الموضوع: أزاى عايزين الكورى يتقدم وأحنا عقولنا مبتتقدمش!

نقطه مهمه


سعر السيارة = تكلفة تصنيعها + ربح البيع من المصنع وخلافة

تكلفة التصنيع = الخامات + التكنولوجيا المستخدمه + الايدي العاملة + الكماليات ووسائل الامان والراحه


البنود دي بقي


الخامات - متوفره لكل شركات السيارات مش حكر علي حد
التكنولوجيا - ممكن تكون نقطه تفوق في بعض الشركات لكن برضو مش سر حربي
الكماليات - ممكن اضافتها في اي نوع سيارة حتي لو صيني او هندي

يبقي زي ما نورمال قال - مش معضلة ان الكوري يعمل عربيه تتفوق علي اباطره الصناعة - لكن المشكلة ان المستهلك تجه ليها بعد فرق السعر اللي حيلاقيه


بكدة تبقي الخطه الكوريه انجح - يبتدي تصنيع عربيات بتتدرج جوده وصناعة لترسيخ ثقه المستهلك قبل ما يخبطة بعربيه فيها كل ما يحلم بيه وبجوده تضاهي ارقي السيارات


الكوري في المرحلة دي - كسب الثقة وده واضح جدا وقريبا حيتخطي ويعتلي القمه - شانة شان جميع المصنعين لكن بصوره اسرع من الخمسين سنه اللي فاتت لبعض الماركات


المشكله في الثقافة اللي اتزرعت فينا من وفي المجتمع لتصنيف السيارات طبقيا وليس مبنيا علي العمليه
يعني بره بيفكروا بعملية - اية العربية اللي تديني اللي انا عاوزه باقل الاسعار

عندنا بقي - لا طبعا انا ادفع اكتر عشان اخد اكتر من اللي انا عايزو - طب ليه ؟؟؟؟؟
عشان ابقي راكب ............ اللي هيا احسن وخلاص

صدقوني - المشكله اننا معندناش استعداد نتعلم او نغير الفكره المزروعه فينا حتي لو كان السبب قوي

لسه بناكل فسيخ في شم النسيم عشان دي عادة فرعوني - ههههههههههههههههههه

فعلا دى نقطه مهمه
يعنى معلش هدى مثال بالسيراتو بس علشان دا معروف
خدوا لفه على الريفيوز على اليوتيوب خصوصا الامريكان
هتلاقى كلهم فى البدايه بيقولو بالنص أن كان من المفروض السيفك والمزدا 3 تتفوق على عربيه كورى خصوصا أنهم يابانى
لكن لما ركبنا العربيه وجربنها فعلا كيا تقدمت جدا وبتقدم عربيه كويسه جدا وتتفوق على السيفيك والمازدا 3
مبناقش التلات أنواع خاااااالص
أنا بس عايز أركز على طريقه التفكير
شفتوا أنهم مش بيرددوا قبل ميجربوا الحاجه
مقلوش من الاول لا دى كورى أزاى تعدى السيفك والمازدا
لا ركبوا وقيموا ثم غيروا القاعده
أحنا فين من دا
أحنا محلك سر!!
للأسف مازلنا بنردد رغم التغيير

المشاركة الأصلية كتبت بواسطة hosam_optrawy

الكورى طبعا بيتقدم وبيتطور كل سنه عن اللى قبلها

بس عندنا فى مصر فى ناس حاطه فى دماغها معتقدات صعب اوى تغيرها

ودا الطبيعى بتاعنا

انا مش هاقول شوفوا السوناتا والجينسيس والكادينزا والسورنتو

بلاش عشان دى حاجات غاليه وفى ناس بتقول الغالى هو اللى كويس والرخيص تعبان

وكمان مش هاتكلم عن الكروز والسيراتو واللى عاملينه فى الدنيا كلها , ولسه كمان لما الالنترا الجديده تنزل

هاقولكم على مثال ابسط

النيو أكسنت أخدت الأكثر السيارات جوده فى فئتها sub compact car فى امريكا السنه دى

متفوقه على عربيات يابانى زى التيدا والياريس

ratings | j.d. Power

دا غير الجينسيس اللى واخده الجايزه فى performance and design

متفوقه على عربيات زى بى ام الفئه الخامسه ومرسيدس e class وجاجوار وكاديلاك وليكساس وفولفو واكورا ولينكولن

ratings | j.d. Power

ريح نفسك يانورمال عشان فى ناس اللى فى دماغها فى دماغها مهما عملت وقولت :)

طيب والله مشاركه بتقول كل حاجه
شكرا يا حسام باشا
بس على الاقل يكون الكلام القديم دا بره
أنما هنا المفروض أننا ناس فاهمين كويس ومطلعين
يعنى واضح أن فى أتجاه عام فى العالم دلوقتى لتقدير عمل الكوريين
والرفيوز فى كل حته تدل على تفوقهم على اليابانيات على الاقل وبعض الكبار زى ما فى مشاركتك
أحنا فين من دا :(
لسه بنردد كلام كان صح من سنين كتيره

فعلاً العربيات الكورية بدأت تتقدم من أول 2009 تقدم رهيب و يمكن أنا مش متابع السوق بس عارف ان الفتيس اللي عاملاه هيونداي (مش فاكر الاختصار بالتحديد) قلب الموازين في أداء العربيات دي كـ Automatic Transmission ده غير تكنولوجيا CVVT و بيتر شراير اللي عمل تصميمات جريئة (تختلف فيها و جهات النظر).....
و فعلاً بقى مستواها تقريباً مستوى الياباني و ساعات أفضل من عربيات ياباني موجودة في السوق فعلاً.

بس لاحظتم ان مش ده الكوري اللي بينزلنا؟؟؟
عفشة مختلفة (مش دايماً)
محركات مختلفة
أعلى عن الأرض = ثبات أقل (و برضه مش دايماً)
موديلات تانية أصلاً..

بس أنا عندي سؤال و عاوز الناس تجاوب عليه (و لو سمحتم بلاش انفعال و تهكم).... تجيب كيا أوبيروس ولا تجيب مرسيدس C180 اللي هي أقل سيدان في مرسيدس؟؟
مش تقيل من شأن الكوري بس عاوز رد.... يمكن أنا مجنون أو مختل ولا حاجة...

طيب معظم الناس هنا عارفين أنا بتدرب فين... طيب ما المكان فيه الكيا و فيه الرينو... إشمعنى الصنايعية مش راضيين عن الكيا و دلوقتي قدروا الرينو بالرغم من أعطالها و مشاكلها و اللي الكيا بالنسبة ليها أبسط و أسهل و أقل في الأعطال.
صاحب المكان معاه كيا أوبيروس على فكرة و شفتها و عدت من جنبي كتييييييييييير و مع ذلك مبهرنيش غير الحجم... ليه لما المرسيدس بتعدي من جنبي بتلحس و ببقى حاسس اني عاوز أولع في نفسي بس أجيبها..
ابنه معاه ميجان كوبيه.... و كانت مركونة في الورشة و جنبها سيراتو كوبيه.... حد جرب يقارن بين الاتنين حتى من حيث الشكل الخارجي اللي هو معظم الناس بتعتبره في مصلحة الفورتيه.

الخلاصة يا جماعة... حب الأوروبي مش مجرد خصلة و رثناها و تناقلناها بالكلام هي فعلاً عربيات كويسة...

العبد الفقير الى الله معاه عربية كوري (فضل و نعمة من عند ربنا)..... كنت أقدر أجيب عربية أوروبي (ميجان بالتحديد) و أعيش ملك... طيب جبت كوري ليه يا سيدي؟؟!!! جبته علشان أنا لسة باخد مصروفي من أهلي و مأقدرش على مصاريفه....

يا جماعة أنا و الله مش داخل أتخانق أو أنكش حد أو كلام من ده و ربنا يعلم و ناس في قسم كيا تشهد ان بيبقى ليا وجهة نظر غيرهم لكن عمري ما قللت من العربية....

آسف للاطالة و آسف ان كان في حاجة في كلامي ضايقت حد....
في رعاية الله....

شكلك مبقوق أوي يانورمال :D

بالرغم من أني من المعارضين تماما مع التصنيف المطلق لفئة أو لصناعة معينة

بس أنا عندي كام نقطة اطرحها للمناقشة

أول نقطة : تكنولوجيا التصنيع

تكنولوجيا التصنيع سواء تكنولوجيا تصنيع المواد واللي بتشمل السبايك والمعادن اللي بيتم تصنيع أجزاء المحرك منها والأجزاء اللي بتتحمل الأجهادات المختلفة
أو التكنولوجيا الرقمية والأجهزة الألكترونية .

وفي الحالتين أنا بقول فعلا إنهم أسرار حربية ، فعلا وبدون هزار ، لأن أقسام البحث والتطوير لما بتوصل لناتج جديد بعد ما بتصرف عليه في اقسام البحث مبالغ طائلة مش معقول يطلعوا على الملأ وينشروا اللي تعبوا فيه بلا مقابل .

ومن هنا بيجي التنافس بين الشركات من ناحية التطوير ، وقد يصل الحد لسرقة التصميمات ، ولا ينسى حد فينا حادثة الجاسوسية بين شركة عريقة زي مرسيدس على شركة فيراري .

تاني نقطة : هتكلم على عربية مع صديقي العزيز BMW 7 Series E32 ، وهو متواجد بالسعودية ، العربية دي أو موديل ليها هو 1986 ، يعني من 24 سنة ( خلي بالكوا من التاريخ ده )

طيب تعالو نشوف ايه اللي في العربية دي:
1.كمبيوتر أعطال
2. ABS + EBD
3. ذاكرة تعديل مقعد السائق
4. حقن ألكتروني
5. مرايا كهربائية
6. تكنولوجيا الوصل إلى المنزل مع العطل :
ودي هاتكلم عنها شوية ، طبعا العربية باور ستيرينج ، لكنه بتعديل ألكتروني للحصول على نعومة مناسبة للدركسيون حسب السرعة ،بالرغم من أنه زيت مش كهرباء ، المهم القطعة الأكترونية اللي بتتحكم في الدركسيون باظت والباور فصل واللمبة بتاعته نورت، طبعا صاحبي بص على الجزء بتاع الباور ستيريج وفك العلبة اللي فيها القطعة ، لقاها واصلة بكابلين داخال للقطعة (ميل) وكابل خارج من القطع للطرمبة (فيميل) ، مجرد ما فكهم وركبهم ببعض الباور أشتغل تاني بلا مشاكل ومش بيه لمدة 4 شهور كمان.

7. 3 أوضاع للقيادة ( رياضية - عادية - مش فاكر التالت :) )

أيه رأيكوا في الكلام ده ، موجود في عربية من بي أم من 24 سنة ، وطبعا ده اللي أنا فاكره بس مش كل حاجه فيها

طبعا الحاجات دي ماشوفناهاش إلا بعدها بعدد معقول من السنين ، يترواح من4 إلى 14 سنة في ماركات مختلفة

تفتكرو بقى في الوقت اللي فيه باقي الشركات بتحاول تلحق بالتكنولوجيا دي ، هل تعتقدوا أن مهندسيين التطوير بشركو بي أم قاعدين ، ولا كانوا بيطوروا في حاجات تانية وهكذا ......