشقها هى السفر ونفسي من زمان اعمل حاجة زى كدة بس السيد الوالد مش راضى يدينى الضوء الاخضر

المشاركة الأصلية كتبت بواسطة mohamed_kta

تبارك الله رحله ممتازه و فكره رائعه و متزعلش من أهل القاهرة لأنهم عندهم نفس الشكاوى من الاحتلال الريفى

مش مسألة احتلال ريفى ..دى مسألة ثقافة يعنى هتلاقى شباب متعلم وبيعمل اوحش من اغبى جاهل....
من بعد ماشفت حلقة العاشرة مساء مع فلاحين المنوفية وانا احتقرت التيشرت والبنطلون الجينز....بجد كانوا فى قمة الثقافة والبلاغة