مافيش حل تاني .. عن تجربة عملية .. ارجوا توصيل صوتي للمسؤولين

بسم الله الرحمن الرحيم

اولا ارجوا ان يتسع صدركم لي لتتفهموا الفكرة واقسم بالله انها مجربة وناجحة 100% ومافيش حل تاني غير كده

انا بنيت فكرتي على محورين
الاول ... التأديب
الثاني ... توفير الموارد لعمل اللازم
هنفهم دلوقتي انا اقصد ايه

انا اقصد ان البني ادم بطبيعته مش بيحب الالتزام غير لما بياخد فوق دماغة (او على الاقل نسبة كبيرة من الناس) , يبقى نلعب على المحور ده لتأديب المستهتر بقواعد المرور واللي بالتالي بيشكل سبب رئيسي في الاذدحام , ومن ناحية تانية هنستعملة كمورد للحكومة لتوفير الاموال اللازمة لرصف وانارة وتخطيط وتمهيد وانشاء الكباري اللازمة ووضع كاميرات المراقبة والاشارات الضوئية ..... إلخ وبكده مش هيبقى فيه حجة للحكومة انها تقول منين هنعمل ونسوي , وبرضو مافيش ظلم للناس , لان الملتزم مش هيتغرم والمستهتر هنستغل استهتارة في تنظيم شوارع مصر

واليكم المقترحات التي هي مطبقة فعلا في احدى الدول الاكثر نجاحا في هذا المجال ومرورها يعتبر مثال يحتزى به ...

1- عدم تقدم اي شخص لأخذ رخصة القيادة او تجديدها بعد عشر سنوات إلا بعد اتمامة لمحاضرات التعليم بمدارس السواقة الحكومية المحترمة والتي يجب ان تعاد هيكلتها (والميزانية موجوده متخافوش)
2- تحديد رسوم تعلم قيادة السيارات بواقع مبلغ 1000 جنية للمحاضرات العملية والنظرية والامتحان الاول , ومن يرسب يدخل الامتحان الثاني برسوم زائدة حسب المحاضرات التي يحتاجها والتي يراها المدرب حسب خبرته (وبكده وفرنا فلوس بناء مدارس جديدة وليس اعادة هيكلة فقط)
3- فتح الجمارك التعسفية عن الشعب المصري واعدام المركبات التي تم العمل بها لاكثر من 20 سنة (طبعا ده هيخلي مصر حاجة تانيه خالص وشكلها حضاري وغير القرف اللي بنشوفه ده) وده هيكون ليه العامل في ان الناس هتخاف على سياراتها الجديدة وهتلتزم وهتكون الاعطال قليلة وبالتالي الاذحامات هتقل
4- عند تسجيل او تجديد اي مركبة يجب التأمين عليها , وعند وقوع اي حادث يتم الاتصال مباشرة بالشرطة والتي تأتي للمعاينة وتحديد المتسبب في الحادث لكي تقوم شركة التأمين التي قد أمن لديها بتغطية التكاليف ( واهمية التأمين بتكمن في تقليل عدد الافراد المستخدمين للسيارات لان التأمين على السيارات الجديده ممكن ان يتعدى 1000 جنية وده مبلغ مش متوفر مع معظم الناس سنويا) .. طب والغلابة ..
5- توفير مواصلات تليق بالاستخدام الادمي والغاء الاسطورة التي تسمى الميكروباص العشوائي واخضاع كل المواصلات لهيئة الطرق والمواصلات
6- تخطيط الطرق ووضع اشارات ضوئية في التقاطعات وكاميرات مراقبة عليها , وعمل دوارات في التقاطعات الصغيرة , وتوعية السائقين بقواعد دخول الدوار (الاولوية لمن داخل الدوار) , ووضوع كاميرات مراقبة في اماكن مختلفة على الطرق لمتابعة سلوك السائقين وتوقيع الغرامات عليكم بدون محسوبيات , ووضع رادارات ثابتة في جميع الطرق
7- ولتوفير الميزانية الكافية لكل هذه المتطلبات يتم توقيع الغرامات بشكل قاسي وبدون التدخل البشري لتفادي الظلم والمحسوبية , بمعنى ...
إلغــــــــــاء شـــــــرطي المــــــرور وجعل الغرامات كلها عن طريق الكاميرات والرادارات ودوريات الشرطة التي تحتوي على ظباط امناء ( ارجوا من الله ان يتوفروا في مصر )
8- يتم احتساب الغرامات كالتالي:
* 200 جنية عدم الالتزام بخط السير الالزامي + نقطتين سوداء على الرخصة
* 200 جنية تجاوز الحارة بتهور وبدون اعطاء اشارة + نقطتين سوداء على الرخصة
* 1000 جنية لتجاوز الاشارة الضوئية الحمراء + حجز ستة اشهر للسيارة او دفع غرامة لفك الحجز عنها
* 600 جنية تجاوز الحد الاقصى للسرعة من 21 كيلومتر - 40 كيلو متر (اول 20 كيلو مسموح بهم)
* 800 جنية تجاوز الحد الاقصى للسرعة من 41-60كيلو متر
* 1000 جنية تجاوز ال61 كيلو + حجز السيارة ستة اشهر او دفع غرامة لفك حجزها
* 400 جنية السير على كتفي الطريق (تجاوز الخط الاصفر على جابني الطريق) ان شاء الله هيتعمل مع التخطيط , وعمل مسافة تكفي لسيارة على الجانب الايسرلسيارات الاسعاف والمطافي والشرطة
* 200 جنية الوقوف في الممنوع , وذلك بعد تخطيط مواقف على الجانب الايمن في الطرق الكبيرة والتي تستوعب ذلك ومن الممكن ايضا ان تكون هذه المواقف برسوم يتم دفعها في ماكينة آلية تصدر تذكرة توضع على التابلوه ( وده مصدر تاني للدخل )
* 200 جنية لحزام الامان + نقطتين سوداء على الرخصة
* سحب الرخصة والزام السائق بالذهاب للمدرسة مرة اخرى عند تجاوز النقط السوداء ل 20 نقطة , ويتم الغاء النقاط السوداء في حالة مرور سنة على اخر نقطة سوداء تمت اضافتها , وبيكون ده دليل على التزام السائق , لانه خلاص مابقاش فيه محسوبيات
* عدم تجديد رخصة السيارة إلا بعد دفع مخالفاتها , او تسجيل سيارة جديدة لنفس الشخص الا بعد سداد المخالفات المتراكمة عليه في ملف اي سيارة اخرى ... يبقى اللي هيداوم على الطريق هو الملتزم بس واللي مش هيلتزم هيركب سيارته في البيت بس مش هينزل بيها الشارع لأن ...
* حجز اي سيارة تم على انتهاء ترخيصها 3 اشهر كحد اقصى , ويتم ذلك عن طريق دوريات الشرطة المنتشرة في الشوارع ( بما يرضي الله برضوا)

... وبكده نكون ادبنا الغير ملتزم , وبفلوسه وفرنا فلوس للحكومة عشان تعمل كل الحلول والبدائل للطرق وتنظيم حركة السير ... وعن تجربة والله ,, انا عايش برى مصر وبشوف المصريين هنا بيعانو قد ايه في اول سنة بيشتروا سيارة وبعدين بيلتزموا وبيكونوا مشرفين ... هو ده البني ادم لازم يتغرم عشان يتعلم

وتقبلوا مروري .. مرور فيصل او بين السرايات :Oc_sun1[1]:

المصري برة مصر .. كائن آخر قمة في الإلتزام المروري .. وهنا على النقيض تماماً

كلام حضرتك سليم وفعلا النظام ده مطبق بره ومثلا في فرنسا ولا دفاتر ولا نقش فراخ ولا محسوبيات ولا كلام فاضي كل نوع من المخالفات له نقاط على الرخصة وعند حدوثها يتم التعليم عليها في الرخصة وبكده يكون وانت رايح تجدد تبقى عارف انت مخالفاتك ايه

طب وانتو شايفين انه ممكن يتطبق في مصر ولا هنفضل كده علطول ؟

اقتباس:

---

المشاركة الأصلية كتبت بواسطة A7MADO

طب وانتو شايفين انه ممكن يتطبق في مصر ولا هنفضل كده علطول ؟

---

طبعا
حنفضل كده على طول
لان الفساااااااااااااااااااد
توغل و توغل و توغل توغل و توغل و توغل توغل و توغل و توغل
حتى النخاع
الافضل ان نفكر فى كيفية التعامل
وليس كيفية المواجهه
:I_angr1[1]:

هو حضرتك كنت عايش فى الامارات لان النظام ده مطبق هناك وانك معك مئه فى المئه وكتبت بعض من الافكار لاكن قبل ان اقراء مقالك هذا وعلى العموم اتمنى التطبق لان هذا ناجح جدا فى الامارات برغم تعدد الجنسيات لاكن طبيعة الجنس البشرى لا ينفع معها الا القوة

حد يجيبلي الراجل ده ابوسه

فعلا النظام ده شغال في الإمارات ومن انجح نظم المرور في العالم

oh my god, the only thing that you will cause is to make people pay 1000 for the school and another 500 to pass as rashwah instead of only 500 to get ur driving license

أيوة يعني انت قصدك نهاجر

ماتقول كده و خلاص

انا هاقولك حاجة طبعا النظام دا لا يختلف عليه اتنين بس انت بتتكلم عن مصر يعني انسي ان حاجة زي كدا ممكن تحصل اصلا لسبب ان دايما التطبيق مش بالصورة المرجوة
حاجة كمان بس دا هزار يعني عايزين نخبي الموضوع دا لحسن حد ياخد بيه خبر و يعملوه قانون مرور جديد تاني و لا حاجة دا فرصة تجيب فلوس للمرور .

اقتباس:

---

المشاركة الأصلية كتبت بواسطة ahmed samy

أيوة يعني انت قصدك نهاجر

ماتقول كده و خلاص

---

صح ...:36_1_31:

:36_9_4: وانت طيب :)

والله ده اللي مفروض يتعمل

حضرتك بجد قولت كلام جميل اوي بس السؤال المهم (ياترى مين من المسؤلين هينفذ الكلام ده)؟؟

[QUOTE=Xenophobik;3872943551]حد يجيبلي الراجل ده ابوسه

فعلا النظام ده شغال في الإمارات ومن انجح نظم المرور في العالم[/QUOTE


بس تعرف ليه من انجح نظم المرور لان هناك القانون يطبق على الكبير قبل الصغير ولاتهاون مع اى شخص مخالف حتى كبار الدولة ومن قريب فكروا انهم يلغوا المخالفات عن الشخصيات الكبيرة فى الحكومة ذى اعضاء مجلس (...) عندنا وقامت الدنيا واعترض الشعب الاماراتى على اساس لاتمييز بين اى مواطن مهما كان مكانته الاجتماعية حتى ان هؤلاء الاشخاص المهميين رفضوا هذا الموضوع وبالفعل تم العدول عنه تجاوبا مع راحة المواطن ومصلحته ... بالله عليك هل هذا ممكن يحدث عندنا اتحدى ولا فى الاحلام...وللعلم انا لما كنت هناك حبيت اطلع رخصة قيادة وقال لى الجميع لاتحلم بان تستخرج الرخصة الا بعد اشهر وربما سنين ومعروف ان من يستخرج الرخصة هناك كانه حصل على شهادة بكالوريوس ..وبرغم خبرتى فى القيادة فى مصر على مدار 20 سنة لم تشفع لى فى سرعة استخراج الرخصة لانى كنت جاهل فى قوانين المرور والسير وكما تعلمون نحن فى مصر القيادة عندنا فهلوة وقوة وقلت زوق وحرب عصابات ,,, واخذت كورسات فى قوانين المرور والسير واحترمت تلك القوانين غصب فى الاول ولذا نجحت لاكن هناك العديد جدا رسب ومنهم مصرى كان يختبر معنا ونتيجة رسوبه ادت الى فقدان عقله وهدوئه وبصوت عالى اعترض كيف يرسب وهو سائق كبير ومفيش ذيه فى مصر ... وللعلم بعد حصولى على الرخصة وقيادتى فى شوارع الامارات لم استمتع فى حياتى باحترامى للقوانين كما حدث هناك لانى اخذت حقى فى السير فى الشوارع وبدون توتر فلا احد يكسر عليك او يستجرى يعدى من امامك بدون ان ينبهك اولا وعند افساحك له الطريق يتخطاك لاكن بمزاجك وبنظام.. هل هذا ممكن يحدث هنا وخصوصا فى وجود سائقى الميكروباصات والمحسوبية؟ اريد رد

ياعم هو احنا فى أمريكا إيه اللى انت بتقولوا ده

اقتباس:

---

المشاركة الأصلية كتبت بواسطة karimzein4444

ياعم هو احنا فى أمريكا إيه اللى انت بتقولوا ده

---

مشكلتنا الاقتناع بما غرسه الامريكان باننا شعوب متخلفه درجه ثالثة ياسيدى كنت اتمنى ان تقول افضل من ذلك وللعلم احنا ممكن نكون احسن من الامريكان بس اكثرنا بيحب الفوضه واللامبالاة وعدم تحمل المسئولية:whtauwant:

اقتباس:

---

مشكلتنا الاقتناع بما غرسه الامريكان باننا شعوب متخلفه درجه ثالثة ياسيدى كنت اتمنى ان تقول افضل من ذلك وللعلم احنا ممكن نكون احسن من الامريكان بس اكثرنا بيحب الفوضه واللامبالاة وعدم تحمل المسئولية

---

مفيش حد بيحاول يقنعنا أن أحنا متخلفين ...........

أنزل الشارع و أنت تعرف أننا معانا دكتوراه في التخلف و الهمجية

مش محتاجة لا أمريكا و لا غيرها

كفاية انى اقول لحضرتك ان المرور فى الداخلية بيسمى الخليج
من النسب المحصلة من المخالفات
و فى كل شهر سبعة من كل سنة بتكثر اللجان لتحصيل المخالفات

اقتباس:

---

المشاركة الأصلية كتبت بواسطة tutankhamoun

مفيش حد بيحاول يقنعنا أن أحنا متخلفين ...........

أنزل الشارع و أنت تعرف أننا معانا دكتوراه في التخلف و الهمجية

مش محتاجة لا أمريكا و لا غيرها

---

مع ان المصريين فى الخارج ماشيين بنظام وقواعد المرور .. وحتى اذا كان خوف بس فى النهاية اتبعوا القانون يعنى فى امل المهم الحكومة الاول تحترم القوانين الى تصيغها قبل ان تفرضها علينا ونشعر بالعدالة بين جميع الطبقات ونلغى كلمة ياباشا وسعادتك .

اقتباس:

---

مع ان المصريين فى الخارج ماشيين بنظام وقواعد المرور .. وحتى اذا كان خوف بس فى النهاية اتبعوا القانون يعنى فى امل المهم الحكومة الاول تحترم القوانين الى تصيغها قبل ان تفرضها علينا ونشعر بالعدالة بين جميع الطبقات ونلغى كلمة ياباشا وسعادتك .

---

أنا بجد يا أخي بدر مش فاهم الشعب المصري ( أنا و أنت و غيري و غيرك )
أحنا شعب غريب عجيب
نسافر برة .... أغلبنا بيضطر يتبع القوانين ( مش بيتبعها أقتناع ) لاءة بيتبعها خوف و رعب بس .
علشان كدا لما بيرجع تاني مصر ............ بترجع ريمة لعادتها القديمة ......... و كأنه ما قعدش برة مصر يوم واحد .
طبعا مش كل الناس ........ و لكن الغالبية الساحقة الماحقة .
و بعدين بقى الوضع في مصر مختلف
لأن أنت لما بتطلع برة مصر بتكون أقلية و بتضطر تمشي زي الأغلبية و إلا هاتكون منبوذ و مطرود
إنما في مصر ............... سمك لبن تمر هندي ........ الناس عاجبها كدا و مبسوطين كدا و الأقلية مننا هي اللي مش مبسوطة .

خلاص الحكومة بتسيب المرض ينتشر لغاية ما بيكون مستحيل علاجه
زي العشوائيات .......... تبدأ بيت أو بيتين في وسط الزراعة ......... و بعدين توصيل كهرباء و مياة و السرطان يستشغل و بيكون صعب علاجه.
زي رخص السواقة ........... واسطة و كوسة ده بالاضافة أصلا أن مبادئ الأمتحانات عندنا تهريج أصلي
و بالتالي دلوقتي ,,,,,,,,,,, صعب تظبط 10 مليون بني آدم معاهم رخص سواقة و كمان الناس دي أتعودت على حاجات غلط و فاكرها صح .

صدقني ............. الجيل الحالي مفيش منه فايدة ........... محتاجة أجيال ........... و محتاجة ظبط و ربط شديد و حازم لأن للآسف هي دي الطريقة اللي أحنا بنفهمها ............ لما بندلع ........... الدنيا بتخرب .

معك الف حق ولاكن الحكاية اننا فعلا شعب بيخاف ولا يختشى وعن تجربة انا كنت فى الامارات وخلال اربع سنوات تشبعت باحترام القوانين واسلوب القيادة الراقى وعندما اتيت الى مصر اقسم لك لم تفلح محاولاتى ان اسير كما كنت افعل فى الامارات وكدت ان يصطدم بى سيارات كثيرة هذا غير التعليقات الغير محترمة التى كنت اسمعها وهذا يقول لى انت لاتعرف السواقة وذاك يخرج على بوابل من الشتائم ...والمصيبة الكبرى وجدت اشارة حديثة على مصر لاكن مطبقة فى الخارج منذ دهر وكما تعودت فى بلد احترام القانون (الامارات) توقفت حتى تعود الاشارة لتصبح خضراء ...وكانى ياسيدى ارتكبت جرم واخذت ابواق السيارات تصيح مطالبه ان اتحرك وبالطبع لم ابالى وقلت ماهذا هؤلاء لايمكن ان يكونوا مثقفين وانتظرت لاكن ليس طويلا حيث خرج على ولا اعلم من اين امين شرطه واخذ يصيح وللغرابه كنت انا المستهدف واخذ يطالبنى بالتحرك واشرت له بان الاشارة لا تزل حمراء ولم يشفع هذا لى بل قام بتهديدى باخذ مخالفة لى ان لم اتحرك ...باالله عليك اين العقل فيما ارى وكيف اعود واحترم القانون وانا لا اجد من صانعيه الا عدم اللامبالاة ...وتحيا مصر الحضارة

يا جماعة المشكلة حلها سهل بس المهم عشان فعلا تتحل لازم الواسطة والمحسوبية يتلغوا الاول والقانون يطبق على الكبير قبل الصغير مهما كانت رتبته أو منصبه أو مكانته في المجتمع

اقتباس:

---

المشاركة الأصلية كتبت بواسطة xenophobik

يا جماعة المشكلة حلها سهل بس المهم عشان فعلا تتحل لازم الواسطة والمحسوبية يتلغوا الاول والقانون يطبق على الكبير قبل الصغير مهما كانت رتبته أو منصبه أو مكانته في المجتمع

---

صح الكلام واتمنى صوتنا يصل لصانعى القانون ولا ده حلم:36_1_50[1]:

فاكر الاعلان بتاع انسى يا عمرو؟؟؟؟؟؟؟
انسى ياعمرو

اقتباس:

---

المشاركة الأصلية كتبت بواسطة xenophobik

يا جماعة المشكلة حلها سهل بس المهم عشان فعلا تتحل لازم الواسطة والمحسوبية يتلغوا الاول والقانون يطبق على الكبير قبل الصغير مهما كانت رتبته أو منصبه أو مكانته في المجتمع

---

انا معاك في الكلام ده مش مهم القانون المهم هيطبق على مين